D u q qurulghanliqining 20 yilliqi xatirilesh qarar qilin'ghan

D u q ning 11-yanwardiki bayanatidin melum bolushiche, d u q rehberliri bu yil 5-ayda d u q qurulghanliqining 20 yilliqini xatirileshni qarar qilghan.

Bayanatta mundaq déyilgen: “Dunya Uyghur qurultiyi zamanida muhajirettiki Uyghur milliy herikitining yétekchi organliri hésablan'ghan ‛sherqiy türkistan (Uyghuristan) milliy qurultiyi‚ bilen ‛dunya Uyghur yashliri qurultiyi‚ning birlishishi netijiside 2004-yili aprél gérmaniyening myunxén shehiride qurulghan idi. 20 Yilliq bir tarixiy musapini bashtin köchürgen d u q ning bügünki künde sherqiy türkistan milliy mujadilisining wekillik orgini süpitide öz xelqining ishenchige hemde b d t, yawropa ittipaqi we gherb elliri bashliq nurghun döletlerning étirap qilishigha érishishi, elwette bihésab bedellerning mehsulidur.”

Bayanatta yene mundaq jümlilerge orun bérilgen: “Teshkilatimiz bu 20 yilda talay qétimliq éghir dawalghush hem siyasiy kirizislargha, murekkep xelq'ara weziyetning türlük bésimlirigha, xitay we bashqa düshmen küchlerning toxtawsiz hujumliri duch kelgen bolsimu, emma qet'iy tiz pükmes irade bilen barliq tosalghularni yéngip, kichikliktin zoriyip, ajizliqtin küchiyip, bügün u xelq'arada tonulghan nopuzluq bir teshkilat haligha keldi hemde bügün dunyagha kelgenlikining 20 yilliqini kütüwélish aldida turmaqta.”

D u q re'isi dolqun eysa ependi bügün bu xususta ziyaritimizni qobul qilghanda, bu murasimni ötküzüshtiki meqsetning d u q ning 20 yilliq tarixiy musapisini közdin köchürüsh we kélechekning yol xeritisini qaytidin sizishtin ibaret ikenlikini tekitlidi.

RFA/Ekrem

D u q ning tunji re'isi erkin aliptékin ependi bu heqte toxtalghanda, d u q ning qurulush harpisida qobul qilin'ghan 5 maddiliq bir kélishimni eslep ötti. U sözide, özining d u q qarita ümidi we tewsiyelirinimu tilgha élip ötti.

Mezkur bayanatta d u q qurulghanliqining 20 yilliqi xatirileshtiki seweb heqqide mundaq ibarilerni tilgha alghan: “Biz d u q qurulghanliqining 20 yilliqini xatirileshni shu wejidin muhim bilduqki, xitayning sherqiy türkistan xelqi üstidin yürgüzüwatqan zulumliri tereqqiy qilip irqiy qirghinchiliq derijisige kötürüldi. Millitimiz yoqilish girdabigha yüzlendi. Xelq'ara weziyettiki selbiy özgirishler dewayimizgha éghir xiris we bésim peyda qildi. Bundaq bir zamanda, xitay zulumigha tézrek xatime bérish, sherqiy türkistan xelqining erkin-azatliqi üchün yéngi bir yol xeritisini sizip chiqish hemde téximu zor jasaret bilen küresh qilishning maddiy we meniwi énérgiyesini yaritish, nöwettiki kürishimizning jiddiy éhtiyajigha aylandi.”

D u q ning mu'awin re'isi perhat muhemmedi ependi, bügün xelq'araliq bir teshkilatqa aylan'ghan d u q ning intayin murekkep bir xelq'araliq weziyette dunyagha kelgenlikini ipade qildi. U sözide, d u q hazirghiche qolgha keltürgen bezi utuqlarni tilgha élip ötti.

RFA/Ekrem

D u q ning bayanatida yene mundaq déyilgen: “Bügün d u q ning qurulushi we tereqqiyati üchün zor hessiler qatqan bezi wetenperwer zatlirimiz biz bilen menggülük widalashti. Yene beziliri ikkinchi sepke chékindi. Milliy dewayimizgha hessiler qétip kelgen bu tewerrük ustazlirimizning ejrige teshekkürlirimizni bildürüsh, pidakar sepdashlirimiz bilen kélechek heqqide pikirlishish, jasaretlik izbasar ewladlirimizgha milliy iradimiz heqqide yene bir qétim ders bérish, shundaqla d u q ning 20 yilliq musapisige birge qarap chiqip tejribe-sawaqlarni yekünlesh meqsitide, d u q ning qurulushidin hazirghiche xizmet qilghan barliq rehberler, wekiller, qollighuchilar we chet ellik dostlirimizning ishtirakida 2024-yili 5-ayning 3-5-künliri myunxénda d u q qurulghanliqining 20 yilliqini xatirilesh murasimi ötküzüshni qarar qilduq.”