Матияс бөлингер хитайда йолуққан кичик вәқә, ахбарат васитилирида чоң хәвәргә айланди

Ихтиярий мухбиримиз әкрәм
2021.07.29
Share on WhatsApp
Share on WhatsApp
Матияс бөлингер хитайда йолуққан кичик вәқә, ахбарат васитилирида чоң хәвәргә айланди Герман мухбири матияс бөлингер(Mathias Boelinger) ниң хенәндә хитай пуқралириниң қоршап һуҗум қилишиға учраш вәқәсидин көрүнүш. 2021-Йили 24-июл хенән, хитай.
Mathias Boelingerning Twitter Hésabigha chiqarghan sin körünüshidin késip élin’ghan

Хитай пуқралириниң герман мухбири матияс бөлингергә қоршап һуҗум қилиши, германийә ахбарат васитилириниң қизиқ темиси болуп қалди.

Герман мухбири матияс бөлингерниң хенәндә хитай пуқралириниң қоршап һуҗум қилишиға учраш вәқәси ғәрб ахбарат вастилирида, болупму германийәниң һәрсаһә таратқулирида җиддий тема сүпитидә тохтимай тәшвиқ қилинмақта. Германийәниң дөләтлик радио телевизийә қанили болған а р д, даңлиқ гезитләрдин “җәнубий германийә” гезити, “франкфурт мәҗмуәси” гезити, “дуня” гезити, “әйнәк” журнили қатарлиқлар “хитайдики герман мухбири пуқраларниң тосқунлуқиға учриди”, “герман мухбири хитайда назарәткә вә бесимға дуч кәлди”, “мухбирларни овлаш”, “хәтәрлик өзгириш”, “өлүк мүшүк билән көрүмсиз мухбирларға тақабил туруш: бейҗиңниң җадугәрни овлиши” қатарлиқ нурғунлиған хәвәр, мақалиләр үзүлмәй елан қилинип, хитай һакимийити вә пуқралириниң чәтәлликләргә болған өчмәнлики, мухбирларға болған дүшмәнликиниң юқири дәриҗигә йәткәнликини испатлап бәрмәктә.

Герман мухбири матияс бөлингер(Mathias Boelinger) ниң хенәндә хитай пуқралириниң қоршап һуҗум қилишиға учраш вәқәсидин көрүнүш. 2021-Йили 24-июл хенән, хитай.

Қисқичә ейтқанда, әсли йүз бәргән вәқә мундақ болған: “германийә долқунлири” радиосиниң бейҗиңдики мухбири матияс бөлингер 24-июл хитайниң хенән өлкисиниң җеңҗо шәһиридики апәт йүз бериватқан районда туруп хәвәр тарқитиду. Шу күни у “германийә долқунлири” радиосиниң нәқмәйдан зияритини қобул қиливатқанда бирқанчә хитай пуқралири келип тосалғу болиду. Бирлири: “сән кимсән! ?” дәп варқирайду. Бирлири: “йоқал бу йәрдин!” дәйду. Йәнә бирлири: “сән б б с ниң ялғанчи мухбири шуму?” дәп сорайду. Бирлири униң йеңидин тартса, бирлири униң қолидики қол телефонини тартивалмақчи болиду. Йәнә бирлири матияс бөлингерниң синға еливатқан һәмраһиниң қолидики камераға есилиду. Сүркилиш күчийиду. Әтрапқа олашқанларниң саниму көпийиду. Хитай пуқралири бу икки герман мухбирини қоршавға еливелип дүшкәлләп, варқирап-җарқирап кочини бешиға кийиду. Ақивәт хитай сақчилири вә аманлиқ сақлаш хадимлири уларни хитай пуқралириниң муһасирисидин тәстә аҗритип чиқиду.

Бу қисқа җедәлдин кейин, хитай пуқралириниң матияс бөлингергә һуҗум қилишидики сәвәбниң бирқисми айдиңлишиду. Бу күнләрдә б б с ниң мухбири робин барантму хенәндә болуп, у хитайниң йәр асти пойиз йолиға кәлкүн сүйи бесип кирип, әң аз 12 адәмниң тунҗуқуп өлгәнлики, һөкүмәтниң вақтида агаһландуруш сигнали бәрмигәнликигә даир хәвәр тарқатқан. Буниңдин йәрлик һөкүмәт даирилири қаттиқ ғәзәпләнгән. Улар үчүн апәт райониниң әмәлийитини ашкарилаш, дөләт мәхпийәтликини ашкарилаш болуп һесаблинидикән. Нәқ мәйданниң сүритини торда ашкарилиған икки нәпәр хитай мухбирму шуниң үчүн қолға елинған. Униң үстигә, б б с ниң мухбирлири илгири ишлигән хитайдики корона вирусиға аит бир һөҗҗәтлик филим хитай һакимийитиниң қаттиқ җениға тәгкән болғач, хитай даирилири өз пуқралириға б б с ни “хитайға қарши ялған учур тарқитидиған яман нийәтлик тәшвиқат қорали” сүпитидә тонутуп болған. Хитайниң иҗтимаий таратқулирида б б с ниң зияритини қобул қилмаслиқ, уларни көргән һаман орнини мәлум қилиш, уларни һәйдәп чиқириш тоғрисидики учурлар аллиқачан кәң тарқилип болған. Бу сәвәбтин хенәндики хитай пуқралири матияс бөлингерни “б б с ниң мухбири болса керәк” дәп ойлап, униңға һуҗум қилған.

Матияс бөлингер шу күни “германийә долқунлири” радиосиниң бу һәқтики зияритини қобул қилғанда, өзиниң хитайдики даим назарәт қилиниш, қуйруқиға адәм киривелиш, сақчиларниң тохтимай соал-сорақ қилиши, зиярәтләрни рәт қилиши вә қопал муамилиләргә дуч келиш қатарлиқ һәрқачан йүз беридиған бундақ һадисиләргә көнүп қалғанлиқини билдүргән болсиму, бирақ бу қетимқисиниң охшимайдиғанлиқини, бу нөвәт өзиниң һөкүмәт хадимлириниң бесимиға әмәс, бәлки адәттики милләтчи хитай пуқралириниң һуҗумиға дуч кәлгәнликини, буниң маһийәттә башқа бир мәнигә игә икәнликини ипадә қилиду.

Матияс вәқә йүз бәргән нәқ мәйданниң син көрүнүшини өзиниң таратқу сәһиписигә қойғандин кейин, нурғунлиған хитайлар инкас қалдуруп, “у немишқа өлтүриветилмиди?”, “уни чиградин қоғлап чиқириш керәк!” дейишкән вә униңға еғир һақарәтләрни қилған. Бирақ у хитайларниң сөзлиригә җаваб бәрмигән.

Германийәдики уйғур зиялийси абдушүкүр әпәнди бу вәқә һәққидә тохталғанда, хитайниң уйғурлар үстидин йүргүзүватқан инсанийәткә қарши җинайәтлири, хоңкоңдики демократийә дәпсәндичилики, тәйвәнгә болған һәрбий тәһдити вә корана вируси сәвәблик хитайниң хәлқарадики образи зор дәриҗидә чөкүватқан бир пәйттә йүз бәргән бу вәқә, гәрчә кичикла бир һадисә болсиму, ши җинпиң һөкүмранлиқи астидики хитай пуқралириниң милләтчиликтә қайси дәриҗигә йәткәнликини, ғәрб дүшмәнликиниң юқири сәвийә яратқанлиқини көрситип беридиған бир әйнәк һесаблинидиғанлиқини тилға алди. Германийәдики вәзийәт анализчиси әнвәр әһмәт әпәндиму бу һәқтә қарашлирини билдүрүп өтти.

Германийәдә 27-июл елан қилинған “өлүк мүшүк билән көрүмсиз мухбирға тақабил туруш: бейҗиңниң җадугәрни овлиши” намлиқ хәвәрдә мундақ ибариләргә йәр берилиду: “хитайда чәтәллик мухбирлар зиянкәшликкә учраватиду вә тәһдитләргә йолуқуватиду. Әмма мав заманидикидәк әскилик техи йүз берип бақмиди”. “1967-йили мав дәвридә қизил қоғдиғучилар ройтерс агентлиқиниң һазир 83 яшқа киргән биританийәлик мухбири антоний герйни 27 ай нәзәрбәнд қилип, униң өй мүшүкини өлтүрүп, мүшүкниң қени билән униң каривитини булғиған иди”. “хитай милләтчилириниң логикисиға бинаән ейтқанда, хитай һөкүмитиниң зәипликини вә иҗтимаий рәзилликләрни паш қилиш, уларниң вәтинигә төһмәт қилған билән баравәр”, “чәтәллик мухбирларниң хитайда паракәндичиликкә учриши күндилик һаятниң бирқисмиға айлинип қалди. Чәклимиләргә учраш, назарәт қилиниш, сақчиларниң сорақлириға тутулуш, практика қилинишлар уйғурларниң сәзгүр райони болған шинҗаң өлкиси биләнла чәклинип қалмиди. Һечболмиса, өткән йили америкалиқ мухбирларниң һәммиси дегүдәк қоғлап чиқирилғандин кейин, ахбарат дунясиниң вәзийити көрүнәрлик начарлашти”.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт