“Nawa”, “Talant köwrüki” pirogrammilirining filim ishligüchisi abduxélil obulqasim 15 yilliq késilgen

Uyghur élida ün-sin baziri rawajlinishqa bashlighan 1990-yillarda tijaritini qeshqerde bashlighan, 2000-yillarda ürümchide “Nawa” we “Talant köwrüki” qatarliq pirogrammilargha meblegh salghan iqtidarliq tijaretchi we ijtima'iy pa'aliyetchi abduxélil obulqasim, 2017-yili tutqun qilinip 2019-yili qoyup bérilgen. 2021-We 2022-yillarda dolan oqetchilik shirkitini shénjén'gha yötkeshke tirishqan, emma arxipidiki qara chékit seweblik emelge ashuralmighan abduxélil obulqasim, ötken yili séntebirde ikkinchi qétim tutqun qilin'ghan. U, bu yil 4-ayda 15 yilliq késiwétilgen. Töwende muxbirimiz shöhret hoshurning bu heqte teyyarlighan pirogrammisi diqqitinglarda bolidu.

Norwégiyediki “Uyghuryar fondi” ning yétekchisi abduweli ayupning tonushturushiche, 1975-yili qeshqerde tughulghan abduxélil obulqasim, Uyghur élida bir mezgil alahide tereqqiy qilghan ün-sin bazirigha 20 yash mezgilliridila qedem basqan. Deslepte qeshqer héytgah bazirida ün-sin dukini achqan abduxélil 2000 ‏-yillarda ürümchide “Dolan oqetchilik shirkiti” ni qurup Uyghur medeniyet baziridiki gholluq karxanichilardin birige aylan'ghan. Déyilishiche, u, Uyghur jem'iyitide alqishqa érishken “Nawa” we “Talant köwrüki” qatarliq pirogrammilargha meblegh salghan we uni filim qilip ishligen.

Abduweli ayupning yene déyishiche, abduxélil obulqasim, 2017-yili tutqun qilinip 2019-yili yil axirida qoyup bérilgen. Ötken yili 15-séntebirde qayta tutulup bu yil aprél éyida 15 yilliq késiwétilgen. Biz uchurlarning toghriliqini aydinglashturush üchün, Uyghur élidiki alaqidar idare jem'iyetlerge téléfon qilduq.

 Abduxélil obulqasimning ün-sin tijariti medeniyet nazariti teripidin nazaret qilinidighan bolghachqa, biz uning we shirkitining nöwettiki ehwali heqqide medeniyet nazaritining alaqidar bölümliridin melumat soriduq. Xadimlar özlirining bundaq bir kishi we dolan namidiki shirkettin xewersizlikini éytti.

Abduweli ayupning déyishiche, abduxélil 2019 ‏-yilning axiri lagérdin chiqqandin kéyin, tijaritini nisbeten bixeterrek jaygha, yeni xitayning shénjén shehirige yötkimekchi bolghan. Emma u nopusluq bolghan ahaliler komitéti we yurti qeshqer östengboyi saqchixanisi uning ichkirige yötkilishige tosqunluq qilghan. Qeshqer wilayetlik teptish mehkimisi xadimi xadimi, abduxélil obulqasimning ehwali heqqide melumat bérishni ret qildi.

Abduweli ayupning alaqidar qanalliridin igilishiche, abduxélil ablajan ayup, shir'eli eltékin, ablikim kelkün qatarliq tutqundiki sen'etkarlarning sen'et kéchiliklirini filim qilip ishligen bolghachqa, u bölgünchilerge sehne hazirlap bérish we bölgünchilikke qutratquluq qilish bilen eyiblen'gen. Téléfonimizni qobul qilghan ürümchi ottura sot mehkimisi xadimi, “Ürümchide Uyghur ün-sin baziri sahesidin tutqun qilin'ghanlar barmu? ” dégen so'alimizgha jawaben “Bar we köp” dep jawab berdi we bulardin biri abduxélil obulqasim ikenlikini delillidi. Emma, abduxélilning késilish sewebi heqqide melumat bermidi. Ottura sotning yene bir xadimi abduxélilning 15 yilliq késilgenlikini delillidi.

3 Qiz perzentning atisi bolghan abduxélil obulqasimning nöwette ürümchidiki bir türmide jaza mudditi ötewatqanliqi melum, emma qaysi türmide jaza ötewatqanliqi melum emes.