Gollandiye hawa armiye kapitani muniridin yadikarning qomuldiki apisi we yenggisi 15 yilliq késiwétilgen

Melum bolushiche, gollandiye xan jemeti hawa armiyesining kapitan derijilik Uyghur ofitséri muniridin yadikarning qomulda yashawatqan anisi imanem nesrulla  bilen  yenggisi ayxan memet 2018 ‏- we 2019‏- yilliri késiwétilgen. Muxbirimizning téléfonigha jawap bergen imanem xanimning qomuldiki xizmet orni uning nöwette türmide ikenlikini delillidi. Muniridin ötken yili gollandiye tashqiy ishlar ministirliki arqiliq apisi we yenggisining 15 yilliqtin késiwétilgenliki heqqide uchur alghan iken.

Muniridin Yadikar teminligen

Nöwette gollandiye hawa armiyeside kapitan bolup wezipe ötewatqan muniridin yadikarning 2017‏-yildin bashlap, yurti qomuldiki a'ile ezaliri bilen bolghan alaqisi ushtumtut üzülgen. U 2018‏-yili  apisining tutqun qilin'ghanliqi heqqide gheyriy-resmiy uchur alghan. 2019‏-Yiligha kelgende yenggisiningmu  tutqun qilin'ghanliqidin xewer tapqan.

Kapitan muniridin yadikarning bayan qilishiche, uning bu yil 60 yashqa kirgen anisi imanem nesrulla qumul sheher gherbiytagh yéziliq charwa mal doxturixanisida, bu yil 37 yashqa kirgen yenggisi ayxan memet bolsa qomul shehirdiki melum bir shirkette xizmet qiliwatqan iken.

Téléfonimizni qobul qilghan qumul gherbiytagh yéziliq mal doxturxanisining nöwetchi xadimi, imanem nesrullaning xizmet ornida bar-yoqluqi heqqidiki so'alimizgha jawaben “Yoq” dep jawab berdi. Biz uningdin imanemning nöwettiki ehwali heqqide melumat sorighinimizda, u jang famililik bir xitay mes'ul xadimningla bu heqte jawab béreleydighanliqini éytti. U yene so'allirimizgha jawaben, imanemning nöwette tutqunda ikenlikini ret qilmidi. Biz uningdin imanemning néme sewebtin tutqun qilin'ghanliqini sorighinimiznidimu, u özining bu türdiki ishlargha mes'ul emeslikini bildürüp, bu heqte özi téléfon nomurini teminligen xitay mes'ul xadimdin melumat sorishimizni tekrar tewsiye qildi.

Kapitan muniridin yadikar, apisi we yenggisining tutqunda ikenlikini anglighandin kéyin, bu uchurning toghriliqini aydinglashturush we ularni qutuldurush üchün, gollandiye tashqi ishlar ministirliqigha ehwalni melum qilghan. Ministirlik xitay terep bilen bir yilche alaqilashqandin kéyin, bultur yil axirigha kelgende, kapitan muniridinning apisining 2018‏-yilining axirida,  yenggisining 2019‏-yilining yaniwar éyida 15 yilliq késiwétilgenliki heqqide uchur alghan, shundaqla muniridinni bu heqte xewerlendürgen.

 Gollandiye tashqiy b'ishlar ministirlikining kapitan muniridin'ge bergen yazma jawabidin melum bolushiche, xitay terep gollandiye terepke imanem nesrullaning   “Térorluqqa yardem bérish” jinayiti bilen, ayxan memetning bolsa  “Ejnebiy  küchlerge qanunsiz halda dölet mexpiyetlikini yetküzüsh” jinayiti bilen eyiblinip jazalan'ghanliqi we nöwette jaza mudditini ötewatqanliqi heqqide melumat bergen.

Kapitan muniridinning déyishiche, uning apsi 2014‏-yili gollandiyege  ziyaret kelgen iken. U, apisining tutqunda ikenlikini yenggisi ayxan memet  arqiliq uqqan iken.