Gugul shirkiti xitaygha "Uchar ejdiha" yumtali ishlep bérishni toxtidighanliqini élan qildi

Muxbirimiz méhriban
2019-06-21
Élxet
Pikir
Share
Print
Kanadaning toronto shehiridiki gugul shirkiti aldida élip bérilghan "Uchqur ejdiha" pilanigha qarshi namayish.
Kanadaning toronto shehiridiki gugul shirkiti aldida élip bérilghan "Uchqur ejdiha" pilanigha qarshi namayish.
Tuyghun abduweli teminligen.

"Xelq'ara tibet tori" ning xewiridin melum bolushiche, 19-iyun küni gugulning san-fransiskodiki bash shirkitide échilghan paychilar yighinida gugul shirkitining bash lédiri ként walkér muxbirlarning so'aligha jawab bérip, xitaygha "Uchar ejdiha" yumtalini ishlep bérish pilanning emeldin qaldurulghanliqini jakarlighan.

Xewerlerdin melum bolushiche, 6-ayning 19-küni san-fransiskodiki gugul shirkitining bash shtabida yighin échiliwatqan mezgilde chet'ellerdiki xitaygha qarshi öktichi teshkilatlardin erkin tibet tori, dunya Uyghur qurultiyi we xelq'ara istémalchilarning heq-hoquqlirini qoghdash teshkilatining chaqiriqi bilen amérikaning san-faransisko, nyo-york, kanadaning torunto, fransiyening parizh, awstraliyening sidnéy qatarliq sheherlerdiki gugul shirketlirining aldida naraziliq namayishi ötküzgen.

19-Iyun küni chüshtin kéyin kanadaning torunto shehiridiki gugul shirkitining aldida naraziliq namayishi élip bérilghan.

Melum bolushiche, mezkur naraziliq pa'aliyitige kanadadiki erkin tibet oqughuchilar teshkilati, kanada sherqiy türkistan jem'iyiti we xitay démokratliri wekilliridin xelq'ara qelemkeshler jem'iyitining mu'awin bashliqi shéng shö xanim shuningdek bir qisim pa'aliyetchiler qatnashqan.

Kanadadiki "Erkin tibet oqughuchilar teshkilati" mes'uli sonam tso namayish meydanida gugul shirkiti xitay üchün yasap bériwatqan "Uchar ejdiha" yumtalining yaman aqiwitini agahlandurup, nutuq sözligen.

U sözide gugul shirkitini "Xitay kommunist hökümitining qol chomiqigha aylinip qalmasliq" qa chaqirghan. U yene eger gugul shirkiti xitayning telipi boyiche "Uchar ejdiha" yumtalini ishlep bazargha salsa xitay hökümiti uningdin paydilinip xitay hökümitige qarshi pikir éqimidikilerni nazaret qilish, tutqun qilish, hetta chégra atlap chet'ellerde xitaygha qarshi pa'aliyette boluwatqan tibet, Uyghur pa'aliyetchiliri we öktichilerge qol sozushi mumkinlikini ilgiri sürgen. U yene xitay hökümitining bu yumtaldin paydilinip, öktichilerning uchurlirini toplaydighanliqi, ulargha her xil jinayi betnamlarni artip ularni chégra atlap tutqun qilishi üchün asanliq yaritilidighanliqini bayan qilghan. U yene buning pütkül yer sharidiki insanlarning intérnét toridiki erkin alaqisigha tehdit xaraktérlik yaman aqiwetlerni élip kélidighanliqini agahlandurghan. 

Kanadada sherqiy türkistan jem'iyitining re'isi tuyghun abduwéli ependi ziyaritimizni qobul qilip, gugulning kanadadiki shirkitining aldida élip bériwatqan naraziliq namayishi heqqide melumat berdi. U bu qétimqi naraziliq namayishini erkin tibet tori, dunya Uyghur qurultiyi qatarliq teshkilatlarning chaqiriqigha bina'en kanadadiki erkin tibet oqughuchilar teshkilatining teshkilligenlikini bildürdi. 

Kanadadiki xitay démokratliridin xelq'ara qelemkeshler jem'iyitining mu'awin bashliqi shéng shö xanim ziyaritimizni qobul qildi we bu qétim özliri élip bériwatqan naraziliq pa'aliyiti hemde uning meqsiti heqqide toxtaldi.

Ilgiriki xewerlerdin melum bolushiche, gugul shirkitining xitay ichide gugul matori arqiliq izdesh téxnikisigha yardem béridighan "Uchar ejdiha" yumtalini yasash pilani 2018-yilining 7-we 8-ay mezgilliride ashkarilan'ghan. Gugul toridin melum bolushiche, 2018-yil 9-ayning 27-küni gugulning kéys enrayt isimlik bir yuqiri derijilik emeldari gugul shirkitining 2017-yil etiyazdin bashlap mezkur pilan heqqide oylishiwatqanliqini bildürgen. Bulturdin buyanqi xelq'ara taratqularning xewerliride yene gugulning ichki qismidiki bir qisim xizmetchiler mezkur pilan'gha naraziliqini bildürüp, xizmitidin istépa bergen.

Chet'ellerde pa'aliyet élip bériwatqan Uyghur, tibet we xitay démokratchilirining teshkilatliri, xelq'aradiki kishilik hoquq teshkilatlirimu naraziliq bayanatlar élan qilip, gugul shirkitini xitay hökümiti bilen hemkarlashmasliqqa chaqirghan. Amérika hökümet organliri we bir qisim emeldarlarmu 2018-yilining axiridin bashlap gugul shirkitini agahlandurghan. "Tibet awazi" torining 2018-yil 12-ayning 19-künidiki xewiride gugul shirkitining ishchi-xizmetchilirining naraziliqi sewebidin mezkur pilanning waqtinche toxtitilghanliqi xewer qilin'ghan idi.

Toluq bet