Д у қ ниң 6-нөвәтлик иҗраийә комитети йиғини чақирилип қарарлар қобул қилинди

Ихтиярий мухбиримиз әкрәм
2020.11.16
duq-ijraiye-yighin.jpg Д у қ ниң тор арқилиқ чақирилған 6-нөвәтлик иҗраийә комитети йиғинидин көрүнүш. 2020-Йили 15-ноябир.
RFA/Ekrem

15-Ноябир чақирилған д у қ ниң 6-нөвәтлик иҗраийә комитети йиғинида муһим мәсилиләр музакирә қилинған.

Д у қ рәһбәрлириниң бәргән мәлуматлириға қариғанда, д у қ әслидә 6-нөвәтлик иҗраийә комитети йиғинини 11-айда чехийәниң пайтәхти прага шәһиридә чақиришни пиланлиған болуп, хитайдин таралған коруна вирусиниң явропада әвҗ елиши мунасивити билән алдин орунлаштурулған бу пилан әмәлдин қалдурулған. 6-Нөвәтлик иҗраийә комитети йиғини 15-ноябир күни тор арқилиқ чақирилған. Йиғинға д у қ иҗраийә комитетиниң 15 дөләттики 35 нәпәр әзаси қатнашқан. Йиғин шәрқий түркистанниң истиқлал марши билән башланған.

Йиғинда алди билән д у қ рәиси долқун әйса әпәнди қурултайниң илгирики 6 айлиқ хизмәтлиридин доклат берип өткән. У сөзидә, өткән 6 ай ичидә америкада уйғурларға мунасивәтлик икки қанун мақулланғанлиқини, канада парламентиниң тунҗи болуп уйғур дияридики бастурушларни “ирқий қирғинчилиқ” дәп атиғанлиқини, германийә, әнглийә, италийә, голландийә, австралийә қатарлиқ дөләтләрниң парламентлирида вә явропа парламентида җаза лагерлири мәсилисиниң талаш-тартиш қилинғанлиқи һәмдә гуваһлиқ бериш йиғинлири өткүзүлгәнликини, 39 дөләтниң б д т да уйғурлар тәрәптә турғанлиқини тилға елип, гәрчә бу 6 айда уйғурлар мәсилисиниң хәлқарадики тәсири көрүнәрлик дәриҗидә ашқан болсиму, әмма уйғур дияриға йетәрлик дәриҗидә тәсир көрситәлмигәнликини әскәртип өткән.

Йиғинда д у қ ниң һазир хәлқарадики 230 дин артуқ кишилик һоқуқ тәшкилатлири, 70 тин артуқ уйғур тәшкилатлири билән иш бирлики елип бериватқанлиқи, өткән 6 айда 65 дөләттики 100 шәһәрдә 165 хәлқаралиқ тәшкилатлар билән бирликтә ортақ баянатлар елан қилиш, намайишлар уюштуруш қатарлиқ паалийәтләрни мувәппәқийәтлик әмәлгә ашурулғанлиқи баян қилинған болсиму, әмма бу нәтиҗиләрниң йәнила йетәрлик әмәслики тәкитлинип, бундин кейинки 6 айда елип баридиған бәзи муһим темиларға күч сәрп қилиш пикри илгири сүрүлгән.

Д у қ ниң низамнамисигә бинаән 6-нөвәтлик қурултайда сайланған рәһбәрләрниң вәзипә муддити бу йил 11-айда ахирлашқан болуп, корона вируси сәвәблик 7-қурултайни вақтида чақириш имканийити болмиғачқа, мәзкур йиғинда д у қ ниң һазирқи мәвҗут рәһбәрлик аппаратиниң келәр қетимлиқ қурултай чақирилғучи болған арилиқта вәзипилирини давамлаштурушқа һоқуқлуқ икәнлики тоғрисида қарар елинған.

Бу қетимқи йиғинда кәлгүси 6 ай ичидә елип баридиған паалийәтләрниң пиланлири оттуриға қоюлуп қарарлар қобул қилинған. Бу пиланлар ғәрб демократик дөләтлиригә “шәрқий түркистанниң мустәмликә земин икәнлики” ни етирап қилдуруш, буниң үчүн чәтәл мутәхәссислири, хәлқара һоқуқчиларға мәхсус доклат һазирлатқузуш, һәрқайси дөләтләргә шәрқий түркистандики зулумларниң ирқий қирғинчилиқ икәнликини етирап қилғузуш, мәтбуатларни бу хусуста техиму қозғаш, уйғур сот коллегийәсигә күчни мәркәзләштүрүш, магнитиский қанунини явропа дөләтлиридә йолға қойдурушқа тиришиш, дунядики мәшһур сиясәтчиләр, дипломатларни уйғур дәвасиниң ичигә елип кириш, һәрқайси дөләтләргә хитайға қарши техиму көп қарарларни алдуруш қатарлиқларни өз ичигә алған.

Д у қ муавин рәиси пәрһат муһәммиди әпәнди бу һәқтә тохталғанда, 5 саәттин артуқ давам қилған бу йиғинниң мувәппәқийәтлик өткәнликини әскәртти. Йиғинда д у қ рәислик қатлимидикиләр, иҗраийә комитети тәркибидики һәрқайси бөлүмләрниң мудирлири, қурултайниң мәслиһәтчилири, тәптишлириму өзлириниң пикирлирини баян қилип өткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.