Д у қ қурулғанлиқиниң 20 йиллиқи хатириләш қарар қилинған

Мюнхендин ихтиярий мухбиримиз әкрәм тәйярлиди
2024.01.13
dolqun-eysa-duq 6-Нөвәтлик д у қ омумий вәкилләр қурултийидин хатириләр, дуня уйғур қурултийиниң рәиси долқун әйса. 2016-Йили 25-апрел
RFA/Ekrem

Д у қ ниң 11-январдики баянатидин мәлум болушичә, д у қ рәһбәрлири бу йил 5-айда д у қ қурулғанлиқиниң 20 йиллиқини хатириләшни қарар қилған.

Баянатта мундақ дейилгән: “дуня уйғур қурултийи заманида муһаҗирәттики уйғур миллий һәрикитиниң йетәкчи органлири һесабланған ‛шәрқий түркистан (уйғуристан) миллий қурултийи‚ билән ‛дуня уйғур яшлири қурултийи‚ниң бирлишиши нәтиҗисидә 2004-йили апрел германийәниң мюнхен шәһиридә қурулған иди. 20 Йиллиқ бир тарихий мусапини баштин көчүргән д у қ ниң бүгүнки күндә шәрқий түркистан миллий муҗадилисиниң вәкиллик оргини сүпитидә өз хәлқиниң ишәнчигә һәмдә б д т, явропа иттипақи вә ғәрб әллири башлиқ нурғун дөләтләрниң етирап қилишиға еришиши, әлвәттә биһесаб бәдәлләрниң мәһсулидур.”

Баянатта йәнә мундақ җүмлиләргә орун берилгән: “тәшкилатимиз бу 20 йилда талай қетимлиқ еғир давалғуш һәм сиясий киризисларға, мурәккәп хәлқара вәзийәтниң түрлүк бесимлириға, хитай вә башқа дүшмән күчләрниң тохтавсиз һуҗумлири дуч кәлгән болсиму, әмма қәтий тиз пүкмәс ирадә билән барлиқ тосалғуларни йеңип, кичикликтин зорийип, аҗизлиқтин күчийип, бүгүн у хәлқарада тонулған нопузлуқ бир тәшкилат һалиға кәлди һәмдә бүгүн дуняға кәлгәнликиниң 20 йиллиқини күтүвелиш алдида турмақта.”

Д у қ рәиси долқун әйса әпәнди бүгүн бу хусуста зияритимизни қобул қилғанда, бу мурасимни өткүзүштики мәқсәтниң д у қ ниң 20 йиллиқ тарихий мусаписини көздин көчүрүш вә келәчәкниң йол хәритисини қайтидин сизиштин ибарәт икәнликини тәкитлиди.

6-Нөвәтлик д у қ омумий вәкилләр қурултийидин хатириләр, әркин алиптекин сөзләватиду. 2016-Йили 25-апрел
6-Нөвәтлик д у қ омумий вәкилләр қурултийидин хатириләр, әркин алиптекин сөзләватиду. 2016-Йили 25-апрел
RFA/Ekrem

Д у қ ниң тунҗи рәиси әркин алиптекин әпәнди бу һәқтә тохталғанда, д у қ ниң қурулуш һарписида қобул қилинған 5 маддилиқ бир келишимни әсләп өтти. У сөзидә, өзиниң д у қ қарита үмиди вә тәвсийәлириниму тилға елип өтти.

Мәзкур баянатта д у қ қурулғанлиқиниң 20 йиллиқи хатириләштики сәвәб һәққидә мундақ ибариләрни тилға алған: “биз д у қ қурулғанлиқиниң 20 йиллиқини хатириләшни шу вәҗидин муһим билдуқки, хитайниң шәрқий түркистан хәлқи үстидин йүргүзүватқан зулумлири тәрәққий қилип ирқий қирғинчилиқ дәриҗисигә көтүрүлди. Миллитимиз йоқилиш гирдабиға йүзләнди. Хәлқара вәзийәттики сәлбий өзгиришләр дәвайимизға еғир хирис вә бесим пәйда қилди. Бундақ бир заманда, хитай зулумиға тезрәк хатимә бериш, шәрқий түркистан хәлқиниң әркин-азатлиқи үчүн йеңи бир йол хәритисини сизип чиқиш һәмдә техиму зор җасарәт билән күрәш қилишниң маддий вә мәниви енергийәсини яритиш, нөвәттики күришимизниң җиддий еһтияҗиға айланди.”

Д у қ ниң муавин рәиси пәрһат муһәммәди әпәнди, бүгүн хәлқаралиқ бир тәшкилатқа айланған д у қ ниң интайин мурәккәп бир хәлқаралиқ вәзийәттә дуняға кәлгәнликини ипадә қилди. У сөзидә, д у қ һазирғичә қолға кәлтүргән бәзи утуқларни тилға елип өтти.

6-Нөвәтлик д у қ омумий вәкилләр қурултийидин хатириләр. 2016-Йили 25-апрел
6-Нөвәтлик д у қ омумий вәкилләр қурултийидин хатириләр. 2016-Йили 25-апрел
RFA/Ekrem

Д у қ ниң баянатида йәнә мундақ дейилгән: “бүгүн д у қ ниң қурулуши вә тәрәққияти үчүн зор һәссиләр қатқан бәзи вәтәнпәрвәр затлиримиз биз билән мәңгүлүк видалашти. Йәнә бәзилири иккинчи сәпкә чекинди. Миллий дәвайимизға һәссиләр қетип кәлгән бу тәвәррүк устазлиримизниң әҗригә тәшәккүрлиримизни билдүрүш, пидакар сәпдашлиримиз билән келәчәк һәққидә пикирлишиш, җасарәтлик избасар әвладлиримизға миллий ирадимиз һәққидә йәнә бир қетим дәрс бериш, шундақла д у қ ниң 20 йиллиқ мусаписигә биргә қарап чиқип тәҗрибә-савақларни йәкүнләш мәқситидә, д у қ ниң қурулушидин һазирғичә хизмәт қилған барлиқ рәһбәрләр, вәкилләр, қоллиғучилар вә чәт әллик достлиримизниң иштиракида 2024-йили 5-айниң 3-5-күнлири мюнхенда д у қ қурулғанлиқиниң 20 йиллиқини хатириләш мурасими өткүзүшни қарар қилдуқ.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.