Өй-мүлүк содигири әкбәр иминниң қериндаш вә шериклиридин 30 нәччә кишиниң тутқунда икәнлики дәлилләнди

Мухбиримиз шөһрәт һошур
2020-01-21
Елхәт
Пикир
Share
Принт
Байлиқ җәһәттә хотәндә алдинқи қатардики кишиләрдин санилидиған «гүзәл макан өй-мүлүк ширкити» ниң директори әкбәр иминиң паспорти. Хотән(вақти ениқ әмәс)
Байлиқ җәһәттә хотәндә алдинқи қатардики кишиләрдин санилидиған «гүзәл макан өй-мүлүк ширкити» ниң директори әкбәр иминиң паспорти. Хотән(вақти ениқ әмәс)
RFA/Shöhret Hoshur

Хотәндики мәшһур өй‏-мүлүк содигири әкбәр имин билән бирликтә униң қериндашлири, шериклири вә ишчи-хизмәтчилири болуп 30 нәччә кишиниң тутқунда икәнлики вәзийәттин хәвәрдар киши тәрипидин мәлум қилинған иди. Мухбиримизниң бу һәқтә илгириләп елип барған ениқлашлири давамида әкбәр иминниң акиси мәмәттурди имин вә иниси мәмәтҗан иминниң 20 йиллиқтин кесилгәнлики, булардин башқа шериклири вә ишчи-хизмәтчилири болуп җәмий 30 нәччә кишиниң тутқунда икәнлики айдиңлашти.

Вәзийәттин хәвәрдар киши өй-мүлүк содигири әкбәр иминниң хотәндики алдинқи қатардики байлардин бири болуш сүпити билән хотәндә нәччә йүзлигән кишини иш билән тәминлигәнлики, у тутқун қилинғанда униң билән һәр хил саһәдә һәмкарлашқан қериндашлири, шериклири, ишчи-хизмәтчилири болуп, 30дин артуқ кишиниң илгири-кейин тутулғанлиқи вә һазирғичә из-дерики йоқлуқини мәлум қилған иди.

Тор архиплирини ахтурғинимизда әкбәр иминниң «гүзәл макан» өй-мүлүк ширкитидин башқа «хотән ақташ пахта тоқумичилиқ ширкити» намидиму бир ширкити барлиқи, бу ширкәтниң бир милйон бәш йүзмиң йүән мәблиғи барлиқи, бу икки ширкәткә акиси мәмәттурди имин, иниси мәмәтҗан имин вә оғли әнвәрҗан әкбәрләрниң шерик икәнлики қәйт қилинған.

Тордики йәнә бир материялда әкбәр иминниң иниси мәмәтҗан иминниң бир қурулуш материяллири ширкити барлиқи, бу ширкәткә қериндашлиридин башқа розиммәмәт қасим, патигүл қасим, аблиз абдурахман, долқун сираҗидин, мәмтили қадир, абләт абдушүкүр вә өмәр нур қатарлиқ шериклириму барлиқи хатириләнгән.

Торда 2019-йили 7‏-айда елан қилинған бир материялда «гүзәл макан» өй-мүлүк ширкитиниң нөвәттә әкбәр иминниң оғли әнвәрҗан әкбәрниң намида қануний тизимда икәнлики вә ширкәтниң әнвәрҗан әкбәр тәрипидин маңдурулуватқанлиқи баян қилинған. Әмма ениқлашлиримиз давамида әкбәр иминниң қериндашлири вә шериклиридин һечбириниң нормал тиҗарәт қиливатқанлиқи яки һаят кәчүрүватқанлиқи һәққидә учур елинмиди. Әксичә алақидар сот хадимлиридин бири әкбәр иминниң сотланған икки қериндиши барлиқини тилға алса, йәнә бир хадим әкбәр иминниң қериндашлири вә шериклири болуп 7 кишиниң кесиветилгәнликини вә уларниң нөвәттә ақсудики бир җаза лагерида икәнликини ашкарилиди.

Бир сақчи хадими мәмәттурди имин билән мәмәтҗан иминниң 20 йиллиқтин кесилгәнликини баян қилған болсиму, әмма кесиветилгән шериклири арисида юқирида исми тилға елинған кишиләрниң бар-йоқлуқи һәққидә мәлумат берәлмиди. Йәнә бир хадим әкбәр иминниң тутқун қилинған бир қисим ишчи-хизмәтчилириниң исимлики һәққидә мәлумат бәргән болсиму, әмма уларниң йил кесими һәққидә мәлумат берәлмиди.

Хотән шәһәр илчи йезисидики бир кәнт секретари өз кәнтидин икки кишиниң әкбәр имин делосиға четилип 7 йиллиқтин кесилгәнлики вә 2018-йилиниң ахирида ечилған сотта мәзкур делоға четишлиқ 30 нәччә киши үстидин һөкүм чиққанлиқини баян қилди.

Вәзийәттин хәвәрдар киши әкбәр иминниң тутқун қилинишиға, өй-мүлүк содигири әли абдулла билән бирликтә кимашти содисида риқабәткә чүшүп бир хитай содигәрни пассип һалға чүшүрүп қойғанлиқи, хотән шәһәр ичидики муһим бир орундин земин сетивалмақчи болған мәзкур хитай содигәрниң вилайәттики әмәлдар хитайлардин пайдилинип туруп әли абдулла билән әкбәр иминни уҗуқтурғанлиқини илгири сүргән иди.

Ениқлашлиримиз давамида делониң бу қисмиға алақидар учур айдиңлашмиди. Хотәндә сиясий-қанун саһәсидә хизмәт қилған бир хадим әкбәр иминниң тутулушида аз дегәндә 5 хил сәвәб барлиқини, булардин бири у бина қилған «бәхт» олтурақ райониниң моделида мәсчит, яшанғанлар санаторийәси вә тәнтәрбийә зали барлиқи, булар ниң һәммиси миллий пасонда лайиһәләнгәнклики үчүн әкбәр иминниң «диний әсәбийликни тәрғиб қилишқа урунуш» билән әйибләнгәнликини ашкарилиди.

Хотәнниң илчидики бир кәнт секретари әкбәр иминниң акиси мәмәттурди иминниң бир сиясий мәһбус аилисигә һәқсиз өй тәқдим қилғанлиқи үчүн «җинайәтчини қанат астиға елиш» билән әйибләнгәнкликини ашкарилиди.

Хотән вәзийитидин хәвәрдар кишиләрдин йәнә бири әкбәр имин вә қериндашлириниң асаслиқ қаш теши содиси билән қәд көтүргәнлики, хитай даирилириниң йеқинқи йиллардин буян хотәндики қаштеши содисини аталмиш «‹үч хил күч' ләрниң асаслиқ кирим мәнбәси» дәп қараватқанлиқи, шу вәҗидинла хотәндики ғоллуқ сода-карханичиларға2015 ‏-йилдин башлапла зәрбә беришкә башлиғанлиқи, әкбәр имин вә шериклириниң әнә ашу дөләт суйиқәстиниң қурбани икәнликини илгири сүрди.

Пикирләр (0)
Share
Толуқ бәт