Xitay emeldarining d u q heqqide atqan "Poliri" diqqet qozghidi

Ixtiyariy muxbirimiz ekrem
2019-04-23
Élxet
Pikir
Share
Print
Xitayning b d t diki sabiq emeldari wu xongbo(aldinqi ret solda) xelq'ara énérgiye yighinida. 2012-Yili 22-öktebir, dubey.
Xitayning b d t diki sabiq emeldari wu xongbo(aldinqi ret solda) xelq'ara énérgiye yighinida. 2012-Yili 22-öktebir, dubey.
Reuters

Xitay emeldari "Merkizi gérmaniyediki milliy bölgünchilerni b d t din heydep chiqardim" dep maxtandi.

Xitayning merkizi téléwiziye 1-qanili (CCTV-1) yéqinda élan qilghan "Tamashibinlarning so'alliri" programmisi ijtima'iy taratqularda keng tarqilip ghulghula qozghidi.

Filimda, xitayning b d t diki emeldari wu xongbo neq meydanda xitay tamashibinlirigha sözlep, "Merkizi gérmaniyede bolghan shinjang musteqilchi bölgünchi küchliri b d t yighinigha üsüp kirgen idi, ularni yighin zalidinla emes, b d t da'irisidinmu heydep chiqardim" deydu.

Ijtima'iy taratqulardiki bu xususta élip bérilghan munaziriler "Xitay yalghuz dunyanila emes, özining xelqinimu aldaydu" dégen jümlige merkezleshken bolsimu, bir qisim Uyghurlar arisida bundaq bir weqening heqiqeten sadir bolghan-bolmighanliqi talash-tartishliq bir mesile bolup qalghan.

Xitay emeldari wu xongbo yuqiriqi programmida közde tutqan "Merkizi gérmaniyediki musteqilchi bölgünchi küchler" eslide d u q, "B d t yighinigha üsüp kirgen we heydep chiqirilghan shexs" dolqun eysa bolup, 2018-yili 4-ayning 16-küni b d t ning nyu-yorktiki merkizide chaqirilghan "Az sanliqlar munbiri" yighinida heqiqeten mushundaq bir weqe yüz bergen.

D u q re'isi dolqun eysa ependining bildürüshiche, xitay hakimiyiti b d t bixeterlik küchlirige "Dolqun eysa xelq'ara saqchida tutush buyruqi chiqirilghan térrorist" dégen yalghan melumatni bérip, uni bir qétim yighin zalidin chiqiriwételigen bolsimu, oylimighan yerdin bu mesilige amérika, yawropa ittipaqi, b d t ning jiddiy arilishishini keltürüp chiqarghan we axirqi netijide xitay terep meghlup bolghan.

Melum bolushiche, shu qétimqi weqe yüz bérip aridin uzun ötmeyla b d t da xitay közde tutqan "Bölgünchi teshkilat" we uning re'isige munasiwetlik bir meydan keskin "Jeng" bolup ötti. 2018-Yili 21-aprél b d t da xitay terep bilen amérika, gérmaniye, yawropa ittipaqi arisida jiddiy talash-tartish yüz berdi. Xitay hakimiyiti merkizi gérmaniyede bolghan "Xeter astidiki xelqler teshkilati" ning b d t diki közetküchilik salahiyitini bikar qilish heqqide b d t gha erz sun'ghan idi. Bu talash-tartishqa d u q we uning re'isi dolqun eysa ependimu sörep ekirildi.

Talash-tartish nahayiti keskin boldi. Gerche d u q re'isi dolqun eysaning intérpol, yeni xelq'ara saqchidiki qizil tutush buyruqi 20-mart emeldin qaldurulghan bolsimu, xitay terep uni yenila "Tutush buyruqi chiqirilghan térrorchi, b d t gha kirish salahiyiti yoq" dep eyibleytti. D u q ni bolsa "Térrorchi teshkilat" dep qarilaytti. Buningda amérikaning b d t diki alahide elchisi kelly kuréy xanim xitaygha shiddetlik reddiye qayturdi. Gérmaniye, en'gliye, isra'iliye qatarliq döletler we yawropa ittipaqi bir septe turup xitayning töhmetlirini aghdurdi. Netije étibari bilen éytqanda, bu jengdimu d u q ghelibe qazan'ghan idi.

Xitay emeldari wu xongbo yuqiriqi programmida weqening netijisini, özlirining meghlubiyitini tilgha almay öz xelqini aldaydu. Bu xil aldamchiliqning xitay hakimiyitige nisbeten omumlashqan bir hadise ikenlikini ilgiri sürgen d u q mu'awin re'isi perhat muhemmidi ependi, xitayning b d t yighinlirida qanche qétimlap d u q teripidin reswa qilin'ghanliqini tilgha aldi.

Pikirler (0)
Share
Toluq bet