Qashtéshi tijaritining serkisi, tonulghan karxanichi eli abdulla (xoraz) ning muddetsiz késilgenliki delillendi

Muxbirimiz shöhret hoshur
2019-12-20
Share
Eli-Abdulla-02.jpg Muddetsiz késilgen qashtéshi tijaritining serkisi, tonulghan karxanichi éli abdulla.
Social Media

Xoten xelqining yoqsulluqtin égilgen bélining bir mehel bolsimu tüzlinishige türtke bolghan qashtéshi sodisi sahesidiki tonulghan serke, jem'iyette "Eli xoraz" dégen nam bilen tonulghan iqtidarliq karxanichi, "Shinjang qashtéshi öy‏-mülük shirkiti" ning bash diréktori, xoten sheher ichidiki "Kechlik bazar" qatarliq birqanche orundiki katta muqim mülüklerning sahibi eli abdullaning muddetsiz qamaqqa késiwétilgenliki delillendi.

Sodida bazarni mölcherleshtiki ötkürliki, xeterge tewekkül qilishtiki jasariti, her sahe kishiliri bilen munasiwet qilishtiki mahirliqi bilen jem'iyetke keng tonulghan we qashtéshi sodisida pewqul'adde utuq qazan'ghan eli abdullaning tutqun qilinishi2016 ‏-yilning ottura-axirliri jem'iyet xewerliride nahayiti téz we keng türde tarqalghan idi. Emma2017 ‏-yildin kéyinki jiddiy weziyet seweblik eli abdullaning aqiwiti heqqide héchqandaq uchur bolmighan. Bu heqte élip barghan bir qatar éniqlashlirimizmu asasen dégüdek netijisiz qalghan idi.

Weziyettin xewerdar kishilerdin biri 3 ay awwal radiyomizgha bir yazma uchur yollap, eli abdullaning muddetsizlik késiwétilikini melum qildi we uchurning pakiti süpitide eli abdulla üstidin chiqirilghan bir sot hökümnamisining kopiyesini yollap berdi. Téléfonimizni qobul qilghan alaqidar xadimlar eli abdulla heqqide söz qilishtin özlirini tartti. 

Mezkur sot hökümnamiside eli abdullaning qanunisz kan échish qatarliq 4 xil jinayet bilen eyiblinip, muddetsiz késiwétilgenliki qeyt qilin'ghan. Xoten wilayetlik ottura xelq sot mehkimisining bir xadimi eli abdulla délosi heqqide gep qilishni ret qildi, emma déloning yüz bergenlikini inkar qilmidi. 

Xitayche tor arxiplirida tonushturulishiche, eli abdulla bash dériktorliqidiki "Shinjang qashtéshi öy‏-mölük shirkiti" 2004 ‏-yili2 ‏-ayning24 ‏-küni en'ge aldurulghan. Shirketning ürümchi shehiri tengritagh rayoni yen'en yoli 10‏-nomurluq qoroda ishxanisi bolghan. Biz mezkur tonushturushta qeyt qilin'ghan téléfon nomuri boyiche bu shirketke téléfon qilghinimizda téléfonni qobul qilghuchi téléfonning xata urulghanliqini bayan qildi. Emma özlirining qaysiy orun ikenlikinimu bildürüshni ret qildi. 
Xitayche tor arxipliridiki mezkur tonushturushta "Shinjyang qashtéshi öy-mülük shirkiti" ning2004 ‏-yili qurulghanda 8 milyon yüen meblighi barliqi tilgha élin'ghan. Xoten sheherlik bazar bashqurush'idarisining bir xadimi eli abdullagha a'it bir soda baziri barliqini bilidighanliqi, emma uning teqdiri heqqide melumati yoqluqini éytti. Biz alaqidar organlar teminligen alaqe uchurigha asasen xoten wilayitide siyasiy-qanun saheside xizmet qiliwatqan bir xadimdin melumat soriduq. U bir qétimliq xizmet sepiride eli abdulla bilen uchrashqanliqini bayan qilish bilen birlikte uning tikligen igiliki heqqidimu melumat berdi. Eli abdulla délosining siyasiy-qanun sahesi ichidimu mexpiy tutulghanliqini ilgiri sürgen bu xadim peqet xizmetdashliridin anglighanlirigha asasen uning tutulghanliq we késilgenlik uchurini delillidi. 

Axirida téléfonimizni qobul qilghan xoten sheherlik xelq sot mehkimisining bir xadimi eli abdullaning muddetsiz késilgenlikini delillidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet