Ikki neper Uyghur yash mahir türkiyening konya shehiride ötküzülgen erkin mushtlishish musabiqisigha qatnashti

Ixtiyariy muxbirimiz arslan
2021.06.30
Ikki neper Uyghur yash mahir türkiyening konya shehiride ötküzülgen erkin mushtlishish musabiqisigha qatnashti Türkiyening konya shehiride ötküzülgen erkin mushtlishish musabiqisige qatnashqan 17 yashliq imran abliz(ongda) we 22 yashliq abduraxman abduqadir. 2021-Yili 28-iyun, türkiye.
RFA/Arslan

6‏-Ayning 28-29-künliri türkiyening konya shehiride ötküzülgen erkin mushtlishish musabiqisige istanbuldiki “Ataman janbazliq kulubi” da chéniqiwatqan 17 yashliq imran abliz bilen 22 yashliq abduraxman abduqadir qatnashqan. Bu ikki mahir musabiqe meydanigha chimen doppa kiyip, ay yultuzluq kök bayraqni kötürgen halda jarangliq sama muzikisi bilen kirip kelgende tamashibinlar qizghin alqishlar bilen qarshi alghan.

Konya shehiri dédiman méhmanxansida ötküzülgen bu qétimliq musabiqida Uyghur mahir imran abliz iranliq reqibi shükür elwazayi bilen musabiqigha chüshken. Imran abliz musabiqe jeryanida reqibini urup sehnidin peske chüshürwetken we tamashinblarning qizghin alqshigha érishken. Axirida bahalighuchilar her ikki mahirning netijisining tengliship qalghanliqini élan qilghan.

Igilinishiche, 17 yashliq imranning reqibi 22 yashliq shükür elwazayi bir nechche qétim kespiy musabiqige qatnashqan bolup, imranning yéshi kichik, tejribe jehette reqibige yetmeydiken. Shundaqtimu uning bu musabiqide yaxshi maharet körsitishi tamashibnlarni söyündürgen.

Erkin mushtlishish mahirliri musabiqe aldida qollighuchiliri bilen xatire sürette. 2021-Yili 28-iyun, türkiye.

Yash mushtlashchi mahir imran abliz ziyaritimiz qobul qilip, bu musabiqige chüshkendin kéyinki tesiratini bayan qildi. U özining bu musabiqige qatnishidighanliqini élan qilghandin kéyin dunyaning her qaysi jayliridiki Uyghurlarning uni her jehettin qollap alqishlighanliqini, buningdin özining bekmu jasaretlen'genlikini bildürdi. U buningdin kéyin téximu tiriship xelq'araliq musabiqilerde netije qazinish üchün pütün küchi bilen meshq qilidighanliqini, Uyghur xelqini we kök bayraqni dunyagha tonutush üchün téximu mustehkem iradige kelgenlikini tekitlidi.

“Ataman janbazliq kulubi” ning yene bir mahiri abdurahman abduqadir 22 yash bolup, u bu qétim iranliq reqibi 28 yashliq férruz najabi bilen musabiqige chüshken. Abdurahman musabiqe jeryanida maharetlirini toluq jari qildurghan bolsimu, emma reqibige utturup qoyghan.

Abduraxman abduqadir ziyaritimizni qobul öz tesiratlirini ipade qildi. U özining tünji qétim musabiqige qatnashqanliqini, shu sewebtin özidin tejribilik reqibige utturup qoyghanliqini, emma musabiqe jeryanida köp tirishchanliq körsetkenlikini bildürdi. U Uyghur xelqning özige yollighan tebrik, tilek we du'alirini anglap bek tesirlen'genlikini, buningdin kéyin meshiqni téximu kücheytip japaliq meshiq qilip, kök bayraqni téximu chong xelq'araliq musabiqe meydanlirigha élip chiqishqa tirishidighanliqini ilgiri sürdi.

Bu heqte ziyaritimizni qobul qilghan “Ataman janbazliq kulubi” ning mes'uli xalid ataman bu ikki neper Uyghur yash mahir tunji qétim musabiqigha qatnashqan bolsimu, emma ularning shija'et we temkinlik bilen hujum we mudapiyede teng turghanliqini, ularning reqipliri özliridin 5-6 yash chong bolsimu, emma ularning ching turup mushtiliship, maharetlirini jayida körsetkenlikini eskertip ötti.

Xalid ataman ependi yene bu Uyghur yashlarni téximu chong dölet we xelq'ara derijilik musabiqilargha qatnashturush arzusi barliqini, buningdin kéyin ularni téximu ching tutup terbiyeleydighanliqini bildürdi.

Chet ellerdiki Uyghurlar ijtima'i taratqularda bu ikki neper yash mushtlashchi mahirgha yaxshi tilekler bildürüshken we ularni alqishlighan, shundaqla ularning buningdin kéyin téximu zor netijilerni qazinishini ümid qilishqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.