Алтун канниң астида қалған ишчилардин хәвәр йоқ, көмүркандики бир ишләмчи түрмидә җан үзгән

Ғулҗа наһийәсиниң қараяғач йезисидики өрүлүп чүшкән алтун кан һәққидә йәниму илигириләп елип барған ениқлашлиримиз давамида, кандики қутқузуш һәрикитиниң 4‏-һәптисигә қәдәм қойғанлиқи, әмма техичә қутқузуштин һечқандақ нәтиҗә чиқмиғанлиқи айдиңлашти. Кан астида қалғанларниң кимлики һәққидә ениқлашлиримиз җәрянида, мәзкур йезидики көмүрканда ишләмчилик қиливатқан халидә исимлик бир аялниң   йеқинда түрмидә өлгәнлики ашкариланди.

Хитай даирилири 24‏-декабир күни ғулҗа наһийәсидә йүз бәргән кан өрүлүш вәқәсидә 18 кишиниң йәр астида қалғанлиқи вә уларни қутқузуш һәркити елип бериватқанлиқи һәққидә бир қетим хәвәр бәргән болсиму, әмма қутқузушниң нәтиҗиси һәққидә та һазирғичә мәлумат бәрмиди. Өткән һәптидики ениқлашлиримизда, қутқузуш һәрикитиниң нәтиҗисиз давам қиливатқанлиқи мәлум болған иди. Бүгүнки ениқлашлиримиздиму мәзкур вәқә йүз бәргиоли дәл 4 һәптә болған болсиму, әмма қутқузушниң йәнә давам қиливатқанлиқи ашкариланди. Уйғур аптонум районлуқ җиддий қутқузуш назаритиниң қоманданлиқ иштаби, қутқузушниң нәтиҗиси һәққидики соаллиримизға җавап беришни рәт қилди.

Биз мәзкур хадимниң тәвсийәси бойичә, ғулҗадики алтун канға телефон қилдуқ. Телефонимизни қобул қилған хадим, өзиниң кан өрүлгән күндин етибарән қутқузуш һәркитидә вәзипә өтәватқанлиқини баян қилди. Әмма у нөвәттики қутқузушниң немини мәқсәт қилғанлиқи, йәни җәсәт издәш яки қурулуш әслиһәлирини әслигә кәлтүрүш үчүн икәнлики һәққидики соалимизға җаваб бәрмиди. Бу ширкәттики йәнә бир хадим, һазирғичә тепилған җәсәтләрниң бар-йоқлуқуни сориғинимизда, бу учурларни ашкарилашқа болмайдиғанлиқини тәкитлиди, әмма у кан астида қалғанларниң техник ишчилар әмәс, җисманий әмгәк билән шуғуллнидиған қара ишчилар икәнликини йошурмиди.

Биз кан астида қалған вә көпиничиси уйғур икәнлики айдиңлашқан 18 нәпәр хадимниң кимликлирини ениқлаш үчүн, қараяғач йезисиниң кәнт аманлиқ хадимлириға телефон қилдуқ. Телефонинимизни қобул қилған бир кәнт аманлиқ мудири, кан астида қалғанларниң кимликлири һәққидә мәлумат берәлмиди. Биз униңдин мәзкур алтун канда ишләватқанлардин йеқинда өлүп кәткән кимләр барлиқини сориғинимизда, у алтун кандин әмәс, көмүрканда өлүп кәткән бир кишидин хәвири барлиқини ейтти. Униң дейишичә, мәзкур кәнттә ишләпқчиқириш билән шуғуллиниватқан  чиңхуа гуроһиниң көмүр кенида ишләмчилик қиливатқан халидәм қурбан  исимлик бир аял икки айниң алдида түрмидә җан үзгән.

Мәлум болушичә, йолдиши хели бурунла түгәп кәткән вә икки балиниң аниси болған халидәм қурбан, мәзкур канда көмүр терип тирикчилик қилип кәлгән. У, 2018‏-йили күздә икки балиси билән бирликтә канниң халий бир җайида намаз оқуватқанда көмүркан аманлиқ хадимлири тәрипидин байқилип, сақчиханиға мәлум қилинған. Йезилиқ сақчи хадимлири уни “қанунсиз диний паалийәт” билән шуғуллиниш гумани билән шу күнила  өйидин тутуп кәткән. Тәкшүрүш нәтиҗисидә халидәмниң 16 вә 17 яшлардики мәзкур икки балисини 10 йилниң алдида бир “қанунсиз диний зат”ниң қолида оқутқанлиқи паш болған. Шуниң билән униңға “икки балисини қанунсиз оқутқанлиқи” үчүн 7 йилдин 14 йил, өзи “қанунсиз намаз оқуғанлиқи” үчүн 4 йил болуп, җәмиий 18 йиллиқ кесиветилгән. Ғулҗа шәһиридики байкөл аяллар түрмисидә җаза муддитини өтәватқан 40 яшлар чамисидики халидә қурбан, әслидә бар болған шекәр кесили еғирлишип, өткән йил 11‏-айда түрмидә җан үзгән.