Uyghurlar osakada namayish ötküzüp, 20 dölet guruhi bashliqlirigha Uyghur mesilisini anglatqan

Ixtiyariy muxbirimiz erkin tarim
2019-06-28
Élxet
Pikir
Share
Print

D u q we yaponiye Uyghur jem'iyiti qatarliq ammiwi teshkilatlar 20 dölet guruhi bashliqlar yighini chaqiriliwatqan yaponiyening osaka shehirige bérip, xitay dölet re'isi shi jinpinggha qarshi naraziliq namayishi ötküzgen hemde Uyghurlarning hazirqi éghir weziyitini dunya jama'etchilikige anglatqan.

Bu qétimqi 20 dölet guruhi bashliqlar yighini 6-ayning 28-küni yaponiyening osaka shehiride bashlan'ghan.

28-Iyun küni dunya Uyghur qurultiyi, yaponiye Uyghur birliki, hör hindi tinch okyan birliki teshkilati, xongkonggha erkinlik teshkilati, yaponiye tibet birliki we yaponiye mongghul birliki qatarliq teshkilatlar birlikte muxbirlarni kütüwélish yighini ötküzgen. Hör hindi tinch okyan birliki teshkilatining re'isi, dunya Uyghur qurultiyining sabiq re'isi rabiye qadir xanim ziyaritimizni qobul qilip, Uyghur mesilisige yaponiye we dunya metbu'atlirining qiziqishining intayin yuqiri ikenlikini bayan qildi.

U yene dunyadiki 20 chong döletning aliy rehberliri ishtirak qiliwatqan bundaq bir yighin échiliwatqan osakada Uyghurlarning hazirqi éghir weziyitini anglitish zor ehmiyetke ige, dédi

D u q ning yaponiyediki wekili ilham mexmut ependi d u q ning bu qétimqi pa'aliyetke puxta teyyarliq qilghanliqini, lozunka we resimlerni teyyarlap muxbirlarni kütüwélish yighinidin sirt, resim körgezmisi achqanliqini we Uyghurlarning hazirqi éghir weziyiti bayan qilin'ghan waraqche tarqatqanliqini bayan qildi.

Osakada chaqirilghan 20 dölet guruhi bashliqlar yighini bashlinishtin burun, yeni 27-iyun küni osaka shehiride chong namayish ötküzülgen. Yaponiye Uyghur birliki teripidin uyushturulghan bu pa'aliyetke yaponiyediki kishilik hoquq teshkilatliri we bashqa ammiwi teshkilatlarning mes'ulliri we ezaliridin bolup 400 etrapida kishi ishtirak qilghan. Yaponiye Uyghur birlikining mes'uli turmemet hashim ependi bu heqte melumat berdi.

Turmemet hashim ependi namayish arqiliq Uyghur tragédiyesini yaponiye hökümitige we 20 dölet guruhining rehberlirige yetküzüshke tirishqanliqini, buning muweppeqiyetlik bolghanliqini bayan qildi.

Muxbirlarni kütüwélish pa'aliyiti ikki qisimgha bölüp élip bérilghan bolup, muxbirlar nuqtiliq halda Uyghurlarning hazirqi weziyiti toghrisida so'al sorighan. Yaponiye Uyghur birliki bashqurush hey'itining ezasi ghalip mijit ependi bu heqte melumat berdi.

Yaponiye Uyghurlar toghrisida da'im pa'aliyetler ötküzülüp turidighan döletlerdin biri. Undaqta, bu qétimqi pa'aliyetning burunqi pa'aliyetlerge oxshimaydighan teripi néme? ilham mexmut ependi bu qétimqi pa'aliyetke xongkong we teywenliklerningmu ishtirak qilghanliqini bildürdi.

Toluq bet