Ghopur ebey: xitay ikki qérindishimni men bilen özliri sözleshtürüp, arqidin “Bölgünchi bilen sözleshti” dep tutqun qildi

Muxbirimiz shöhret hoshur
2021.10.29
Ghopur ebey: xitay ikki qérindishimni men bilen özliri sözleshtürüp, arqidin “Bölgünchi bilen sözleshti” dep tutqun qildi Shakir ebey(solda) gollandiyediki akisi ghopur ebey(ongda) bilen téléfonda sözleshkenliki üchün tutqun qilin'ghan. 2020-Yili, ghulja.
Ghopur Ebey teminligen

Xitay da'iriliri ghulja baytoqaydiki tijaretchi shükür ebeyning bir sayahet guruppisi bilen türkiyege chiqishigha ruxset qilghan, arqidin 4 yil ötkende, uni shu chet'el ziyariti seweblik lagérgha solighan؛ 2019-yiligha kelgende da'iriler mezkur a'ilidin extem ebeyni gollandiyediki akisi ghopur ebey bilen téléfonda sözlishishke ruxset bergen, hetta özliri sözlishishni orunlashturghan, aridin 6 ay ötkende, uni chet'eldiki atalmish bölgünchi akisi bilen körüshkenliki seweblik tutqun qilghan. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Ghopur ebeyning chong inisi extem ebey. 2020-Yili, ghulja.
Ghopur ebeyning chong inisi extem ebey. 2020-Yili, ghulja.

Ghulja baytoqaydiki tijaretchi shükür ebey, 2013-yili da'irilerning testiqi bilen bir sayahet ömiki terkibide türkiyege bérip kelgen. 2017-Yiligha kelgende, uning bu sayahiti yérim kéchide öyidin béshigha qara xalta kiydürülüp tutup kétilishke seweb bolghan.

Bu ehwalni shükür ebeyning gollandiyediki inisi ghopur ebey, 2018-yilining béshida bir guwahliq bayanati arqiliq dunyagha ashkarilighan. Netijide shükür ebey we uning bir türküm uruq-tughqanliri lagérdin qoyup bérilgen we ularning qoyup bérilgenliki, mexsus bir orunlashturush bilen gollandiyediki ghopur ebeyge uqturulghan. Hetta da'iriler ghopur ebeyning chong inisi extem ebeyni a'ile ezalirigha wakaliten uning bilen alaqiliship turushqa békitken. Ghopur ebey inisi extem ebey bilen qerellik halda körüshüp turghan we tebi'iy halda qilishqan gep-sözliride, da'irilerning chishigha tégip qoymasliqqa alahide diqqet qilghan. Shundaq turuqluq, ghopur ebeyning, inisi extem ebey bilen ushtumtut alaqisi üzülgen. U ichkiri ölkilerdiki alaqe tori arqiliq, inisi extem ebeyning 2020-yili 12-ayda “Gollandiyediki bölgünchi akisi bilen körüshken” dégen seweb bilen tutup kétilgenliki heqqide uchur alghan. Bir mezgildin kéyin kichik inisi shakir ebeyningmu oxshash seweb bilen tutup kétilgenlikidin xewer tapqan.

Biz bu heqte ghulja nahiyesining baytoqay yézisidiki alaqidar xadimlardin ehwal igiliduq.

Téléfonimizni qobul qilghan baytoqay yéziliq uchur-alaqe qomandanliq shtabi xadimliri, extem ebey we shakir ebeylerni tonumaydighanliqi we ularning délosidinmu xewersizlikini éytti.

Déyilishiche, da'iriler ghopur ebeyning uruq-tughqanlirini uning bilen baytoqay yéziliq hökümetning mexsus békitilgen téléfoni arqiliq sözleshtürgen. Biz axiri 113 bolghan bu nomurgha téléfon qilduq. Mezkur téléfonni qobul qilghan xadimlar, extem ebey we shakir ebeyning ehwali heqqide melumat bermigen bolsimu, ularning mushu téléfon arqiliq gollandiyediki akisi bilen sözleshtürülgenlikini inkar qilmidi.

Ghopur ebey qérindashlirining a'ile we turmush koyidiki addiy puqralar ikenliki, ularning milliy kimliki seweblikla xalighanche tutqun qilinip bozek qiliniwatqanliqini ilgiri sürdi.

Baytoqay yéziliq hökümet edliye ponkitining bir xadimi, “Bu yézida gollandiyediki akisi bilen sözleshkenliki üchün tutqun qilin'ghan aka-ukilar kim?” dégen so'alimizgha jawaben “Extem ebey we shakir ebey” dep jawab berdi. Biz uningdin néme üchün da'irilirining deslepte körüshüshke ruxset bérip kéyin jazalighanliqini sorighinimizda, bu heqte qomandanliq shtabidin melumat élishimizni tewsiye qildi. Emma mezkur qomandanliq shtabi bu témida éghiz échishni ret qildi.

Ghopur ebey özining bügün'ge qeder bir Uyghur muhajir süpitide Uyghur pa'aliyetlirige el qatari qatniship kelgenlikini, buningdin kéyin lagér ziyankeshlikige uchrighan kishilerning a'ile tawabi'ati süpitide, pa'aliyetlerge aktip qatnishish oyi barliqini bayan qildi. Ikki qérindishi lagérdin chiqmay turup özining chet'elde rahet yashishining mümkinsizlikini tekitligen ghopur ebey, özining bu a'ile paji'esini awazining yétishiche xelq'ara organ we axbaratlargha yetküzidighanliqini tekitlidi.

Yuqirida, ghulja baytoqaydiki aka-ukilardin extem ebey we shakir ebeylerning xitay da'irilirining orunlashturushi arqiliq gollandiyediki akisi ghopur ebey bilen körüshkenliki, arqidin “Chet'eldiki bölgünchi akisi bilen körüshken” dégen eyiblesh bilen tutqun qilin'ghanliqi heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.