Түркийәниң сабиқ баш министири әхмәт давутоғлу әркин алптекинни дохтурханида йоқлиди

Ихтиярий мухбиримиз әркин тарим
2021-09-23
Share
Түркийәниң сабиқ баш министири әхмәт давутоғлу әркин алптекинни дохтурханида йоқлиди Түркийә келәчәк партийәси рәиси, сабиқ баш министир әхмәт давутоғлу д у қ ниң сабиқ қурғучи рәиси әркин аптекин әпәндини дохтурханида йоқлиди. 2021-Йили 23-сентәбир, туркийә.
RFA/Erkin Tarim

Түркийә келәчәк партийәси рәиси, сабиқ баш министир әхмәт давутоғлу дүня уйғур қурултийиниң сабиқ қурғучи рәиси әркин аптекин әпәндини дохтурханида йоқлиди.

Келәчәк партийәси рәиси, сабиқ баш министир әхмәт давутоғлу, муавин рәиси сәлчуқ өздағ, селим тимурчи вә мустафа гүзәл қатарлиқ рәһбәрләрдин тәркиб тапқан һәйәт 23-сентәбир күни чүштин бурун әнқәрә университети теббий факултети дохтурханисида йетиватқан д у қ ниң сабиқ қурғучи рәиси әркин алптекинни дохтурханида йоқлап һал сориди. Мәзкур һал сорашта дохтурханиниң мудири, әркин алптекинни давалаватқан дохтурларму кәлди.

Келәчәк партийәси рәиси, сабиқ баш министир әхмәт давутоғлу, муавин рәиси сәлчуқ өздағ, селим тимурчи вә мустафа гүзәл қатарлиқ рәһбәрләрдин тәркиб тапқан һәйәт д у қ ниң сабиқ қурғучи рәиси әркин аптекин әпәндини дохтурханида йоқлиди. 2021-Йили 23-сентәбир, туркийә.
Келәчәк партийәси рәиси, сабиқ баш министир әхмәт давутоғлу, муавин рәиси сәлчуқ өздағ, селим тимурчи вә мустафа гүзәл қатарлиқ рәһбәрләрдин тәркиб тапқан һәйәт д у қ ниң сабиқ қурғучи рәиси әркин аптекин әпәндини дохтурханида йоқлиди. 2021-Йили 23-сентәбир, туркийә.

Алди билән әркин алиптекин әпәндиниң дохтури волқан қозлуҗа әпәнди әхмәт давутоғлу әпәнди башчилиқидики һәйәткә әркин алптекинниң кесәллик әһвали торғисида мәлумат берип мундақ деди: "әркин алиптекин әпәндиниң саламәтлики әслигә кәлди. Германийәгә берип давалинишни давам қилмақчи, йеқинда балнистин чиқса болиду".

Арқидин әхмәт давутоғлу әркин алиптекин әпәндиниң саламәтликиниң әслигә кәлгәнликидин хурсән болғанлиқини вә саламәтлик тиләйдиғанлиқини баян қилғандин кейин шәрқий түркистан дәвасиниң келәчәк партийәсиниң дәваси икәнликини баян қилип мундақ деди: "сиз шундақ яхши болуп кетипсиз, сизни көрүп бәк хурсән болдум. Биз һәр даим силәрни қоллаймиз. Шәрқий түркистан дәваси бизниң өз дәвайимиздур. Шәрқий түркистан бизниң атаюртимиз, мәдәнийитимизниң бөшүки, биз келәчәк партийәси болуш сүпитимиз билән пүтүн күчимиз билән уйғурларниң һазирқи еғир вәзийитини күн тәртипкә елип келишкә тиришиватимиз, бундин кейинму уйғур қериндашлиримизниң әркинлики үчүн қолимиздин кәлгән тиришчанлиқни көрситимиз".

Әркин алптекин әпәнди келәчәк партийәси рәиси әхмәт давутоғлу вә униң муавинлириға рәһмәт ейтқандин кейин уйғур дәваси вә түркийәдин күткәнлири тоғрисида тохтилип мундақ деди: "бурун шәрқий түркистан дәваси сепида йетишкән адәмлиримиз аз иди. Һазир бир қанчә тил билидиған талантлиқ йетишкән яшлар дәва сепимизгә қошулди. Биз хәлқарада түркийә дөлитиниң алий мәнпәәтиниму нәзәрдә тутқан һалда шәрқий түркистан хәлқиниң алий мәнпәәти үчүн күрәш қиливатимиз. Буни хәлқимизгиму һәр даим тәкитләватимиз. Түркийә дөлити бурундин тартип уйғурларға игә чиқишқа тиришиватиду, 1949-йили коммунист хитайлар шәрқий түркистанни бесивалғандин кейин кәшмир арқилиқ түркийәгә кәлгән лидиримиз муһәммәтимин буғра вә әйса йүсүп алиптекин башчилиқидики көп санда уйғур вә қазақларни қобул қилди. Буниң үчүн мән рәһмәт ейтимән. Лекин бүгүн уйғурлар ирқий қирғинчилиққа учримақта, хитай һөкүмити уйғурларни йоқ қилишқа тиришмақта. Бундақ бир вәзийәттә түркийәмизниң уйғурларға техиму көп көңүл бөлүши керәк".

Әхмәт давутоғлу балилиқ чағлирида әркин алптекинниң дадиси әйса йүсүп алптекинни көп қетим көргәнликини баян қилип мундақ деди: "әйса йүсүп алиптекин 20-әсирдики түрк дунясиниң әң муһим рәһбәрлиридин биридур. Мән кичик вақтимда әйса әпәнди дадамниң йениға келип-кетәтти, уни өз тағамдәк көрәттим. У, боснийәликләрниң лидири иззәт беговичкә охшайтти. У, еғир-бесиқ, әмма қәтий ирадигә игә адәм иди. Әйса әпәнди аддий-саддә, әмма ғурурлуқ киши иди. Мәрһумниң шәрқий түркистан дәвасиға қошқан төһписи наһайити зор, алла ятқин җайини җәннәттә қилсун".

Әркин алиптекин әпәнди туюқсиз кесәл болуп әнқәрәдә балниста йетип қалғандин кейин дуня уйғур қурултийиниң рәиси долқун әйса әпәнди уни йоқлаш үчүн 18-сентәбир күни әнқәрәгә кәлгинидә түркийә сақчи даирилири 9-айниң 9-күни түркийә һөкүмитиниң долқун әйса һәққидә "дөләт бихәтәрликигә тәһдит" дегән ички қарар чиқирип, униң түркийәгә киришини иккинчи қетим чәклигәнликини билдүрүп германийәгә қайтурувәткәниди. Шуниңдин кейин дуня уйғур қурултийи вәхписи мәсуллири долқун әйса намидин әркин алиптекин әпәндини дохтурханида зиярәт қилип һал сориди. Мәзкур вәхпиниң рәиси абдурешит абдулхәмит әпәнди бу һәқтә мәлумат бәрди.

Әркин алиптекин әпәнди бу йил 83 яшқа киргән болуп, 15-сентәбир күни униң саламәтлики туюқсиз өзгирип қелип, әнқәрә университети теббий факултетиниң дохтурханисида балниста ятқаниди. Һазир униң кесәллик әһвали яхшиланған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт