Dunya éghirliq kötürüsh musabiqiside Uyghur yigitimu chémpiyon boldi

Ixtiyariy muxbirimiz oyghan
2021.11.11
Share on WhatsApp
Share on WhatsApp
Dunya éghirliq kötürüsh musabiqiside Uyghur yigitimu chémpiyon boldi Litwada bolup ötken éghirliq kötürüsh boyiche dunya musabiqiside 93 kilogram salmaqliqta éghirliq kötürüsh boyiche chémpiyon bolghan Uyghur yigiti ablimit ilyaxunof. 2021-Yili noyabir.
RFA/Oyghan

Qazaqistanliq Uyghurlarning tenheriketning herxil türliri boyiche dunya musabiqilirige qatniship, chémpiyon atiqigha ige boluwatqanliqi melum. Dunya ammiwi axbarat wasitilirining xewerlirige qarighanda, litwa paytexti wilnyus shehiride ten-heriketning az uchraydighan türi “Pawurlifting”, yeni “Éghirliq kötürüsh” dunya musabiqisi bolup ötken. 21-Öktebirdin 31-öktebirgiche bolghan ariliqta ötken mezkur musabiqige 34 memlikettin 750 tenheriketchi qatnashqan. Musabiqe üch yönilishte, yeni er kishi we ayal kishiler, yashlar we ösmürler arisida bolghan. Xewerlerdin melum bolushiche, musabiqe xelq'ara éghirliq kötürüsh birleshmisining qa'idiliri boyiche ötkeniken.

Biz ene shu litwada bolup ötken éghirliq kötürüsh boyiche dunya musabiqiside 93 kilogram salmaqliqta tunji qétim Uyghur yigiti ablimit ilyaxunofni chémpiyon boldi.

Litwada bolup ötken éghirliq kötürüsh boyiche dunya musabiqiside 93 kilogram salmaqliqta éghirliq kötürüsh boyiche chémpiyon bolghan Uyghur yigiti ablimit ilyaxunof. 2021-Yili noyabir.

Ablimit ilyaxunof radiyomiz ziyaritini qobul qilip, mezkur musabiqige qazaqistanning her xil sheher we wilayetliridin bolup 70 tin oshuq tenheriketchi qatniship, yaxshi körsetküchlerge ige bolghanliqini otturigha qoyup, mundaq dédi: “Teyyarliq, elwette, yénik mangmidi. Künige nechche qétim meshiqlenduq. Hetta a'ililirimizge qaraydighan waqit bolmay ketti. Ten jarahetlirimu boldi. Bezide psixologiyelik, meniwi bésimmu boldi. Lékin shuninggha qarimay, biz teyyarliqni toxtatmiduq we musabiqige üstün keypiyatta kelduq. Litwada ötken musabiqidin men qattiq rohlandim. Uninggha qatniship, yaxshi körsetküchlerge ige bolghan bashqa Uyghur balilirimu boldi. Méning emdiki meqsitim grék-rimche chélishishi we pa'u'érlifting ( éghirliq kötürüsh) boyiche balilarni kéyinki bolidighan xelq'ara musabiqilerge, shundaqla olimpik musabiqilirige teyyarlash. 2022-Yili almuta shehiride ötidighan pa'u'érlifting, yeni éghirliq kötürüsh dunya musabiqisige shagirtlirim bilen qatniship, aldinqi orunlarni élip, qazaqistanning we xelqimizning abruyini kötürüsh oyimiz bar. Men xelqimiz wekillirining shundaq musabiqilerge qatniship, chong utuqlargha érishkenlikidin pexirlinimen. Chünki Uyghurlar ichidimu intayin köp talantliq tenheriketchiler bar”.

Ablimit ilyaxunofning éytishiche, u 1980-yili almuta shehiride dunyagha kélip, sheherdiki 93-rus mektipini tamamlighaniken. 2001-Yili edliye akadémiyesini püttürüp, öz kespi boyiche xizmet qilghan. U 9 yéshidin grék-rimche chélishishi boyiche shughullan'ghan. Ablimit ilyaxunof 14 yéshida, yeni 1995-yili grék-rimche chélishishi boyiche ösmürler arisida qazaqistan chémpiyoni boldi. Andin u 14-15 yashliridin tartip shtanka kötürüsh boyiche shughullan'ghan. 2009-Yildin bashlap grék-rimche chélishish trénéri bolup ishligen. Andin u qazaq tenheriket we sayahetchilik akadémiyeside sirttin oqup, uni muweppeqiyetlik tamamlighan we “Oqutquchi trénér” mutexessislik unwani alghan. Ablimit ilyaxunof yétip turup shtanka kötürüsh boyiche sheherlik we jumhuriyetlik musabiqilerge qatniship, 1-orun'gha érishken. Hazir u almuta shehiride grék-rimche chélishishi we éghirliq kötürüsh boyiche ösmür we yashlargha ustazliq qilmaqta.

Radiyomiz ziyaritini qobul qilghan meshiq zalining bashliqi, trénér rustem aysayéf ependi mundaq dédi: “Ablimit trénér süpitide peqet jismaniy meshiqla emes, belki yashlar arisida terbiye ishlirinimu élip bériwatidu. U pat-pat öz shagirtlirini her xil seperlerge, yürüshlerge élip mangidu. Emdi bu qétimqi musabiqige u heqiqetenmu qattiq teyyarlandi. Köp éghirchiliqlar boldi. Emma shundaqtimu özining xaraktérining mustehkem bolushi sewebidin mushundaq utuqlargha yetti. Bu teripidin u bashqilardin perqlinip turidu. Da'im közligen meqsitige yétishke tirishidu hem bashqilarnimu shuninggha ündeydu. Insan süpitide éytsam, u intayin méhriban, dilkesh adem”.

Igilishimizche, qazaqistanliq tenheriketchiler ichidin chiqqan abduréshit abduraxmanof, zakir toxtiyéf, hémit toxtaxunof, ghopur toxtiyéf qatarliq dunya chémpiyonliri bolghan dangliq tenheriketchilerning izini bésip kéliwatqan yash-ösmürlermu yaz emesken. Shulardin, mesilen, nariman qurbanof, dilmurat mijitof qatarliqlardin Uyghurlar köp ümidlerni kütidiken.

Ijtima'iy taratqulardin melum bolushiche, yéqinda ereb birleshme xelipilikining ebu-zebi shehiride bolup ötken braziliyeche jyu-jitsu, yeni erkin chélishish we mushtlishish boyiche dunya musabiqiside ösmürler arisida 17 yashliq Uyghur yigiti bextiyar qehriman 66 kilogram salmaqliqta chémpiyon bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.