Қаштеши тиҗаритиниң сәркиси, тонулған карханичи әли абдулла (хораз) ниң муддәтсиз кесилгәнлики дәлилләнди

Мухбиримиз шөһрәт һошур
2019.12.20
Share on WhatsApp
Share on WhatsApp
Eli-Abdulla-02.jpg Муддәтсиз кесилгән қаштеши тиҗаритиниң сәркиси, тонулған карханичи ели абдулла.
Social Media

Хотән хәлқиниң йоқсуллуқтин егилгән белиниң бир мәһәл болсиму түзлинишигә түрткә болған қаштеши содиси саһәсидики тонулған сәркә, җәмийәттә “әли хораз” дегән нам билән тонулған иқтидарлиқ карханичи, “шинҗаң қаштеши өй‏-мүлүк ширкити” ниң баш директори, хотән шәһәр ичидики “кәчлик базар” қатарлиқ бирқанчә орундики катта муқим мүлүкләрниң саһиби әли абдулланиң муддәтсиз қамаққа кесиветилгәнлики дәлилләнди.

Содида базарни мөлчәрләштики өткүрлики, хәтәргә тәвәккүл қилиштики җасарити, һәр саһә кишилири билән мунасивәт қилиштики маһирлиқи билән җәмийәткә кәң тонулған вә қаштеши содисида пәвқуладдә утуқ қазанған әли абдулланиң тутқун қилиниши2016 ‏-йилниң оттура-ахирлири җәмийәт хәвәрлиридә наһайити тез вә кәң түрдә тарқалған иди. Әмма2017 ‏-йилдин кейинки җиддий вәзийәт сәвәблик әли абдулланиң ақивити һәққидә һечқандақ учур болмиған. Бу һәқтә елип барған бир қатар ениқлашлиримизму асасән дегүдәк нәтиҗисиз қалған иди.

Вәзийәттин хәвәрдар кишиләрдин бири 3 ай аввал радийомизға бир язма учур йоллап, әли абдулланиң муддәтсизлик кесиветиликини мәлум қилди вә учурниң пакити сүпитидә әли абдулла үстидин чиқирилған бир сот һөкүмнамисиниң копийәсини йоллап бәрди. Телефонимизни қобул қилған алақидар хадимлар әли абдулла һәққидә сөз қилиштин өзлирини тартти. 

Мәзкур сот һөкүмнамисидә әли абдулланиң қанунисз кан ечиш қатарлиқ 4 хил җинайәт билән әйиблинип, муддәтсиз кесиветилгәнлики қәйт қилинған. Хотән вилайәтлик оттура хәлқ сот мәһкимисиниң бир хадими әли абдулла делоси һәққидә гәп қилишни рәт қилди, әмма делониң йүз бәргәнликини инкар қилмиди. 

Хитайчә тор архиплирида тонуштурулишичә, әли абдулла баш дерикторлиқидики “шинҗаң қаштеши өй‏-мөлүк ширкити” 2004 ‏-йили2 ‏-айниң24 ‏-күни әнгә алдурулған. Ширкәтниң үрүмчи шәһири тәңритағ райони йәнән йоли 10‏-номурлуқ қорода ишханиси болған. Биз мәзкур тонуштурушта қәйт қилинған телефон номури бойичә бу ширкәткә телефон қилғинимизда телефонни қобул қилғучи телефонниң хата урулғанлиқини баян қилди. Әмма өзлириниң қайсий орун икәнликиниму билдүрүшни рәт қилди. 
Хитайчә тор архиплиридики мәзкур тонуштурушта “шинҗяң қаштеши өй-мүлүк ширкити” ниң2004 ‏-йили қурулғанда 8 милйон йүән мәблиғи барлиқи тилға елинған. Хотән шәһәрлик базар башқурушидарисиниң бир хадими әли абдуллаға аит бир сода базири барлиқини билидиғанлиқи, әмма униң тәқдири һәққидә мәлумати йоқлуқини ейтти. Биз алақидар органлар тәминлигән алақә учуриға асасән хотән вилайитидә сиясий-қанун саһәсидә хизмәт қиливатқан бир хадимдин мәлумат соридуқ. У бир қетимлиқ хизмәт сәпиридә әли абдулла билән учрашқанлиқини баян қилиш билән бирликтә униң тиклигән игилики һәққидиму мәлумат бәрди. Әли абдулла делосиниң сиясий-қанун саһәси ичидиму мәхпий тутулғанлиқини илгири сүргән бу хадим пәқәт хизмәтдашлиридин аңлиғанлириға асасән униң тутулғанлиқ вә кесилгәнлик учурини дәлиллиди. 

Ахирида телефонимизни қобул қилған хотән шәһәрлик хәлқ сот мәһкимисиниң бир хадими әли абдулланиң муддәтсиз кесилгәнликини дәлиллиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.