Chet'ellik yashlarning “Ekber esetke erkinlik” herikiti zor tesir qozghimaqta

Uyghurlarning eng chong ijtima'iy munazire we tartqu tor békiti bolghan “Baghdash tori” ning qurghuchisi ekber eset xitay da'iriliri teripidin 15 yilliq késiwétilgen idi.

Amérikada adwokatliq kespi bilen shughullinidighan ekberning achisi reyhan eset xanim bir qanche yildin buyan qérindishini qutuldurush üchün xelq'arada yuqiri sewiyilik teshwiqat herikiti teshkillep kelmekte.

Yéqinda reyhan eset en'giliyide yash pa'aliyetchilerni teshkillep “Ekberge erkinlik” nami astida nyu-york we londonda namayish pa'aliyiti teshkilligen. En'gliyelik we amérikaliq yashlar muhim rol oynighan mezkur pa'aliyette, yashlar ekber eset we ekberge oxshash naheq tutulghan Uyghurlargha erkinlik telep qilghan. Mezkur yashlar yene ekber esetke erkinlik telep qilghan widi'o we süretlik teshwiqatlar arqiliq ijtima'iy tartqu wastilirida keng kölemlik teshwiqat herikiti qozghighan.

Yillardin buyan qérindishi ekber esetning erkinliki üchün küresh qilip kéliwatqan reyhan es'et xanim ziyaritimizni qubul qilip, mezkur pa'aliyetning qirghinchiliq we kemsitish bolmighan bir dunyada yashashni arzu qilidighan yash balilarning pa'aliyiti ikenlikini, ularning inisi ekber esetning hékayisidin intayin tesirlen'genlikini éytti.

“Ekberge erkinlik” herikitining yash mes'ulliridin Jonathan Gilbert ziyaritimizni qubul qilip mezkur pa'aliyetning intayin ghelibilik ayaqlashqanliqini, bundin kiyinki pa'aliyetler üchün yingi pikirlerning barliqini éytti.

“Zimistan” torining xewer qilishiche, a'ilisi xitay hökümitining ziyankeshlikige uchrighan en'gliyilik Uyghur yash dilnaz kérim mezkur pa'aliyetning teshwiqati üchün muhim rol oynighan. Dilnaz kérem axbarat wasitilirining ziyaritini qubul qilip, en'gliye hökümitidin Uyghurlarning yoqap kétiwatqan a'ile ezalirining ehwaligha jiddiy qarishini telep qilghan

Ötken hepte reyhan esetning yéteklishidiki yashlar gurupisi en'gliyidiki Downing kochisida namayish qilghan. En'gliyilik yashlar en'gliye tashqiy ishlar ministiri dominik rab bilen körüshüshni we yoqap ketken a'ile ezalirini tépish üchün yardem bérishini telep qilghan. 18 Yashliq Uyghur qiz dilnaz kirimning yoqap ketken a'ile ezaliri heqqidiki murajiti en'gliyining dangliq axbarat qanili BBC da tarqitilghan bolup, ijtima'iy tartqu wastillirida chong tesir qozghighan.

Dilnaz kerim ziyaritimizni qubul qilip, mezkur pa'aliyet arqiliq nurghun chet'ellik yashlarning Uyghurlarning nöwettiki ehwali heqqide etrapliq melumat alghanliqini éytti.

Xitay hökümitining Uyghur élidiki qirghinchiliq siyasetliri seweblik muhajirettiki nurghun Uyghurlar uruq-tughqanliridin ayrilip qalghan. Xitay hökümitining ziyankeshlikige uchrap, a'ililiri parchilan'ghan Uyghurlar her xil pa'aliyetler arqiliq xelq'ara jem'iyetning diqqitini Uyghur mesilisige tartish üchün tirishchanliq körsitip kelmekte.