Kapitan munirdinning anisi we yenggisining “Düshmen küchler” bilen alaqilashqanliqi üchün késilgenliki delillendi

Muxbirimiz shöhret hoshur
2022.11.16
Share on WhatsApp
Share on WhatsApp
gollandiye-uchquchi-munirdin-yadikar-2.jpg Gollandiye xan jemeti hawa armiyesining kapitani muniridin yadikar.
Muniridin Yadikar teminligen

Gollandiye xan jemeti hawa armiyesining kapitani munirdin yadikarning tutqundiki a'anisi we yenggisi heqqide élip barghan éniqlashlirimiz dawamida, ularning munirdin bilen qilghan alaqisi seweplik késilgenliki delillendi. Kespiy mes'uliyet we xizmet ornining telepliri seweplik özining siyasiy pa'aliyetlerdin hazirgha  uzaq turup kelgenlikini ilgiri sürgen kapitan munirdin yadikar, özi bilen alaqilashqanliqi üchünla késilip ketken anisi we yenggisining teqdirige süküt qilip turalmaydighanliqi we qolidin kélishiche herketke ötidighanliqini bayan qildi.

Gollandiye hawa armiye kapitani munirdin yadikar, qomuldiki anisi we yenggisi heqqide gollandiye tashqiy ishlar ministirliki arqiliq alghan uchurida, ularning “Térorchilarni qollash” we “Dölet mexpiyetlikini ashkarilash” bilen eyiblinip 15 yilliqtin késiwétilgenliki bayan qilin'ghan bolsimu, emma ularning qaysi qilmishining mezkur “Jinayetler”ge pakit sanalghanliqi melum emes idi.

Qomulgha qarita yenimu ilgirilep élip barghan téléfon ziyaretlirimizda dawamida, qomul sheher gherbiytagh yézi'isidiki bir kent amanliq mudiri muniridinning  ansi imanem nesrullaning “Chet elge chiqqanliqi üchün” késiwétilgenlikini ashkarilidi.

Kapitan muniridin yadikarning anisi imanem nesrulla  bilen  yenggisi ayxan memetning süriti.
Kapitan muniridin yadikarning anisi imanem nesrulla bilen yenggisi ayxan memetning süriti.
Munirdin Yadikar teminligen

Muniridinning déyishche, anisi imanem nesrulla 2014 ‏-yili oghlining toy murasimigha qatnishish üchün gollandiyege kelgen. Muniridinning anisi az sandiki kishiler bilen ötküzülgen bu toydin kéyin, uzun turmastinla weten'ge qaytqan. Gollandiyediki mezgilide Uyghur jama'iti bilen uchrishishtin özini qachurghan, emma xil bu éhtiyatchanliqmu kargha kelmigen. Uning bu qétimliq gollandiye sepiri xitay da'iriliri teripidin “Térorchilarni qollash” dep eyiblen'gen.

Biz yene muniridinning yenggisi ayxan memetning késilish sewebini bilish üchün qomul sheher gherbiytagh yéziliq saqchixanigha téléfon qilduq. Alaqidar xadim, ayxan memetning muniridin'gha “Xet yazghanliqi üchün” tutqun qilin'ghanliqini delillidi.

Muniridinning déyishiche, uning anisi tutqun qilinip ketken mezgilde, yenggisi ayxan memet bu ehwalni ündidar arqiliq gollandiyediki muniridin'gha yetküzgen iken.

Kapitan muniridin özining xitay teripidin “Düshmen küchler” dep sanalghanliqini, emeliyette bolsa özining gollandiye armiyesidiki bir ofitsér bolush süpiti bilen kespiy mes'uliyet we xizmet ornining telepliri seweblik, hazirghiche muhajirettiki Uyghurlarning pa'aliyetliridin uzaq turup kelgenlikini eskertti.

U, anisi we yenggisining özi seweblik késilgenlikini, bir perzent we qérindash bolush süpiti bilen bu échinishliq aqiwetke esla süküt qilalmaydighanliqini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.