Türkiye jumhur re'isi erdoghan yehudiy qirghinchiliqini xatirilesh nutqida Uyghurlarni tilgha almidi

Türkiye jumhur re'isi rejep tayyip erdoghanning xelq'araliq “Yehudiy qirghinchiliqi xatire küni” munasiwiti bilen qilghan nutqi tenqidke uchridi.

Türkiye radi'o-téléwiziye idarisi “TRT” da tarqitilghan nutuqta rejep tayyip erdoghan insaniyetning qiyin bir dewrni bashtin kechürüwatqanliqini, hazir dunyada “Irqchiliq wirusi” ningmu wirus yuqumi bille kéngiyiwatqanliqini éytip, dunya buninggha “Toxta” déyishi kérek dédi. Biraq u “Xelq'ara jem'iyet yehudiy qirghinchiliqi, bosniye, riwanda we kambodzhadikidek paji'elerning qaytilanmasliqi üchün heriketke ötüshi kérek” dep chaqiriq qilghan nutqida Uyghurlarni tilgha almidi.

Amérika hökümiti xitayning Uyghurlargha qaritiwatqan zulumini “Irqiy qirghinchiliq” dep jakarlighan we yéngi tashqi ishlar ministiri antoniy bilinkin bu bahagha qoshulidighanliqini qayta – qayta tekitlewatqan bir mezgilde rejep tayyip erdoghanning tunqida Uyghurlargha qiliniwatqan irqiy qirghinchiliqni tilgha almasliqi ijtima'iy taratqularda küchlük tenqidke uchridi.

Türkiye hökümitining Uyghur mesilisidiki pozitsiyesi nöwette hem xelq'ara kishilik hoquq jama'itining hem türkiye ichidiki öktichi partiyelerni narazi qilmaqta.

27-Yanwar küni türkiyediki Uyghur qizi nursiman abduréshit türkiye parlaméntida “Iyi” partiyesining yighinigha qatniship nutuq sözligen idi. Yighin ehwalidin neq meydan tarqitishi qiliwatqan parlamént téléwiziyesining del nursiman abduréshitqa kelgende tarqitishni késiwétishi küchlük naraziliq qozghighanidi. Nurghun közetküchiler bu weqeni nöwettiki adalet we tereqqiyat partiyesi hökümitining Uyghur mesilisige tutuwatqan pozitsiyesining yarqin ipadisi, dep bahalidi.