Әркин әмәтниң қериндашлири үстидики әйибнаминиң чинлиқи вә нурниса әмәтниң кесәлчанлиқи дәлилләнди

Мухбиримиз шөһрәт һошур
2020-08-31
Елхәт
Пикир
Share
Принт
Әркин асия радийосиниң әнқәрәдики ихтияри мухбири әркин таримниң қериндашлиридин (солдин оңға) әнвәр әмәт 11 йиллиқ кесилгән, нурәла әмәт айрим бир тәрәп қилинғанлиқи уқтурулған, нурниса әмәт 14 йиллиқ кесилгән.
Әркин асия радийосиниң әнқәрәдики ихтияри мухбири әркин таримниң қериндашлиридин (солдин оңға) әнвәр әмәт 11 йиллиқ кесилгән, нурәла әмәт айрим бир тәрәп қилинғанлиқи уқтурулған, нурниса әмәт 14 йиллиқ кесилгән.
RFA/Azigh

Әнқәрә университетиниң оқутқучиси доктор әркин әмәтниң 4 қериндиши үстидики әйибнамидә ярқин абләт исимлик бир қарилиғучиниң нами хатириләнгәниди. Мухбиримизниң қәшқәр тәптиш мәһкимисигә қарита елип барған ениқлашлири давамида ярқин абләтниң мәзкур мәһкимидики 40 яшлар чамисидики бир тәптиш хадими икәнлики дәлилләнди, йәнә ениқлашлиримиз давамида, әркин әмәтниң сиңлиси нурниса әмәтниң қамақта кесәлгә муптила болуп, йәкән пәйлу түрмисидин йопурғидики бир түрмигә йөткәлгәнлики айдиңлашти.

Әнқәрә университетиниң оқутқучиси доктор әркин әмәтниң қериндашлири үстидики әйибнамидә әйиблигүчи орунниң шинҗаң уйғур аптоном районлуқ тәптиш мәһкимисиниң қәшқәр шөбиси икәнлики қәйт қилинған. Әйибнамидә әйиблигүчи сүпитидә ярқин абләт исимлик тәптиш хадими тилға елинған. Мәзкур әйибнаминиң чинлиқини дәлилләш үчүн қәшқәр вилайәтлик тәптиш мәһкимисигә телефон қилдуқ вә бу мәһкимидә растинла ярқин абләт исимлик бир хадимниң бар-йоқлуқини сүрүштә қилдуқ. Биз ярқин абләтниң нөвәттә ишханисида бар яки йоқлуқини сориғинимизда, тәптиш хадими бу күнниң бир дәм елиш күни икәнликини тилға елип елип, ярқин абләт билән сөзлишәлмәйдиғанлиқимизни ейтти. Биз униңда бу мәһкимидә ярқин абләт исимлик бир хадимниң бар йоқлуқини сориғинимизда «әлвәттә бар» дәп җаваб бәрди. Биз униңдин ярқин абләтниң қанчә яшлардики киши икәнликини сориғинимизда, униң 40 яшлардики бири икәнликини тилға алди. Биз арқидин ярқин абләтниң қайси университетни оқуғанлиқини сориғинимизда, бу түр мәлуматларни кадирлар бөлүмидин сорушимизни тәвсийә қилди. Биз униңдин ярқин абләтниң телефон номурини соридуқ. У униң нөвәттә карантин сәвәблик өйидә икәнлики, әмма униң шәхсий учурлирини тәминләп берәлмәйдиғанлиқини ейтти. Биз униңдин ярқин абләт беҗиргән делодики йопурғулуқ 4 қериндашниң, йәни әркин әмәтниң қериндашлириниң қандақ бир тәрәп қилинғанлиқини соридуқ. Бу хадим бу дело һәққидә рәһбири кадирлардин рухсәт алмай туруп җаваб берәлмәйдиғанлиқини баян қилди. Биз ахирида мәзкур төт қериндашниң нөвәттә қайси түрмидә җаза өтәватқанлиқини сориғинимизда, бу бу һәқтә 10 минуттин кейин қайтидин телефон қилишимизни тәвсийә қилди; әмма дейилгән вақитта телефон қилғинимизда, соаллиримиз пүтүнләй җавабсиз қалдурулди.

Доктор әркин әмәт қериндашлиридин нурниса әмәт билән әнвәр әмәтниң саламәтлики яхши әмәслики вә шу сәвәбтин пәйлу түрмисидин йопурға түрмисигә йөткәлгәнлики һәққидә учур алғанлиқини, шундақла өзиниң бу қериндашлириниң нөвәттики саламәтлик әһвалдин әндишә қиливатқанлиқини баян қилди. Телефонимизни қобул қилған йопурғидики бир сиясий-қанун кадири, әркин әмәтниң қериндашлириниң 11 йиллиқтин кесилгәнликини ашкарилаш билән бирликтә, нөвәттә нурниса әмәтниң кесәлчан һаләттә икәнликини дәлиллиди. Униң дейишичә, нурниса әмәт түрмидә кесәлгә муптила болуп йәкән пәйлу түрмисидин йопурғидики бир түрмигә йөткәлгән. Нурнисаниң буниңдин 3 айчә аввал йәкән пәйлу түрмисидин йопурғидики дохтурханиға әкелингәнликини баян қилған бу хадим; униң нөвәттә йопурғидики түрмидә икәнлики, вирус мәзгили сәвәблик дохтурханида қайта тәкшүрүлүш вә давалашниңму оңушлуқ болмайватқанлиқини ашкарилиди.

Мәлум болушичә хитай даирилири нурниса әмәт вә йолдиши қадир әмәткә әркин әмәтни йоқлиғанлиқи үчүн икки милйон йүән җәриманә қоюп, пүтүн мал-бисатини мусадирә қилған; сақчилар сорақ җәрянида уларни қалған үч қериндишиниң әркин әмәт вә аялиға немиләрни совға қилғанлиқиға қәдәр аталмиш җинайәтлирини тәпсилий иқрар қилдурған. Нурниса әмәтниң нөвәттики кесилигә аилисигә кәлгән мәзкур чоң иқтисадий зиянниң вә яки қамақханидики қейин-қистақниң вәяки қамақханидики шараитниң начарлиқи сәвәб болғанлиқи һазирчә мәлум әмәс.

Пикирләр (0)
Share
Толуқ бәт