Әнгилийә юқири палатасида уйғур мәҗбурий әмгикини мәбләғ билән тәминләватқан ширкәтләр һәққидики доклат аңлап өтүлгән

Мухбиримиз нуриман
2022.11.23
engliye-yuqiri-parlamenti-1.jpg Хоңкоң көзитиш тәшкилати әнглийә юқири палатасида өткүзгән “инсанийәткә қарши җинайәтләрни мәбләғ билән тәминләш: сизниң йиғқан пуллириңиз хитайдики җаза лагерлири вә мәҗбурий әмгәкни мәбләғ билән тәминлиши мумкин” сәрләвһилик доклатни елан қилиш йиғинидин көрүнүш. 2022-Йили 22-ноябир.
Photo: RFA

22-Ноябир күни хоңкоң көзитиш тәшкилати әнгилийә юқири палатасида “инсанийәткә қарши җинайәтләрни мәбләғ билән тәминләш: сизниң йиғқан пуллириңиз хитайдики җаза лагерлири вә мәҗбурий әмгәкни мәбләғ билән тәминлиши мумкин” сәрләвһилик доклатни елан қилиш йиғини өткүзгән.

Мәзкур доклат елан қилиш йиғинға әнгилийә юқири палата әзаси лорд алтон риясәтчилик қилған. Йиғин җәрянида доклатниң икки нәпәр қәләм тәврәткүчиси, йәни шефилд халлам университети һелена кенниде хәлқара әдлийә мәркизиниң кишилик һоқуқ вә заманиви қуллуқ саһәсидики профессори лавра мерфий ханим билән хоңкоң көзитиш тәшкилатниң қурғучилиридин бири болған тәтқиқатчи җонний паттерсон иккәйлән мәзкур доклатниң тәпсилатини аңлатқан.

Доклатқа асасланғанда, әнгилийәдики 11 йәрлик күтүнүш фондиниң пули уйғур мәҗбурий әмгикигә вә йеғивелиш лагерлириға четишлиқи болған аз дегәндә 13 хитай ширкитигә мәбләғ селинған. Доклатта тилға елинған 11 йәрлик күтүнүш фонди 4 район характерлик яшанғанда күтүнүш пиланини өз ичигә алған йәрлик һөкүмәт тармақлиридики ишчи-хизмәтчиләрниң яшанғанда күтүнүш пули болуп, бу пулларниң мәҗбурий әмгәк вә инсанийәткә қарши җинайәтләргә четишлиқи болған ширкәтләргә мәбләғ силинғанлиқи ашкариланған.

Хоңкоң көзитиш тәшкилати әнглийә юқири палатасида өткүзгән “инсанийәткә қарши җинайәтләрни мәбләғ билән тәминләш: сизниң йиғқан пуллириңиз хитайдики җаза лагерлири вә мәҗбурий әмгәкни мәбләғ билән тәминлиши мумкин” сәрләвһилик доклатни елан қилиш йиғинидин көрүнүш. 2022-Йили 22-ноябир.

Җонний паттерсон мәзкур доклат һәққидә радийомизниң зияритини елхәт арқилиқ қобул қилди. У хетидә мундақ дәп язған: “дунядики нурғунлиған алдинқи қатардики мүлүк башқурғучиларниң кәм дегәндә 13 ширкәттә пейи бар. У ширкәтләрниң бәзилири мәҗбурий әмгәккә четишлиқ ширкәтләр, бәзилири болса шинҗаңдики юқири дәриҗилик назарәт системисиға четишлиқ болған ширкәтләр. Буни қобул қилишқа болмайду. Кархана рәһбәрлири кишилик һоқуққа техиму әстайидил муамилә қилиши, биз ениқлиған ширкәтләрни уларниң мәбләш селиш тизимликидин чиқириветиши керәк. Һөкүмәт мәсилә бар ширкәтләрни пәрқләндүридиған бир қара тизимлик турғузуп чеқиши вә мәбләғ салғучиларниң кишилик һоқуқ мәҗбурийитини ада қилишта еришишкә тигишлик барлиқ учурларға игә болушиға капаләтлик қилиши керәк”.

Мәзкур йиғинға әнгилийә әмгәк партийәсиниң вәкили афзал хан (Afzal Khan), уйғур районидики мәҗбурий әмгәкни ахирлаштуруш бирләшмисиниң башламчиси патирисия карийир (Patricia Carrier) вә дуня уйғур қурултийи лондон ишханисиниң мудири рәһимә мәһмут қатарлиқларму қатнашқан. Улар айрим-айрим сөз қилип, паалийәтчиләр, мәбләғ салғучилар вә парламент әзалириниң мәзкур доклаттики пакитларға асасән немиләрни қилалайдиғанлиқи үстидә тохталған.

Рәһимә мәһмут ханим бу һәқтә радийомизнң мәхсус зияритини қобул қилди. У мәзкур йиғинниң мәҗбурий әмгәк мәсилиси һәққидики наһайити муһим бир қетимлиқ йиғин болғанлиқини тәкитлиди.

Җонний паттерсон уларниң мәзкур йиңи доклатни илан қилиштики мәқсити һәққидә тохтилип, мундақ дәп язған: “бизниң мәқситимиз хәлқара пул-муамилә органлириниң уйғур районидики кишилик һоқуқ дәпсәндичиликигә йетәрлик дәриҗидә әһмийәт бәрмигәнликини ашкарилаштур”.

Мәзкур доклатта мәҗбурий әмгәккә вә йиғивелиш лагерлириға четишлиқ икәнлики ишәнчилик пакитлар билән дәлилләнгән 13 ширкәтниң тизимлики бирилгән. Америкадики дөләт һалқиған мәбләғ башқуруш вә пул-муамилә мулазимәт ширкити-морган стәнлейниң уйғур мәҗбурий әмгикигә вә йиғивелиш лагерлириға четишлиқ икәнлики ениқ болған хитай ширкәтлиридә пейи барлиқини байқиған.

Мәзкур доклатта әнгилийә, америка вә башқа дөләтләрдики мәбләғ салған ширкәтләр вә хитайдики мәҗбурий әмгәккә, йиғивелиш лагерлириға четишлиқ икәнлики ишәнчилик пакитлар билән дәлилләнгән ширкәтләр һәққидә наһайити тәпслий учурлар берилгән. Доклатта оттуриға қоюлған мәзмунлар һәққидә кейинки пирограммизда тәпсилий тохтилимиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.