Shinjang uniwérsitéti ghayib oqutquchilirining aqiwitini jem'iyettin yoshurmaqta

Muxbirimiz shöhret hoshur
2020-03-30
Élxet
Pikir
Share
Print
Shinjang uniwérsitéti biyologiye fakultétining proféssori abdulla abbas ependi.
Shinjang uniwérsitéti biyologiye fakultétining proféssori abdulla abbas ependi.
Baidu

Jem'iyet xewerliridin melum bolushiche, 2017‏-yildin buyan Uyghur rayondiki nuqtiliq uniwérsitétlardin zor bir türküm oqutquchilar tutup kétilgen.

Bulardin az sandikiliri yéqinqi mezgillerde qoyup bérilgen bolsimu, mutleq köp sandikisi téxi a'ilisi yaki ish ornigha qaytmighan. Bir anglighuchimizning radiyomizgha inkas qilishiche, ikki yildin béri iz-dériki bolmighan oqutquchilardin biri shinjang uniwérsitéti hayatliq ilmi we téxnika institutining proféssori abdulla abbas bolup, yéqinda uning lagérdin chiqip jan üzgenliki heqqide jem'iyette gep tarqalghan. Muxbirimizning bu heqtiki éniqlashliri dawamida shinjang uniwérsitétining xadimliri mezkur uchur heqqide melumat bérishni birdek ret qildi.

Hazirgha qeder shinjang uniwérsitétidin tutup kétilgenlerdin tashpolat téyip, azad sultan, abdukérim rahman, arslan abdulla, zulpiqar barat qatarliq 15 etrapida rehbiriy we ilmiy xadimning tutqun qilin'ghanliqi delillen'gen we bulardin birnechchisining qoyup bérilgenliki ashkarilan'ghan idi. Emma tutup kétilgenliki ijtima'iy taratqularda keng xewer qilin'ghan yene köp sandiki oqutquchining aqiwiti ta hazirghiche melum emes. Mesilen, proféssor batur eysa, abduréhim mahmut, nurbiye yadikar, nebijan hebibulla, asiye muhemmedsalih, abdusalam ablimit qatarliqlar ta hazirghiche shinjang uniwérsitétidinla iz-dériki melum bolmaywatqan yüzlerche ilmiy xadimlarning bir qismidur.

Ötken hepte bir anglighuchimizning radiyomizgha inkas qilishiche, shinjang uniwérsitétidiki ghayiblardin biri hayatliq ilmi we téxnika institutining proféssori abdulla abbas bolup, yéqinda uning lagérdin chiqip jan üzgenliki we a'ilisining nazaret astigha élinip, méyitining xupiyane yerlikke qoyulghanliqi heqqide ürümchide awam arisida gep-sözler tarqalghan. Biz bu uchurning toghra-xataliqini aydinglashturush üchün eng awwal mezkur institutqa téléfon qilduq. Téléfonimizni alghan alaqidar xadim bu uchur heqqidiki so'alimizgha bir'az ganggirash we ikkilinish ichide jawab berdi. U jawabida abdulla abbas heqqidiki bu uchurdin özining xewersizlikini éytti.

Mezkur instituttiki yene bir xadim abdulla abbasning bir yil burun pénsiyige chiqqanliqidin xewiri barliqi, uningdin kéyinki ehwalidin xewiri yoqluqini éytti. Institutning tejribixanisidiki bir xadim sorawatqan so'allirimizning sezgür téma ikenlikini ilgiri sürüp, abdulla abbasning aqiwiti heqqide melumat bérishni ret qildi.

Ötken yili ijtima'iy taratqularda tarqalghan Uyghur rayondiki melum bir uniwérsitétning siyasiy yighinining neq meydan xatirisi ikenliki perez qilghan bir awazliq uchurda Uyghur rayonidiki uniwérsitétlarda köp sandiki oqutquchilarning "Bölgünchilik" gumani bilen tutqun qilin'ghanliqi ashkarilan'ghan idi.

Biz shinjang uniwérsitétining arxip bölümige téléfon qilip, tutqundiki ziyaliylarning tizimliki we sani heqqide melumat soriduq. Alaqidar xadimlar nurbiye yadikar, nebijan hebibulla, asiye muhemmedsalih qatarliq oqutquchilarning nöwettiki ehwalidin xewiri yoqluqini éytti we bolghan teqdirdimu bu heqte melumat bérelmeydighanliqini isharet qildi. Axirida téléfonimizni qobul qilghan uniwérsitét oqutush bashqarmisining xadimi bu ehwallarning sezgür témilar ikenlikini eskertish arqiliq bu uniwérsitétning ghayib oqutquchilarning aqiwitini "Dölet mexpiyetliki" qatarida sir tutidighanliqini tekitlidi.

Lagérdin chiqip jan üzgenliki ilgiri sürülgen, emma téxi delillenmigen, proféssor abdulla abbas tatar millitidin bolup, u az kem yérim esirlik hayatini ilmiy xizmetler bilen ötküzgen we bu jeryanda 70 tin artuq doktor we magistir aspirantlarni yétishtürgen. Uning "Beydu" uchur ambiridiki biyografiye'iside déyilishiche, u shinjang uniwérsitéti sabiq biyologiye fakultétining mu'awin mudiri, shinjang muhajirlar birleshmisining mu'awin re'isi, xitay memliketlik 10 ‏-, 11‏- we 12 ‏-nöwetlik xelq qurultiyining wekili bolup wezipe ötigen iken.

Toluq bet