Әнқәрәдики америка әлчиханисиниң саһибханилиқида икки паалийәт өткүзүлди

Ихтиярий мухбиримиз әркин тарим
2019-09-12
Елхәт
Пикир
Share
Принт
Әнқәрәдики америка әлчиханисиниң саһибханилиқида америка култур(мәдәнийәт) мәркизидә өткүзүлгән йиғиндин көрүнүш. 2019-Йили 10-сентәбир, әнқәрә.
Әнқәрәдики америка әлчиханисиниң саһибханилиқида америка култур(мәдәнийәт) мәркизидә өткүзүлгән йиғиндин көрүнүш. 2019-Йили 10-сентәбир, әнқәрә.
RFA/Erkin Tarim

Әнқәрәдики америка әлчиханисиниң саһибханилиқида икки паалийәт өткүзүлди. Америка қошма штатлири ташқи ишлар министирлиқиниң орунлаштуруши вә америка қошма штатлириниң әнқәрәдә турушлуқ әлчиханисиниң саһибханилиқида 9-айниң 10-күни әтигән саәт 9 дин 12 ғичә әнқәрәдики америка мәдәнийәт мәркизидә өткүзүлгән йиғинға америка, әнглийә, йеңи зеландийә вә австралийә қатарлиқ дөләтләрниң әнқәрәдә турушлуқ әлчиханисиниң дипломатлири, әнқәрәдики уйғур җамаитидин болуп 30 әтрапида киши иштирак қилған. Йиғинға тәклип бойичә әнқәрәгә келип иштирак қилған «уйғур һәрикити» тәшкилати рәиси рошән аббас ханим бу һәқтә мәлумат берип мундақ деди: «америка қошма штатлири ташқи ишлар министирлиқиниң орунлаштуруши америка қошма штатлириниң әнқәрәдә турушлуқ әлчиханисиниң саһибханилиқида әнқәрәдә дүшәнбә вә сәйшәнбә күнлири 2 күн паалийәткә қатнаштуқ. Дүшәнбә күни америка әлчиханисида учришишлар болди. Бир қанчә ахбарат оргининиң зияритини қобул қилдуқ. Уйғурлар тоғрисида мәтбуатларға мәлумат бәрдуқ».

Иккинчи күни әнқәрәдики америка култур(мәдәнийәт) мәркизидә өткүзүлгән йиғинға «уйғур һәрикити» рәиси рошән аббас ханим, дуня уйғур қурултийи баш мәслиһәтчиси ришат аббас әпәнди, дуня уйғур қурултийи муавин рәиси әркин әкрәм әпәнди вә баш тәптиш абликим идрис әпәнди һәм әнқәрәдики уйғурлар иштирак қилған. Рошән аббас ханим мәзкур йиғинда дипломатлар билән әнқәрәдики уйғур җамаитиниң иштирак қилғанлиқини, әнқәрә уйғурлириниң гуваһлиқ бәргәнликини баян қилип мундақ деди: «иккинчи күни йәни сәйшәнбә күни америкиниң әнқәрәдә турушлуқ әлчиханисиниң хитай ишлириға мәсул мунасивәтлик кишилири билән йиғин чақирилди. У йәрдә шаһитлар җаза лагерлириға, түрмиләргә ташланған ата-анилири, уруқ-туғқанлири тоғрисида гуваһлиқ бәрди».

Чүштин кейин саәт 2дин 4 кечә йәнә америка қошма штатлири әлчиханисиниң саһибханилиқида әнқәрәдики явро-асия тәтқиқат мәркизидә йиғин чақирилған. Йиғинға уйғурлардин сирт түркийәдики тәтқиқат мәркәзлириниң мунасивәтлик мутәхәссислири, бәзи университетларниң профессорлири вә дипломатларму иштирак қилған. Рошән аббас йиғинда хитай билән мунасивәтлик сиясий, иқтисадий вә инсан һәқлири һәққидики мәсилиләр тоғрисида музакирә елип берилғанлиқини баян қилди.

Америка қошма штатлириниң әнқәрәдә турушлуқ әлчиханиси уюштурған уйғурлар тоғрисидики икки паалийәткә уйғур институти мудири доктор әркин әкрәм әпәндиму иштирак қилған вә мунасивәтлик мәсилиләр тоғрисидики өз қаришини баян қилған. У, америка қошма штатлириниң бу йиғинни өткүзүшиниң 2 сәвәби барлиқини баян қилди.

Йеқиндин буян америка қошма штатлириниң әнқәрәдә турушлуқ әлчиханисиниң тор бети вә иҗтимаий таратқулирида изчил һалда уйғур мәсилисигә орун бәрмәктә.

Пикирләр (0)
Share
Толуқ бәт