Gu'angju shehiride ikki Uyghurning korona wirusi bilen yuqumlan'ghanliqi ashkarilandi

Muxbirimiz shöhret hoshur
2020-04-29
Share
Guangju-75-ottura-mektep-uyghur-sinipi-2.jpg Gu'angju sheherlik 75-ottura mektep shinjang sinipi oqughuchilirining aliy mektepke imtihan teyyarliq muzakirisidin körünüsh.
Public Domain

28-Aprél ijtima'iy taratqularda tarqalghan bir uqturushta xitayning gu'angju shehiride ikki neper Uyghurning tajsiman wirus bilen yuqumlan'ghanliqi xewer qilin'ghan. Gu'angjudiki atalmish "Az sanliq milletlerge qanuniy yardem bérish ponkiti" teripidin eslide gu'angdung ölkisidiki Uyghurlar arisida tarqitilghan bu uqturushta mezkur yuqumdarlarning 21‏-aprél küni bayqalghanliqi eskertilgen. Muxbirimizning gu'angdung ölkisi we Uyghur rayonidiki sehiye organlargha qarita élip barghan téléfon ziyaretliri dawamida mezkur uchurning toghriliqi delillendi.

Melum bolushiche, xitayche we Uyghurche tarqitilghan mezkur uqturush mushu ayning 22‏-küni tarqitilghan. Uqturushta yuqumdarlarning 21-aprél küni bayqalghanliqi we gu'angju sheherlik hökümet teripidin dawalitiliwatqanliqi eskertilgen. Bu uchurning rast-yalghanliqi we tepsilatini aydinglashturush üchün aldi bilen gu'angdungdiki alaqidar orunlargha téléfon qilduq. Xadimlardin beziliri bu ehwaldin xewersizlikini éytsa, beziliri özlirining bu heqte jawab bérishke salahiyetlik kishi emeslikini bildürüp, so'allirimizgha jawab bérishni ret qildi.

Mezkur uqturushta ikki gumandarning gu'angju sheherlik hökümet teripidin dawalitiliwatqanliqi ilgiri sürülgen. Emma ularning Uyghur rayonidin qachan we néme ish bilen gu'angdung ölkisige kelgenliki heqqide melumat bérilmigen.

Gu'angjuda Uyghur rayonidin kélip réstoran échiwatqan bir tunggan xanim mezkur ehwaldin xewiri barliqini éytti. Uning déyishiche, aldinqi küni uning réstoranigha tamaq yégili kelgen gu'angjuluq saqchilar uninggha Uyghur rayonidin kelgen ikki kishining korona wirusi bilen yuqumlan'ghanliqini uqturghan we ularning diqqet qilishini tapilighan.

Mezkur uqturushta gu'angdungda ishlewatqan we tijaret qiliwatqan Uyghurlargha xitab qilin'ghan we ularning wirus yuqumigha qarita diqqetlik bolushi tewsiye qilin'ghan.

Ilgiri ashkarilan'ghan xewerlerde 2014‏-yildin bashlap xitay ölkiliridiki Uyghurlarning omumyüzlük halda yurtlirigha heydelgenliki؛ 2018-we 2019‏-yillargha kelgende Uyghurlardin xitay ölkiliride az bir qisim ottura we aliy mektep oqughuchilardin bashqilarning asasen dégüdek qalmighanliqi melum bolghan. Mezkur uqturushta ikki yuqumdarning oqughuchi yaki xizmetchi we yaki tijaretchi ikenliki heqqide melumat bérilmigen.

Biz bu heqte melumat élish üchün Uyghur rayonluq sehiye nazaritige téléfon qilduq. Téléfonimizni qobul qilghan xadim bu heqte yuqum qomandanliq shitabidin melumat élishimizni tewsiye qildi.

Biz bu yuqum qomandanliq shitibadinmu jawabqa érishelmigendin kéyin wilayetlik sehiye tarmaqliridin melumat soriduq. Qizilsu qirghiz aptonom oblastliq sehiye idarisining bir xadimi mezkur ikki yuqumdarning gu'angjuda bayqalghanliqini, shunga ularning tepsiliy kimlikini bilmeydighanliqini bayan qilish arqiliq ijtima'iy taratqulardiki mezkur uchurning toghriliqini delillidi. Bu ehwaldin xewiri barliqini éniq éytqan bu bölümdiki xadimlar ikki yuqumdarning ismi we yéshi heqqidiki so'alimizgha jawaben bu heqte oblastliq yuqum qomandanliq merkizidin melumat élishimizni tewsiye qildi. Biz ikki yuqumdarning shughullinidighan kespini sorighinimizda bu yuqumdarlar heqqide sirtqa uchur bermeslik heqqide yuqiridin chüshken uqturush barliqini eskertip, so'allirimizgha jawab bérishni ret qildi.

Xitay axbaratliridin melum bolushiche, wuxende wirus bayqalghandin kéyin Uyghur rayonidin bir türküm doxtur-séstirilar apet rayonigha yardemge ekilin'gen. Xitay ölkiliride wirusning tizginlen'genliki ilgiri sürülgen deslepki mezgillerde eng awwal Uyghur rayonidin xitay ölkilirige mejburiy emgek üchün ishchilar yötkelgen. Yuqiriqi éniqlashlirimizdin gu'angjuda ikki Uyghurning korona wirusi bilen yuqumlan'ghanliqi delillen'gen bolsimu, emma ularning éniq kimlikliri téxi aydinglashmidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet