Altun kanning astida qalghan ishchilardin xewer yoq, kömürkandiki bir ishlemchi türmide jan üzgen

Ghulja nahiyesining qarayaghach yézisidiki örülüp chüshken altun kan heqqide yenimu iligirilep élip barghan éniqlashlirimiz dawamida, kandiki qutquzush herikitining 4‏-heptisige qedem qoyghanliqi, emma téxiche qutquzushtin héchqandaq netije chiqmighanliqi aydinglashti. Kan astida qalghanlarning kimliki heqqide éniqlashlirimiz jeryanida, mezkur yézidiki kömürkanda ishlemchilik qiliwatqan xalide isimlik bir ayalning   yéqinda türmide ölgenliki ashkarilandi.

Xitay da'iriliri 24‏-dékabir küni ghulja nahiyeside yüz bergen kan örülüsh weqeside 18 kishining yer astida qalghanliqi we ularni qutquzush herkiti élip bériwatqanliqi heqqide bir qétim xewer bergen bolsimu, emma qutquzushning netijisi heqqide ta hazirghiche melumat bermidi. Ötken heptidiki éniqlashlirimizda, qutquzush herikitining netijisiz dawam qiliwatqanliqi melum bolghan idi. Bügünki éniqlashlirimizdimu mezkur weqe yüz bergi'oli del 4 hepte bolghan bolsimu, emma qutquzushning yene dawam qiliwatqanliqi ashkarilandi. Uyghur aptonum rayonluq jiddiy qutquzush nazaritining qomandanliq ishtabi, qutquzushning netijisi heqqidiki so'allirimizgha jawap bérishni ret qildi.

Biz mezkur xadimning tewsiyesi boyiche, ghuljadiki altun kan'gha téléfon qilduq. Téléfonimizni qobul qilghan xadim, özining kan örülgen kündin étibaren qutquzush herkitide wezipe ötewatqanliqini bayan qildi. Emma u nöwettiki qutquzushning némini meqset qilghanliqi, yeni jeset izdesh yaki qurulush eslihelirini eslige keltürüsh üchün ikenliki heqqidiki so'alimizgha jawab bermidi. Bu shirkettiki yene bir xadim, hazirghiche tépilghan jesetlerning bar-yoqluquni sorighinimizda, bu uchurlarni ashkarilashqa bolmaydighanliqini tekitlidi, emma u kan astida qalghanlarning téxnik ishchilar emes, jismaniy emgek bilen shughullnidighan qara ishchilar ikenlikini yoshurmidi.

Biz kan astida qalghan we köpinichisi Uyghur ikenliki aydinglashqan 18 neper xadimning kimliklirini éniqlash üchün, qarayaghach yézisining kent amanliq xadimlirigha téléfon qilduq. Téléfoninimizni qobul qilghan bir kent amanliq mudiri, kan astida qalghanlarning kimlikliri heqqide melumat bérelmidi. Biz uningdin mezkur altun kanda ishlewatqanlardin yéqinda ölüp ketken kimler barliqini sorighinimizda, u altun kandin emes, kömürkanda ölüp ketken bir kishidin xewiri barliqini éytti. Uning déyishiche, mezkur kentte ishlepqchiqirish bilen shughulliniwatqan  chingxu'a gurohining kömür kénida ishlemchilik qiliwatqan xalidem qurban  isimlik bir ayal ikki ayning aldida türmide jan üzgen.

Melum bolushiche, yoldishi xéli burunla tügep ketken we ikki balining anisi bolghan xalidem qurban, mezkur kanda kömür térip tirikchilik qilip kelgen. U, 2018‏-yili küzde ikki balisi bilen birlikte kanning xaliy bir jayida namaz oquwatqanda kömürkan amanliq xadimliri teripidin bayqilip, saqchixanigha melum qilin'ghan. Yéziliq saqchi xadimliri uni “Qanunsiz diniy pa'aliyet” bilen shughullinish gumani bilen shu künila  öyidin tutup ketken. Tekshürüsh netijiside xalidemning 16 we 17 yashlardiki mezkur ikki balisini 10 yilning aldida bir “Qanunsiz diniy zat”ning qolida oqutqanliqi pash bolghan. Shuning bilen uninggha “Ikki balisini qanunsiz oqutqanliqi” üchün 7 yildin 14 yil, özi “Qanunsiz namaz oqughanliqi” üchün 4 yil bolup, jemi'iy 18 yilliq késiwétilgen. Ghulja shehiridiki bayköl ayallar türmiside jaza mudditini ötewatqan 40 yashlar chamisidiki xalide qurban, eslide bar bolghan shéker késili éghirliship, ötken yil 11‏-ayda türmide jan üzgen.