Jow baydin G7 ellirini Uyghur mejburiy emgek mesilisige taqabil turushqa chaqiridiken

Bir yuqiri derijilik aqsaray emeldarining jüme küni bildürüshiche, amérika sana'etleshken 7 dölet (G7) guruppisidiki ittipaqdashlirini xitayning Uyghurlargha qaratqan mejburiy emgek siyasitige qarshi bésim ishlitishke chaqiridiken.

Amérika prézidénti jow baydénning mu'awin dölet bixeterlik meslihetchisi dalip sin'gining éytishiche, prézidént jow baydin bularni bu yil iyun en'gliyede échilidighan sana'etleshken 7 dölet (G7) guruppisi aliy derijilikler uchrishishida otturigha qoyidiken.

Dalip sin'gining bildürüshiche, mezkur yighinda saghlamliq bixeterliki, krona wirusigha mas qedemlik iqtisadiy inkas qayturush, kilimat özgirishige qarshi konkrét heriket élip bérish we G7 döletliridiki ortaq démokratik qimmet qarishini ilgiri sürüsh qatarliq mesililer muzakire qilinidiken.

Sana'etleshken 7 dölet (G7) guruppisi amérika, en'gliye, kanada, firansiye, gérmaniye, italiye we yaponiyeni öz ichige alidu.

Sin'gining éytishiche, amérika da'iriliri Uyghur rayonidiki kishilik hoquq depsendichiliki sewebidin xitaygha qarshi küchlük heriket qollan'ghan bolsimu, emma G7 guruppisidiki ittipaqdashliri bilen hemkarliship buninggha munasiwetlik heriketlirini téximu kéngeytishke tirishidiken.

U: “Biz mewqeyimizni éniq otturigha qoyduq, istémalchilirimizning import qilghan tawarlarning mejburiy emgek bilen yasalghanliqini bilish heqqi bar. Bizning qimmet qarishimiz soda munasiwitimizge singdürülüshi kérek” dégen.

U yene, amérikining G7 elliridin ortaq qimmet qarashlarni ilgiri sürüsh üchün konkrétni qedem élishni kütidighanliqi, chünki bularni Uyghur rayonida yüz bériwatqan ishlargha tetbiqlashqa bolidighanliqini éytqan.

Amérika hökümiti bu yil yanwarda xitayning Uyghurlar üstidin “Irqiy qirghinchiliq” we “Insaniyetke qarshi jinayet” sadir qiliwatqanliqini jakarlighan.

Shuninggha egiship, kanada, gollandiye we en'gliye parlaméntliri xitayning Uyghurlargha qaratqan ziyankeshliklirini “Irqiy qirghinchiliq” dep étirap qilghan idi.