Җов байдин G7 әллирини уйғур мәҗбурий әмгәк мәсилисигә тақабил турушқа чақиридикән

Мухбиримиз мәмәтҗан җүмә
2021-04-25
Share
Анализчилар: Америка президенти җов байден билән японийә баш вәзири йошихиде суга мухбирларға бәргән бирләшмә баянат йиғини. 2021-Йили 16-апрел, вашингтон.
REUTERS

Бир юқири дәриҗилик ақсарай әмәлдариниң җүмә күни билдүрүшичә, америка санаәтләшкән 7 дөләт (G7) гурупписидики иттипақдашлирини хитайниң уйғурларға қаратқан мәҗбурий әмгәк сияситигә қарши бесим ишлитишкә чақиридикән.

Америка президенти җов байденниң муавин дөләт бихәтәрлик мәслиһәтчиси далип сингиниң ейтишичә, президент җов байдин буларни бу йил июн әнглийәдә ечилидиған санаәтләшкән 7 дөләт (G7) гурупписи алий дәриҗиликләр учришишида оттуриға қойидикән.

Далип сингиниң билдүрүшичә, мәзкур йиғинда сағламлиқ бихәтәрлики, крона вирусиға мас қәдәмлик иқтисадий инкас қайтуруш, килимат өзгиришигә қарши конкрет һәрикәт елип бериш вә G7 дөләтлиридики ортақ демократик қиммәт қаришини илгири сүрүш қатарлиқ мәсилиләр музакирә қилинидикән.

Санаәтләшкән 7 дөләт (G7) гурупписи америка, әнглийә, канада, фирансийә, германийә, италийә вә японийәни өз ичигә алиду.

Сингиниң ейтишичә, америка даирилири уйғур районидики кишилик һоқуқ дәпсәндичилики сәвәбидин хитайға қарши күчлүк һәрикәт қолланған болсиму, әмма G7 гурупписидики иттипақдашлири билән һәмкарлишип буниңға мунасивәтлик һәрикәтлирини техиму кеңәйтишкә тиришидикән.

У: "биз мәвқәйимизни ениқ оттуриға қойдуқ, истемалчилиримизниң импорт қилған таварларниң мәҗбурий әмгәк билән ясалғанлиқини билиш һәққи бар. Бизниң қиммәт қаришимиз сода мунасивитимизгә сиңдүрүлүши керәк" дегән.

У йәнә, америкиниң G7 әллиридин ортақ қиммәт қарашларни илгири сүрүш үчүн конкретни қәдәм елишни күтидиғанлиқи, чүнки буларни уйғур районида йүз бериватқан ишларға тәтбиқлашқа болидиғанлиқини ейтқан.

Америка һөкүмити бу йил январда хитайниң уйғурлар үстидин "ирқий қирғинчилиқ" вә "инсанийәткә қарши җинайәт" садир қиливатқанлиқини җакарлиған.

Шуниңға әгишип, канада, голландийә вә әнглийә парламентлири хитайниң уйғурларға қаратқан зиянкәшликлирини "ирқий қирғинчилиқ" дәп етирап қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт