Д у қ иҗраийә комитети йиғинида “дуня уйғур қурултийи рәһбәрлириниң тәшкилий түзүми” қобул қилинди

25-Март чақирилған д у қ иҗраийә комитетиниң тор йиғинида “дуня уйғур қурултийи рәһбәрлириниң тәшкилий түзүми” қобул қилинди.

Мәзкур тор йиғинида, 16 маддидин тәркиб тапқан “дуня уйғур қурултийи рәһбәрлириниң тәшкилий түзүми” йиғинға қатнашқан иҗраийә комитети әзалириниң бирдәк авази билән мақуллуқтин өтти вә қурултай рәиси долқун әйса әпәндиниң имзаси билән шу күндин башлап рәсмий иҗра қилинишқа башлиди.

Дуня уйғур қурултийи иҗраийә комитетиниң рәиси өмәр қанат әпәндиниң риясәтчиликидә өткүзүлгән йиғинда “дуня уйғур қурултийи рәһбәрлириниң тәшкилий түзүми” ниң һәр бир маддилири үстидә 3 саәттин артуқ музакирә елип берилди.

“дуня уйғур қурултийи рәһбәрлириниң тәшкилий түзүми” дә қурултай рәһбәрлириниң тәшкилий җәһәттә диққәт қилишиға тегишлик принсиплар вә хилаплиқ қилғучиларға көрүлидиған чариләр наһайити тәпсилий орун алған болуп, мәзкур түзүм қурултай рәһбәрлириниң сиясий сәзгүрлүкини ашуруш вә қурултайниң ички бихәтәрликини қоғдашни асасий мәқсәт қилған. Мәзкур түзүмниң иҗра қилинишиға қурултай тәптиш һәйити назарәтчилик қилидикән. Д у қ муавин рәиси пәрһат муһәммәди әпәнди бизгә му һәқтә мәлумат бәрди.

Бу һәқтә телефон зияритимизни қобул қилған д у қ рәиси долқун әйса әпәнди “дуня уйғур қурултийи рәһбәрлириниң тәшкилий түзүми” ни мақуллуқтин өткүзүп йолға қоюшидики мәқсәт һәққидә тохталди. У, мундақ деди: “дуня уйғур қурултийи 19 йилдин буян күнсайин күчәйди, бүгүн дуняда уйғур дәвасини тәмсил қилидиған, бу йолда хәлқарада бәлгилик тәсир вә һөрмәткә сазавәр болған бир тәшкилат һалиға кәлди. Буниң билән бирликтә дуня уйғур қурултийини йоқ қилиш вә аҗизлитиш үчүн ички вә ташқи җәһәттин һәр хил һийлә-микирләрниң болуватқанлиқини көрүп туруватимиз. Бундақ бир тәшкилатта вәзипә өтәватқан барлиқ рәһбәрләрниң техиму сәгәк болуши, техиму интизамчан болуши вә хәлқарадики бирдин бир авази вә вәкиллик ролини өтүши үчүн буниңда хизмәт қиливатқан рәһбәрләрниң һошяр болуши, сөз-һәрикәтлиридә салмақ болуши, интизамчан болуши керәк. Гәрчә булар низамнамимизда йезилған. Лекин буниң бир йешимигә, тәпсилий изаһатиға еһтияҗимиз бар иди. Шуңа д у қ рәһбәрлири риайә қилишқа тегишлик болған 16 маддилиқ тәшкилий түзүмни әтраплиқ музакирә қилиш нәтиҗисидә мақуллап йолға қойдуқ”.

2023-Йили 3-айниң 25-күнидин тартип рәсмий иҗра қилинишқа башланған мәзкур тәшкилий түзүм қайси мәзмунларни өз ичигә алған? бу соалимизға мәзкур тәшкилий түзүмни йезип рәтләп чиққан дуня уйғур қурултийи иҗраийә комитетиниң муавин рәиси сәмәт абла әпәнди д у қ рәһбәрлири риайә қилишқа тегишлик қаидә түзүмләр вә көрүлидиған чариләрниң тәпсилий изаһланғанлиқини, буниң д у қ ниң бундин кейинки хизмәтлири үчүн пайдилинишниң зор болидиғанлиқини тәкитлиди.

Қурултай рәиси долқун әйсаниң билдүрүшичә, д у қ 2004-йили шәрқий түркистан (уйғуристан) миллий қурултийи билән дуня уйғур яшлири қурултийиниң бирлишиши вә әйни заманда муһаҗирәттә паалийәт елип бериватқан шәрқий түркистан аммиви тәшкилатлириниң мутләқ көп қисминиң рәһбәрлириниң бир йәргә келиши билән қурулуп, өзиниң нишанинии дунядики уйғур дәвасиниң бирдин бир һоқуқлуқ оргини дәп бекиткән болуп, 19 йилдин буян бу мәқсәтни әмәлгә ашуруш үчүн тиришип, мәлум дәриҗидә мәқситигә йәткән.