Wenxé kiyim-kéchek fabrikisining ghayib ishchisi mahire memet 5 yildin buyan iz-déreksiz

Washin'gtondin muxbirimiz shöhret hoshur teyyarlidi
2023.10.25
dna-thermo-fisher.jpg Sürgündiki tibet aktiplirining biri xitay saqchidek(solda) yasinip bir ösmürdin qan ewrishkisi éliwatqanda bashqa ikki tibet aktipliri shi jinping we Thermo Fisher shirkitining bashliqi mark kespér(Marc Casper) ning qiyapitide niqablinip, keynide qarap turghan körünüsh. 2023-Yili 3-féwral, hindistan.
AP

Ötken yili ijtima'iy taratqularda yeken charibaghliq mahire memet isimlik bir qizning maralbéshidiki wenxé kiyim-kéchek fabrikisigha mejburiy élip kétilip ghayib bolghanliqi we 4 yildin buyan iz-dériki yoqluqi xewer qilin'ghanidi. Muxbirimizning bu heqte élip barghan éniqlashliri dawamida, uning ta hazirghiche ghayib ikenliki we yéqinda DNA siniqi üchün uning ata-anisidin qan élin'ghanliqi ashkarilandi.

Melum bolushiche, Uyghur élide 2017-yildin buyan téximu kéngeygen mejburiy emgek fabrikiliri peqet “Ishchilar” ning jismaniy we rohiy jehettin asta-asta xorishini keltürüp chiqarmastin, yene bezen paji'elik weqelergimu sehne bolmaqta we kütülmigen weqeler bilen kishilerning jénigha zamin bolmaqta. Ötken yili ijtima'iy taratqularda chiqqan bir xewerde yeken charibaghliq 18 yashliq mahire memetning 2017-yili maralbéshidiki wenxé kiyim-kéchek fabrikisigha ekétilgenliki we bir yildin kéyin iz-dériki ghayib bolghanliqi we ata-anisining 4 yildin buyan qizini izdep tapalmaywatqanliqi qeyt-qilin'ghanidi. Bu xewerdin yene qizning ata-anisining herqandaq xewp-xeterge tewekkül qilip qizini izdewatqanliqi, emma héchqandaq netijige érishelmeywatqanliqi melum bolghanidi.

Ashkarilinishiche, mahire memet yeken nahiyelik 2-kespiy terbiyelesh mektipi teripidin maralbéshidiki mejburiy emgek meydanliridin wenxé kiyim-kéchek fabrikisigha ewetilgen. Bir yil ichide 3 qétim a'ilisige kélip kételigen mahire memet 2018-yili 8-ayning 9-künidin étibaren a'ilisi bilen alaqisi pütünley üzülgen. Anisi senem seydexmet we dadisi memet tursunlarning wenxé kiyim-kéchek fabrikisi, kespiy terbiyelesh mektipi we maralbéshi saqchi idarisidin sürüshte qilishliri héchqandaq netije bermigen. Téléfonimizni qobul qilghan yeken 2-kespiy ottura mektep xadimi özliri fabrikigha yolgha salghan oqughuchilar heqqidiki so'allirimizgha jawab bérishni qopalliq bilen ret qildi.

Ilgiriki éniqlashlirimizda wenxé kiyim-kéchek fabrikisidiki ishchilarning mektep bilen fabrika arisida tüzülgen namelum toxtam boyiche fabrikigha mejburiy élip kélin'genliki, ruxsetsiz öyge qaytalmaydighanliqi we ayliqigha 200-400 yüen ma'ash alidighanliqi ashkarilan'ghanidi. Biz ghayib mahire memetning aqiwiti heqqide yeken nahiyelik ma'arip idarisigimu téléfon qilduq. Bu xadimmu, bu heqte héchqandaq yip uchi bermidi.

Özini ashkarilashni xalimighan bir saqchi xadimi, mahire memet mesilisining milletler munasiwiti mesilisige yatidighanliqi, shunga saqchilarning déloni éniqlashta tolimu éhtiyatchan we asta heriket qilghanliqi, téxiche mahire-memetning hayat-mamatliqi, hayat bolsa nede ikenliki heqqide netijige érishelmigenliki we téxi yéqinda ata-anisidin qan élin'ghanliqini ashkarilidi we mahire memetning dadisi bilen alaqilishishimizni tewsiye qildi. Biz u teminligen alaqe nomuri boyiche, mahire memetning dadisi memet tursun bilen alaqileshtuq. U yéqinda yéziliq saqchixanining özliridin qan alghanliqini, emma déloning tereqqiyati, yeni mahire memetning aqiwiti heqqide yenila héchqandaq melumat bermigenlikini tilgha aldi.

Ilgiri ziyaritimizni qobul qilghan norwégiyediki sabiq adwokat bextiyar ömer ependi, DNA siniqi üchün ata-anisidin qan élishning ghayib perzentning aqiwiti heqqide yaxshi bir uchur emeslikini bayan qilghanidi.

Yuqirida, mejburiy emgek fabrikisida ghayib bolghan 18 yashliq mahire memetning ata-anisidin 5 yildin kéyin DNA siniqi üchün qan élin'ghanliqi heqqide xewer berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.