Dunya Uyghur qurultiyining tunji qétimliq kéngeytilgen yighinida yéngi pa'aliyet pilani békitildi

Ixtiyariy muxbirimiz erkin tarim
2022-01-11
Share
Dunya Uyghur qurultiyining tunji qétimliq kéngeytilgen yighinida yéngi pa'aliyet pilani békitildi D u q ning tor arqiliq ötküzgen omumiy kéngesh yighinidin körünüsh. 2022-Yili 8-yanwar.
RFA/Erkin Tarim

8-Yanwar chaqirilghan d u q ning tor arqiliq ötküzgen omumiy kéngesh yighinida d u q ning rehberliri bilen her qaysi döletlerdiki sherqiy türkistan ammiwi teshkilatlirining rehberliri dunyaning nöwettiki weziyiti, aldimizda élip bérishqa tégishlik xizmetler toghrisida muzakire élip bérip pa'aliyet pilani tüzüp chiqti.

D u q re'isi dolqun eysaning bergen melumatlirigha qarighanda, bu yighinda qazaqistanning nöwettiki weziyiti, béyjing qishliq olimpik tenterbiye musabiqisini bayqot qilish pa'aliyitini qanat yaydurush toghrisida muzakire élip bérilghan.

Yighin'gha riyasetchilik qilghan d u q mu'awin re'isi perhat muhemmet ependi téléfon ziyaritimizni qobul qilip, bu yighin'gha d u q rehberliri we dunyaning her qaysi jaylirida pa'aliyet élip bériwatqan qérindash teshkilatlarning mes'ullirining ishtirak qilghanliqini, yighinning muweppeqiyetlik ötkenlikini bildürdi.

D u q ning re'isi dolqun eysa ependi téléfon ziyaritimizni qobul qilip yighin heqqide qisqiche melumat berdi.

Perhat muhemmet ependi riyasetchilik qilghan yighinda, 40 qa yéqin teshkilatning mes'ulliri aldimizdiki künlerde qilishqa tégishlik xizmetler toghrisida telep-pikirlirini otturigha qoyup konkrét xizmet pilanini békitip chiqqan. D u q re'isi dolqun eysa ependi bashqa döletlernimu amérika qobul qilghan “Uyghur mejburiy emgikining aldini élish qanuni” gha oxshash qanun chiqirishqa chaqirish pa'aliyiti élip bérish we teshkilatlar otturisidiki hemkarliqni kücheytish toghrisida hempikir bolghanliqini otturigha qoydi.

Kanada Uyghur jem'iyitining re'isi tuyghun abduweli ependi téléfon ziyaritimizni qobul qilip, nöwettiki dunya weziyitidiki özgirishler, dunya Uyghur qurultiyigha bolghan hujum küchiyiwatqan bir mezgilde dunya Uyghur qurultiyining rehberliri bilen dunyaning her qaysi jaylirida pa'aliyet élip bériwatqan 40 etrapida Uyghur teshkilatining mes'ulliri ishtirak qilghan tor yighinida nahayiti muhim mesililer toghrisida muzakire élip bérilip, 2022-yilida öz'ara hemkarliqni kücheytip téximu köp we tesirlik pa'aliyetlerni élip bérish toghrisida pikir birlikige kélin'genlikini bayan qildi.

8-Yanwar küni chaqirilghan d u q ning kéngeytilgen yighinida amérikadiki Uyghur herikiti teshkilatining mes'uli roshen abbas xanim teshkilatining yéqindin buyan élip barghan pa'aliyetliri toghrisida doklat berdi. U, sözide dunya Uyghur qurultiyi bilen hemkarliship élip barmaqchi bolghan pa'aliyetliri toghrisidiki telep-pikirlirini otturigha qoyup ötti. U, téléfon ziyaritimizni qobul qilip, bu heqte melumat berdi.

Yighin axirida d u q ning re'isi dolqun eysa ependi söz qilip, yighinni xulasiligendin kéyin, d u q ning hazir xelq'aradiki 250 din artuq kishilik hoquq teshkilatliri, 40tin artuq Uyghur teshkilatliri bilen birlikte ish birliki élip bériwatqanliqini, bundin kéyin bu hemkarliqni téximu kücheytidighanliqini otturigha qoydi.

D u q ning bu kéngeytilgen omumiy kéngesh yighini ötken yili piragada chaqirilghan 7-nöwetlik wekiller qurultiyidin kéyinki tunji qétimliq kéngeytilgen yighini iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet