Ghulja chuluqayda “Bir yéza, bir derwaza” tüzümi yolgha qoyulghandin kéyin bu yézigha chet el muxbirliri dessep baqmighan

Xitay da'iriliri Uyghur weziyiti heqqidiki her qétimliq bayanatida, chet el muxbirlirini rayonni ziyaret qilishqa we weziyetni neq meydanda közitishke dewet qilmaqta؛ emma yene bir tereptin, Uyghur élide qatmuqat tosuqlarni qurup, chet'el muxbirlirining ziyaritini mumkinsizleshtürmekte. Muxbirimizning téléfonini qobul qilghan ghulja nahiyesining chuluqay yézisidiki bir amanliq mudiri, yézining nazaret tüzümlirining qattiqliqini tonushturup, yézining derwazisidin chet elliklerning kirishige ruxset yoqluqi we yéqinqi 6 yilda birmu chet el muxbirining yézigha qedem bésip baqmighanliqini tilgha aldi.

Uyghur qirghinchiliqi seweblik gherb jama'etchilikining tenqidige uchrighan xitay da'iriliri eyiblimini inkar qilidighan pakit körsitip bérelmigendin kéyin, chet elliklerni, bolupmu chet el muxbirlirini Uyghur élini ziyaret qilishqa we weziyetni öz közi bilen körüshke dewet qilmaqta. Emma yene bir tereptin, rayonda burundinla mewjut bolghan nazaret sistémisini téximu kücheytip, rayon'gha yétip baralighan az sandiki chet el muxbirlirining ziyaretlirini qedemde bir tosalghugha uchratmaqta. Mesilen, yézilarni qorshaw tam ichige élip kishilerni bir derwazidin kirip chiqidighan qilish, ene shu tosuqlardin biridur.

Ötken hepte ghulja nahiyesidiki chuluqay yézisining pütünley qorshaw tam ichige élin'ghanliqi ashkarilan'ghandin kéyin, biz bügün bu tüzümning ghulja nahiyesining bashqa yéziliridiki ijra qilinish ehwali heqqide melumat sürüshte qilduq.

Alaqidar xadimlar, bu témida melumat bérishtin özlirini tartti. Melum bolushiche, yézilarni qorshaw tam ichige élish, yalghuz shu yézidiki ahalilerning ixtiyari pa'aliyitini cheklesh üchünla bolmastin, belki yene natonush kishilerning, bolupmu chet elliklerning yézigha qedem bésishining aldini élish üchün iken. Téléfon ziyaretlirimiz dawamida, téléfonimiz chuluqay yézisining ötken hepte biz sözleshken amanliq mudirigha qaytidin baghlandi. Biz bu qétim uningdin “Bir yéza, bir derwaza” tüzümining bashqa yézilardiki emeliylishish ehwalini soriduq. U bu tüzümning nahiye boyiche ijra qiliniwatqanliqidin xewiri barliqini؛ buni u xizmet jeryanida amanliq xadimliri qollinilidighan “Düyjiyangji” dégen xitayche söz bilen atilidighan sözlishish apparatidiki sözlerdin uqqanliqini bayan qildi. U yene özi biwasite körgen derwaza békitilgen yézilardin ewliya, üch'on we mollatoxtiyüzi yézilirini tilgha aldi.

Bu xadimning déyishiche, derwazidiki amanliq xadimliri yézidiki ahalilerning kirip-chiqish ehwalini közitipla qalmastin, belki yene natonush kishilerning kirip-chiqishini sezgürlük bilen közitidiken. Mana bu közitishning qattiqliqi sewebidin 2017‏-yilning axiri yézigha derwaza békitilgen kéyin, bu yézigha chet el muxbirliri dessep baqmighan.

Baliliq we ösmürlük dewri chuluqay yézisida ötken, nöwette amérikada yashawatqan siyasiy közetküchi ilshat hesen ependi, chuluqayda eslide bagh-waranlirigha ishik békitmeydighanliqi, hetta bezi a'ililerning hoyla derwazilirighimu qulup salmaydighanliqini eslep ötkendin kéyin, pütün Uyghur élining üsti ochuq bir türmige aylan'ghanliqini ilgiri sürdi.

Hörmetlik radiyo anglighuchilar, yuqirida ghulja chuluqayda “Bir yéza-bir derwaza” tüzümi yolgha qoyulghandin kéyin, bu yézigha chet el muxbirlirining qedem bésip baqmighanliqi heqqide anglitish berduq.