Д у қ уйғур дәвасини 2025-йилиму хәлқара күнтәртиптә тутуп турушниң конкрет тәдбирлирини музакирә қилди
2025.01.13
8-январдин 12-январғичә германийәниң мюнхен шәһиридики дуня уйғур қурултийиниң баш мәркизидә д у қ кәспий хадимлириниң 2025-йиллиқ хизмәт пиланлирини музакирә қилиш йиғини болуп өтти. Йиғинға д у қ ниң мәркәздики хадимлири вә һәрқайси әлләрдики ишханилириниң мудирлири қатнашти.
Йиғинға риясәтчилик қилған д у қ рәиси турғунҗан алавудун әпәнди бу хусуста тохталғанда, алди билән бу йиғинниң әһмийәтлик болған тәрәплирини тилға елип, 2025-йили уйғур дәвасини ялғуз ғәрб демократик әллиридила әмәс, бәлки түрк вә ислам дунясидиму техиму кәң хәлқаралаштурушниң чарә-тәдбирлириниң әтраплиқ музакирә қилинғанлиқини тәкитләп өтти. У сөзидә йәнә, мәзкур йиғинда муһаҗирәттики уйғур миллий һәрикитиниң бир бөлүк яш избасарлирини бир ариға җәм қилиш вә уларни тәрбийәләшкә алаһидә әҗир сәрп қилиш тоғрисидиму пилан пирограммилар түзүлгәнликини әскәртти.
Д у қ ниң муавин рәиси зумрәтай әркинму бу йиғин тоғрисида қарашлирини ипадә қилип, 2025-йилиниң йәнә уруш малиманчилиқи билән башланғанлиқини, бу сәвәбтин уйғур дәвасини хәлқарада күнтәртиптә тутуп турушниң қейинға тохтайдиғанлиқини, буниң үчүн д у қ ниң инчикә пиланларни түзүп, техиму көп тиришчанлиқлар көрситишигә тоғра келидиғанлиқини вә бу қетимқи кәспий хадимлар йиғининиң мушу мәқсәттә чақирилғанлиқини баян қилди.
Д у қ учур ахбарат мәркизиниң мудири, д у қ ниң әрәб тилидики баянатчиси иптихар тәңриқутниң билдүрүшичә, бу қетимқи йиғинда д у қ кәспий хадимлириниң 2024-йиллиқ хизмәтлиридин хуласә чиқирилған вә 2025-йиллиқ хизмәт тәқсимати орунлаштурулған. Д у қ һәр йилиниң бешида кәспий хизмәтчиләрниң йиғинини чақирип кәлмәктә икән. У сөзидә, өзи мәсул болған д у қ учур ахбарат мәркизиниң тәшвиқатлирини көп хил тилда техиму күчлүк қанат яйдуруш тоғрисидиму пиланлар түзүлгәнликини тилға алди.