Икки нәпәр уйғур яш маһир түркийәниң коня шәһиридә өткүзүлгән әркин муштлишиш мусабиқисиға қатнашти

Ихтиярий мухбиримиз арслан
2021.06.30
Икки нәпәр уйғур яш маһир түркийәниң коня шәһиридә өткүзүлгән әркин муштлишиш мусабиқисиға қатнашти Түркийәниң коня шәһиридә өткүзүлгән әркин муштлишиш мусабиқисигә қатнашқан 17 яшлиқ имран аблиз(оңда) вә 22 яшлиқ абдурахман абдуқадир. 2021-Йили 28-июн, түркийә.
RFA/Arslan

6‏-Айниң 28-29-күнлири түркийәниң коня шәһиридә өткүзүлгән әркин муштлишиш мусабиқисигә истанбулдики “атаман җанбазлиқ кулуби” да чениқиватқан 17 яшлиқ имран аблиз билән 22 яшлиқ абдурахман абдуқадир қатнашқан. Бу икки маһир мусабиқә мәйданиға чимән доппа кийип, ай юлтузлуқ көк байрақни көтүргән һалда җараңлиқ сама музикиси билән кирип кәлгәндә тамашибинлар қизғин алқишлар билән қарши алған.

Коня шәһири дедиман меһманхансида өткүзүлгән бу қетимлиқ мусабиқида уйғур маһир имран аблиз иранлиқ рәқиби шүкүр әлвазайи билән мусабиқиға чүшкән. Имран аблиз мусабиқә җәрянида рәқибини уруп сәһнидин пәскә чүшүрвәткән вә тамашинбларниң қизғин алқшиға еришкән. Ахирида баһалиғучилар һәр икки маһирниң нәтиҗисиниң тәңлишип қалғанлиқини елан қилған.

Игилинишичә, 17 яшлиқ имранниң рәқиби 22 яшлиқ шүкүр әлвазайи бир нәччә қетим кәспий мусабиқигә қатнашқан болуп, имранниң йеши кичик, тәҗрибә җәһәттә рәқибигә йәтмәйдикән. Шундақтиму униң бу мусабиқидә яхши маһарәт көрситиши тамашибнларни сөйүндүргән.

Әркин муштлишиш маһирлири мусабиқә алдида қоллиғучилири билән хатирә сүрәттә. 2021-Йили 28-июн, түркийә.

Яш муштлашчи маһир имран аблиз зияритимиз қобул қилип, бу мусабиқигә чүшкәндин кейинки тәсиратини баян қилди. У өзиниң бу мусабиқигә қатнишидиғанлиқини елан қилғандин кейин дуняниң һәр қайси җайлиридики уйғурларниң уни һәр җәһәттин қоллап алқишлиғанлиқини, буниңдин өзиниң бәкму җасарәтләнгәнликини билдүрди. У буниңдин кейин техиму тиришип хәлқаралиқ мусабиқиләрдә нәтиҗә қазиниш үчүн пүтүн күчи билән мәшқ қилидиғанлиқини, уйғур хәлқини вә көк байрақни дуняға тонутуш үчүн техиму мустәһкәм ирадигә кәлгәнликини тәкитлиди.

“атаман җанбазлиқ кулуби” ниң йәнә бир маһири абдураһман абдуқадир 22 яш болуп, у бу қетим иранлиқ рәқиби 28 яшлиқ ферруз наҗаби билән мусабиқигә чүшкән. Абдураһман мусабиқә җәрянида маһарәтлирини толуқ җари қилдурған болсиму, әмма рәқибигә уттуруп қойған.

Абдурахман абдуқадир зияритимизни қобул өз тәсиратлирини ипадә қилди. У өзиниң түнҗи қетим мусабиқигә қатнашқанлиқини, шу сәвәбтин өзидин тәҗрибилик рәқибигә уттуруп қойғанлиқини, әмма мусабиқә җәрянида көп тиришчанлиқ көрсәткәнликини билдүрди. У уйғур хәлқниң өзигә йоллиған тәбрик, тиләк вә дуалирини аңлап бәк тәсирләнгәнликини, буниңдин кейин мәшиқни техиму күчәйтип җапалиқ мәшиқ қилип, көк байрақни техиму чоң хәлқаралиқ мусабиқә мәйданлириға елип чиқишқа тиришидиғанлиқини илгири сүрди.

Бу һәқтә зияритимизни қобул қилған “атаман җанбазлиқ кулуби” ниң мәсули халид атаман бу икки нәпәр уйғур яш маһир тунҗи қетим мусабиқиға қатнашқан болсиму, әмма уларниң шиҗаәт вә тәмкинлик билән һуҗум вә мудапийәдә тәң турғанлиқини, уларниң рәқиплири өзлиридин 5-6 яш чоң болсиму, әмма уларниң чиң туруп муштилишип, маһарәтлирини җайида көрсәткәнликини әскәртип өтти.

Халид атаман әпәнди йәнә бу уйғур яшларни техиму чоң дөләт вә хәлқара дәриҗилик мусабиқиларға қатнаштуруш арзуси барлиқини, буниңдин кейин уларни техиму чиң тутуп тәрбийәләйдиғанлиқини билдүрди.

Чәт әлләрдики уйғурлар иҗтимаи таратқуларда бу икки нәпәр яш муштлашчи маһирға яхши тиләкләр билдүрүшкән вә уларни алқишлиған, шундақла уларниң буниңдин кейин техиму зор нәтиҗиләрни қазинишини үмид қилишқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.