Шинҗаң университети ғайиб оқутқучилириниң ақивитини җәмийәттин йошурмақта

Мухбиримиз шөһрәт һошур
2020-03-30
Елхәт
Пикир
Share
Принт
Шинҗаң университети бийологийә факултетиниң профессори абдулла аббас әпәнди.
Шинҗаң университети бийологийә факултетиниң профессори абдулла аббас әпәнди.
Baidu

Җәмийәт хәвәрлиридин мәлум болушичә, 2017‏-йилдин буян уйғур райондики нуқтилиқ университетлардин зор бир түркүм оқутқучилар тутуп кетилгән.

Булардин аз сандикилири йеқинқи мәзгилләрдә қоюп берилгән болсиму, мутләқ көп сандикиси техи аилиси яки иш орниға қайтмиған. Бир аңлиғучимизниң радийомизға инкас қилишичә, икки йилдин бери из-дерики болмиған оқутқучилардин бири шинҗаң университети һаятлиқ илми вә техника институтиниң профессори абдулла аббас болуп, йеқинда униң лагердин чиқип җан үзгәнлики һәққидә җәмийәттә гәп тарқалған. Мухбиримизниң бу һәқтики ениқлашлири давамида шинҗаң университетиниң хадимлири мәзкур учур һәққидә мәлумат беришни бирдәк рәт қилди.

Һазирға қәдәр шинҗаң университетидин тутуп кетилгәнләрдин ташполат тейип, азад султан, абдукерим раһман, арслан абдулла, зулпиқар барат қатарлиқ 15 әтрапида рәһбирий вә илмий хадимниң тутқун қилинғанлиқи дәлилләнгән вә булардин бирнәччисиниң қоюп берилгәнлики ашкариланған иди. Әмма тутуп кетилгәнлики иҗтимаий таратқуларда кәң хәвәр қилинған йәнә көп сандики оқутқучиниң ақивити та һазирғичә мәлум әмәс. Мәсилән, профессор батур әйса, абдуреһим маһмут, нурбийә ядикар, нәбиҗан һәбибулла, асийә муһәммәдсалиһ, абдусалам аблимит қатарлиқлар та һазирғичә шинҗаң университетидинла из-дерики мәлум болмайватқан йүзләрчә илмий хадимларниң бир қисмидур.

Өткән һәптә бир аңлиғучимизниң радийомизға инкас қилишичә, шинҗаң университетидики ғайиблардин бири һаятлиқ илми вә техника институтиниң профессори абдулла аббас болуп, йеқинда униң лагердин чиқип җан үзгәнлики вә аилисиниң назарәт астиға елинип, мейитиниң хупиянә йәрликкә қоюлғанлиқи һәққидә үрүмчидә авам арисида гәп-сөзләр тарқалған. Биз бу учурниң тоғра-хаталиқини айдиңлаштуруш үчүн әң аввал мәзкур институтқа телефон қилдуқ. Телефонимизни алған алақидар хадим бу учур һәққидики соалимизға бираз гаңгираш вә иккилиниш ичидә җаваб бәрди. У җавабида абдулла аббас һәққидики бу учурдин өзиниң хәвәрсизликини ейтти.

Мәзкур институттики йәнә бир хадим абдулла аббасниң бир йил бурун пенсийигә чиққанлиқидин хәвири барлиқи, униңдин кейинки әһвалидин хәвири йоқлуқини ейтти. Институтниң тәҗрибиханисидики бир хадим сораватқан соаллиримизниң сәзгүр тема икәнликини илгири сүрүп, абдулла аббасниң ақивити һәққидә мәлумат беришни рәт қилди.

Өткән йили иҗтимаий таратқуларда тарқалған уйғур райондики мәлум бир университетниң сиясий йиғининиң нәқ мәйдан хатириси икәнлики пәрәз қилған бир авазлиқ учурда уйғур районидики университетларда көп сандики оқутқучиларниң «бөлгүнчилик» гумани билән тутқун қилинғанлиқи ашкариланған иди.

Биз шинҗаң университетиниң архип бөлүмигә телефон қилип, тутқундики зиялийларниң тизимлики вә сани һәққидә мәлумат соридуқ. Алақидар хадимлар нурбийә ядикар, нәбиҗан һәбибулла, асийә муһәммәдсалиһ қатарлиқ оқутқучиларниң нөвәттики әһвалидин хәвири йоқлуқини ейтти вә болған тәқдирдиму бу һәқтә мәлумат берәлмәйдиғанлиқини ишарәт қилди. Ахирида телефонимизни қобул қилған университет оқутуш башқармисиниң хадими бу әһвалларниң сәзгүр темилар икәнликини әскәртиш арқилиқ бу университетниң ғайиб оқутқучиларниң ақивитини «дөләт мәхпийәтлики» қатарида сир тутидиғанлиқини тәкитлиди.

Лагердин чиқип җан үзгәнлики илгири сүрүлгән, әмма техи дәлилләнмигән, профессор абдулла аббас татар миллитидин болуп, у аз кәм йерим әсирлик һаятини илмий хизмәтләр билән өткүзгән вә бу җәрянда 70 тин артуқ доктор вә магистир аспирантларни йетиштүргән. Униң «бәйду» учур амбиридики бийографийәисидә дейилишичә, у шинҗаң университети сабиқ бийологийә факултетиниң муавин мудири, шинҗаң муһаҗирлар бирләшмисиниң муавин рәиси, хитай мәмликәтлик 10 ‏-, 11‏- вә 12 ‏-нөвәтлик хәлқ қурултийиниң вәкили болуп вәзипә өтигән икән.

Пикирләр (0)
Share
Толуқ бәт