Ташкәнттә уйғур рәссами ғәйрәт ибраһимофниң йәккә көргәзмиси ечилди

Ихтиярий мухбиримиз ойған
2021-03-09
Share
Ташкәнттә уйғур рәссами ғәйрәт ибраһимофниң йәккә көргәзмиси ечилди Уйғур рәссами ғәйрәт ибраһимоф ташкәнт шәһиридә ечилған йәккә көргәзмисидә мухбирниң зияритини қобул қилмақта. 2021-Йили феврал. Ташкәнт.
RFA/Oyghan

Әйни вақитларда уйғур елидин қалса, уйғурлар көп олтурақлашқан оттура асия җумһурийәтлиридин болупму қазақистан, қирғизистан вә өзбекистанда көплигән атақлиқ уйғур рәссамлириниң йетилип чиқип, омумән уйғур тәсвирий сәнитиниң раваҗлинишиға асаслиқ төһпә қошуп келиватқанлиқи мәлум. Улар өзлири яшаватқан мәмликәтләрдә һәмдә дуняниң һәр қайси әллиридиму йәккә көргәзмилирини уюштуруп, уйғур миллий тәсвирий сәнитини башқа хәлқләргә кәң көләмдә тонуштурмақта. Улар ичидә келәчикидин зор үмидләр күтүлүватқан кейинки әвлад вәкиллириму бар болуп, шуларниң бири ғәйрәт ибраһимофтур. Униң нөвәттики йәккә көргәзмиси йеқинда өзбекистан пайтәхти ташкәнт шәһиридики өзбекистан рәссамлиқ академийәсиниң ташкәнт рәсим өйидә ечилди.

Gheyret-Ibrahimof-Korgezme-2021-Tashkent.jpg
Уйғур рәссами ғәйрәт ибраһимофниң ташкәнт шәһиридә өткүзүлгән йәккә көргәзмисидин бир көрүнүш. 2021-Йили феврал. Ташкәнт.

Корона вируси вабаси мунасивити билән мәмликәттә көрүлүватқан чариләр сәвәбидин көргәзмигә 100гә йеқин адәм қатнашқан. Уларниң ичидә һәр хил рәссамлиқ мәһкимилириниң рәһбәрлири, зиялийлар, көплигән яшлар болди.

Көргәзминиң ечилиш мурасимидә сөзгә чиққан өзбекистан рәссамлиқ академийәсиниң рәиси, академик акмал нуритдиноф ғәйрәт ибраһимофниң мәмликәтниң тәсвирий сәнитиниң тәрәққиятиға қошуватқан иҗадийитини юқири баһалап, униңға академийәниң "алтун медали" ни тапшурса, өзбекистан рәссамлар иттипақиниң рәиси ибраһим валихоҗайеф иттипақиниң пәхрий ярлиқини бәрди.

Gheyret ibrahimofning 'Khotenning ashiqliri' eseri 2010-yil.jpg
Ғәйрәт ибраһимофниң ‹хотәнниң ашқлири' намлиқ әсири.

Биз һазир ташкәнт шәһиридә яшайдиған рәссам ғәйрәт ибраһимофни зиярәт қилғинимизда у өз иҗадийити һәққидә мундақ деди: "иҗадийәтни мән 2001-йилдин башлидим. У вақитта мән өзүмниң тунҗи көргәзмәмни германийәниң тавкирхер дегән кичик шәһиридә ачтим. Шуниң билән мениң явропадики сәпәрлиримму башланди десәм болиду. Фирансийәдин кейин мениң иҗадийитимдә тәсвирий сәнәтниң башқиму йөнилишлири пәйда болди. Мән һәм рәссам-нәққаш, һәм график, һәм видейо-рәссам. Кейинки йилларда мениң йәккә көргәзмилирим җәнубий корейәниң сеул шәһиридиму өтти. Буниңдин ташқири йәнә ташкәнт, үрүмчи, санкит-петербургқа охшаш шәһәрләрдә өткән көргәзмиләргә өз әсәрлирим билән қатнаштим. Әсәрлиримдә шәрқ мавзуси билән бир қатарда уйғур мавзусиму орун алған. Бу қетимда ташкәнттә өткән'инверсийә‹дәп аталған йәккә көргәзмәмгә 30 ға йеқин әмгиким, шу җүмлидин нәққашлиқ, графикилиқ вә видейо әсәрлирим қоюлди. Бу көргәзмә мениң илгири өзбекистан тәркибидики қарақалпақистан җумһурийитиниң савитский намидики дөләт сәнәт музейида вә ташкәнт рәсим өйидә болуп өткән бир қатар көргәзмилириниң давами болуп һесаблиниду. Бирақ бу қетимда қоюлған әсәрлирим аз болсиму, улар йеңиланди. Бу көргәзминиң алаһидилики шуниңдики, униңда нәққашлиқ видейо композитсийә билән арилашқан һалда меңип, мениң пәқәт рәссамла әмәс, бәлки режиссор, оператор, сенарийчи вә сәнәтшунас сүпитидики иҗадий мумкинчиликлиримниму намаян қилди."

Ғәйрәт ибраһимофниң дейишичә, ваба сәвәбидин көргәзмигә бәзи тәклип қилинған мутәхәссисләр қатнишалмиғаникән. Әмма у келәчәктә бу шәкилдики көргәзмини йәнә уюштуруш мумкинчиликиниң болидиғанлиқиға үмид қилди.

Gheyret ibrahimofning 'Qumluqlar baliliri' eseri 2010-yil.jpg
Ғәйрәт ибраһимофниң ‹қумлуқлар балилири' намлиқ әсири.

Радийомиз зияритини қобул қилған өзбекистанлиқ рәссам, өзбекистан рәссмлиқ акдемийәсиниң әзаси имәр мәнсүроф әпәнди мундақ деди: "ғәйрәт оқушни пүттүргәндин бери 20 йил болуп қалди. У өзиниң иши билән чоң утуқларға йәтти. Униң қилған көргәзмилиридә биллә болдуқ һәм һәммимиз хушал болдуқ. У техи 40 яшта. Алдида йәнә иҗад қилидиған вақти бар. Униң тарихимиздин чоңқур ойлуқ башқа йәнә иҗадлирини көрситип, күч-қувәткә толуватқан вақти һазир. Униңдин яхши нәрсиләрни күтүмиз."

Имәр мәнсурофниң ейтишичә, өзбекистандики уйғур тәсвирий сәнитиниң раваҗлинишида болупму қутлуқ бәшәроф, медәт қаһароф, енгел исқақоф, абдумеҗит қаһароф, леким ибраһимоф қатарлиқ тонулған рәссамлар асаслиқ рол ойниған болуп, уларниң мутләқ көп қисми һаяттин өткәникән.

Игилишимизчә, ғәйрәт ибраһимоф 1980-йили ташкәнт шәһиридә дуняға кәлгән. У бенкоф намидики ташкәнт рәссамлиқ мәктипини тамамлиғандин кейин, 2005-йили бекзад намидики миллий сәнәт вә лайиһиләш институтида билим тәһсил қилған вә 2010-йили магистирлиқни тамамлиған. У өзбекистан рәссамлиқ академийәсиниң рәссамлар иҗадий бирләшмисиниң әзаси. Ғәйрәт ибраһимофниң йәккә көргәзмилири явропаниң австрийә, фирансийә, венгирийә мәмликәтлиридә өткән. Бәзи әсәрлири венгрийә пайтәхти будапешт шәһиридики "шәрқий асия музейи" тәрипидин сетивелинған. Униң әсәрлири шундақла қирғизистан, русийә, қарақалпақистанниң дөләт музейлирида сақланмақтикән. Рәссамниң дадиси леким ибраһимоф оттура асия бойичә тонулған рәссам. У көплигән жумһурийәтлик вә хәлқара көргәзмиләрниң қатнашқучиси, өзбекистан рәссамлар иттипақиниң әзаси, өзбекистан рәссамлиқ академийәсиниң һәқиқий әзаси, өзбекистан хәлқ рәссами. Ғәйрәт ибраһимофниң аниси мәрйәм вә акиси мурат ибраһимофларму тонулған рәссамлардур.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт