D u q téléfon yighini chaqirip korona wirusigha qarshi seperwerlik élan qildi

Ixtiyariy muxbirimiz erkin tarim
2020-03-27
Élxet
Pikir
Share
Print
Merkizi enqerege jaylashqan Uyghur tetqiqat institutining uyushturushi bilen échilghan 2-nöwetlik "Yipek yoli we Uyghurlar" témida yumilaq üstel yighinida mezkur institutining re'isi doktor erkin ekrem riyasetchilik qildi. 2019-Yili 27-yanwar, türkiye.
Merkizi enqerege jaylashqan Uyghur tetqiqat institutining uyushturushi bilen échilghan 2-nöwetlik "Yipek yoli we Uyghurlar" témida yumilaq üstel yighinida mezkur institutining re'isi doktor erkin ekrem riyasetchilik qildi. 2019-Yili 27-yanwar, türkiye.
RFA/Arslan

26-Mart küni dunya Uyghur qurultiyi teripidin chaqirilghan, dunyada aktip pa'aliyet élip bériwatqan 30 din artuq teshkilatning re'isliri qatnashqan téléfon yighinida korona wirusi sewebidin qiyin ehwalgha chüshüp qalghan türkiyediki Uyghurlargha jiddiy yardem bérish heqqide omumiy seperwerlik élan qilindi.

Dunya Uyghur qurultiyining teshkiliy ishlargha mes'ul mu'awin re'isi perhat yurungqash ependining riyasetchilikide chaqirilghan bu qétimqi téléfon yighinigha dunya Uyghur qurultiyining siyasiy ishlargha mes'ul mu'awin re'isi doktor erkin ekrem ependi we dunya Uyghur qurultiyining her derijilik rehberliri qatnashti. Yighinning kün tertipige bina'en istanbuldiki sherqiy türkistan teshkilatliri birliki re'isi hidayetulla oghuzxan ependi, Uyghur akadémiyesining re'isi proféssor alimjan inayet ependi, sherqiy türkistan ölimalar birlikining re'isi doktor atawulla shahyari ependi, sherqiy türkistan fondining sabiq re'isi hamut köktürk ependi we hazirqi re'isi muhittin januyghur ependi qatarliq kishiler yighinda türkiyediki Uyghurlarning omumiy weziyiti heqqide tepsiliy melumat berdi. Yighinda türkiyediki Uyghurlargha korona wirusi mezgilide qandaq? we néme yardemlerni bérish toghrisidiki pilanlar otturigha qoyulup muhakime qilindi.

26-Mart küni chüshtin kéyin ötküzülgen téléfon yighinigha yene qazaqistan, qirghizistan, kanada, amérika, awstraliye, yaponiye, türkiye, norwégiye, shiwétsiye, finlandiye, bélgiye, firansiye, shiwétsiye, awstraliye, gérmaniye, en'gliye, gollandiye qatarliq döletlerde aktip pa'aliyet élip bériwatqan Uyghur teshkilatlirining asasliq mes'ullirimu qatnashti.

Yighin'gha qatnashqan dunya Uyghur qurultiyi ijra'iye komitétining barliq ezaliri, qurultay fondining herqaysi ellerdiki wekilliri we nami atalghan ellerdiki Uyghur teshkilatlirining mes'ulliri birlikte korona wirusi sewebidin qéyin ehwalda qalghan türkiyediki Uyghurlargha derhal yardem qilishni nöwettiki eng asasliq wezipe dep békitti.

D u q re'isi dolqun eysa ependi korona wirusi peyda bolushtin burun Uyghur mesilisining yuqiri sewiyede küntertipke kéliwatqanliqini, hazir bolsa hemme dölet öz xelqining derdi bilen boluwatqan peytte xitayning Uyghur yashlirini xitayning ichki rayonlirigha yötkewatqanliqini, Uyghur xelqi duchar boluwatqan xewpning barghanséri küchiyiwatqanliqini bayan qildi.

D u q re'isi dolqun eysa ependi bu heqtiki ziyaritimizni qobul qilip, xitayning wuxen shehiride otturigha chiqqan wirusning pütün dunyagha tarqalghanliqini, muhajirettiki Uyghurlar eng köp olturaqlashqan döletlerdin biri bolghan türkiyediki Uyghurlarning korona wirusidin tüpeyli her xil qiyinchiliqlargha duchar bolushqa bashlighanliqini, bu Uyghurlargha yardem qilish üchün yardem bérish merkizi qurushning qararlashturulghanliqini bayan qildi.

2016-2014-Yilliri malayshiya we tayland arqiliq 8000 etrapida Uyghur türkiyege kelgenidi. Bu Uyghurlarning köpi iqtisadidin ayrilip qalghan bolup, ular türkiyede qayta igilik tiklep turmushini qamdashqa tirishiwatatti. 11-Martta türkiyede korona wirusi bimari bayqilish bilen türkiye hökümiti xizmet yerliri, ashxana, bazarlarni waqitliq taqash qarari alghandin kéyin bu Uyghurlarning qiyinchiliqliri téximu köpeydi. Bu heqte ziyaritimizni qobul qilghan hidayetulla oghuzxan ependi Uyghurlar hazir duchar boluwatqan qiyinchiliqlar toghrisida toxtaldi.

D u q ning 26-mart küni ötküzgen téléfon yighinida dunyaning küntertipidin chüshüp qéliwatqan Uyghur mesilisini kün tertipte tutup turush üchün némilerni qilish toghrisidimu muzakire élip bérildi. D u q mu'awin re'isi doktor erkin ekrem ependi bu heqte melumat berdi.

Bu, dunya Uyghur qurultiyining korona wirusining Uyghurlargha keltürgen ziyanliri mesilisi we uninggha taqabil turush boyiche chaqirghan tunji téléfon yighini bolup, 4 sa'et dawamlashqan yighinda Uyghur doxturlar korona wirusidin qoghdinishning yolliri toghrisidimu doklat berdi.

Toluq bet