Gollandiyening kulemborg shehiride Uyghur irqiy qirghinchiliqi toghrisida söhbet élip bérilghan

21-Séntebir xelq'ara kechürüm teshkilatining gollandiye shöbisi gollandiyening kulemborg (chulemborg) shehiride Uyghur irqiy qirghinchiliqi toghrisida bir söhbet munbiri teshkilligen. Kech sa'et 19:00 da bashlinip 3 sa'etke yéqin dawamlashqan bu pa'aliyetke yerlik gollandiyeliklerdin bashqa, gollandiyede yashawatqan bir qisim Uyghurlarmu qatnashqan. Söhbetning échilish nutuqini xelq'ara kechürüm teshkilati gollandiye shöbisining mes'uli kos ependi sözlep, xitayning Uyghurlar üstidin élip bériwatqan irqiy qirghinchiliqini bayan qilip ötken.

RFA/Ekrem

 Bu söhbetke daxil bolghan gollandiyediki lagér shahiti qelbinur sidiq xanimning bayan qilishiche, söhbettin burun xelq'ara kechürüm teshkilati özliri ishlep chiqqan sherqiy türkistandiki xitay zulumi we xitayning Uyghur irqiy qirghinchiliqlirigha munasiwetlik arxiplar orun alghan bir höjjetlik filim körsitilgen. Andin gollandiyediki “Debaliye ” téléwiziye qanili ishlep tarqatqan “Xitayning uzarghan qoli” namliq filim körsitilgen. Uningdin kéyin qelbinur sidiq xanimning guwahliqliri bayan qilin'ghan filimlar körsitilgen.

 Mezkur söhbetke gollandiyediki Uyghur aktipliridin abdurehim ghénimu qatnashqan bolup, uning bildürüshiche , söhbette Uyghur irqiy qirghinchiliqi we gollandiyediki Uyghurlarning xitay tehditige duch kélish weqeliri toghrisidimu so'al -jawablar bolup ötken. Söhbet ishtirakchiliridin alimjan bu heqte toxtalghanda, özi tunji qétim daxil bolghan Uyghurlargha a'it bu söhbetning öz millitining awazini dunyagha anglitishqa hessiler qétishini ümid qilidighanliqini bildürdi.

 Lagér shahiti qelbinur sidiq xanimning bildürüshiche , gollandiye amérika we kanadadin kéyinla 3-bolup, xitayning Uyghurlarni basturushini “Irqiy qirghinchiliq we insaniyetke qarshi jinayet”dep étirap qilghan dölet iken hemde gollandiye parlaménti we yerlik kishilik hoquq teshkilatliri Uyghur irqiy qirghinchiliqi mesilisige alahide köngül bölüp kelmekte iken.