Gollandiye arném shehiri xitayning wuxen shehiri bilen bolghan dostluq munasiwitini üzgen

Ixtiyariy muxbirimiz Uyghur'ay
2021-07-23
Share
wuxan-xuanan-baziri.jpg Korona wirusining tarqilish menbesi ikenliki ilgiri sürülgen wuxendiki xu'anen yawayi haywanat mehsulatliri baziri. 2020-Yili mart.
Social Media

Gollandiyediki arném shehiri xitayning Uyghurlargha qaratqan kishilik hoquq depsendichiliki sewebidin wuxen bilen bolghan "Qoshkézek dostluqi" ni bikar qilghan.

Melum bolushiche bu tuyuqsiz qarar 7-ayning 21-küni arném sheherlik kéngesh ezaliri sheher bashliqining wuxen bilen bolghan dostluq munasiwitini dawam qilish teklipini mutleq köp sanliq awaz bilen ret qilghandin kéyin chiqirilghan.

"Hindistan waqti géziti" ning xewer qilishiche, bélet tashlash jeryanida siyasiy partiyeler: "Biz xitayda keng kölemde kishilik hoquq depsendichiliki yüz bériwatqanliqigha, Uyghurlar we xitaydiki bashqa az sanliq milletlerning ehwalining kündin-kün'ge nacharlishiwatqanliqigha ishinimiz. Bu ehwal astida xitay bilen bolghan sheher alaqisini saqlap qélish exlaqsizliq" dégen.

Melum bolushiche, arném shehiri bilen wuxen shehiri arisidiki "Qoshmaq sheher" kélishimi 1999-yili hasil qilin'ghaniken.

Gollandiye arném shehirining xitayning wuxen shehiri bilen bolghan qoshkézek dostluqi gollandiyediki Uyghur jama'itining naraziliqini qozghap kéliwatqanidi. Ular buninggha qarshi namayish ötküzgen we shundaqla gollandiye parlamént ezaliri bilen körüshüshke.

Gollandiye "Omrop xewerler tori" da körsitishiche, gollandiye "Xiron links" teshkilatining ezasi tulay gémichi ependim bu heqte toxtilip mundaq dégen: "Bu namayishlarni manga paydisi boldi. Men alliburun Uyghurlar toghrisida chiqarghan resimlerni körgen we u yerde yüz bergen dehshetlik jinayetler toghrisidiki maqalilerni oqughanidim. Biz arném shehirining xitayning Uyghurlarni bundaq basturushigha yol qoymasliqi üchün, bu dostluqqa qatnashmasliqni qarar qilduq".

Biz tulay gémichi ependim bilen alaqilishish üchün tirishqan bolsaqmu, jawab kelmidi.

Ziyaritimizni qobul qilghan gollandiyede turushluq siyasiy pa'aliyetchi asiye Uyghur xanim gollandiye arném shehirining xitayning wuxen shehiri bilen bolghan dostluqni üzüshining Uyghur irqiy qirghinchiliqi bilen munasiwetlik ikenlikini, buning yaki xitaygha zerbe bolidighanliqini bildürdi.

Nöwette gollandiyening bérida shehiri bilen denbosh sheherlirimu xitayning bashqa sheherliri bilen bolghan munasiwitini üzüshke bel baghlighan bolup buningdin bu sepke qoshulidighanlarning kéngiyish éhtimalliqi bar iken.

Asiye Uyghur xanim yene sheherlik hökümetning bu qararni chiqirishigha seweb bolghan amillar heqqide qisqiche toxtilip ötti.

Yéqindin buyan gollandiyede xitayning Uyghurlargha qaratqan irqiy qirghinchiliqigha da'ir delil-ispatlarning köplep otturigha chiqishi bilen gollandiye xelqi we hökümitining Uyghurlar mesilisige bolghan tonushi téximu ilgiri sürülmekte.

Gollandiye parlaménti 2-ayning 26-küni xitayning Uyghurlargha qaratqan basturush herikitini "Irqiy qirghinchiliq we insaniyetke qarshi jinayet" dep étirap qilghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet