Gülbahar jélilowa xanimgha türkiye sa'adet partiyesining "Sherep médali" bérildi

Ixtiyariy muxbirimiz erkin tarim
2020-11-18
Share
gulbahar-jililowa-mukapat.jpg Türkiye sa'adet partiyesining yighin zalida ötküzülgen "Hayatta töhpe körsetken ayallar" médal tarqitish murasimida lagér shahiti gülbahar jélilowa xanimgha bérilgen "Sherep médali". 2020-Yili 14-noyabir, türkiye.
RFA/Erkin Tarim

Türkiye sa'adet partiyesining yighin zalida ötküzülgen "Hayatta töhpe körsetken ayallar" médal tarqitish murasimida gülbahar jélilowa xanimgha "Sherep médali" bérildi. 14-Noyabir küni mezkur partiyening yighin zalida ötküzülgen murasimgha sa'adet partiyesining re'isi temel qaramolla'oghlu we partiyening ayallargha mes'ul re'isi ebru esiltürk xanim bashchiliqidiki partiye rehberliri, médal bérilidighan ayallar we enqerediki Uyghurlardin bolup köp sanda kishi ishtirak qildi. Gülbahar jélilowa xanimning "Sherep médali" ni uninggha wakaliten istanbulda turuwatqan oghli exmetjan sadirof aldi. Biz murasim toghrisida melumat igilesh üchün bu médalni tesis qilghan sa'adet partiyesining ayallar xizmitige mes'ul rehbiri ebru eslitürk xanim, enqerediki Uyghur xanimlardin ezize qeshqerli xanim, médalgha érishken gülbahar jélilowa xanim we enqerediki Uyghur medeniyet merkizining mes'uli abdulhemit pamir ependiler bilen söhbet élip barduq.

Ebru eslitürk xanim aldi bilen "Sherep médali" toghrisida melumat bérip, mundaq dédi: "Biz her yili 'hayatta töhpe körsetken ayallar' namida médal tarqitiwatimiz. Bu mukapat 6 tür boyiche bérilidu. Buning ichidiki 'sherep médali' ni öz kespide muweppi'eqiyet qazan'ghan, dunya tinchliqi we tereqqiyatigha töhpe qoshqan ayallargha bériwatimiz."

Ebru eslitürk xanim bu yil bu médalni gülbahar jélilowagha bérishning sewebi heqqide toxtilip, mundaq dédi: "'sherep médali' bu yil gülbahar jélilowa xanimgha bérildi. Uning milliti Uyghur, diniy étiqadi islam bolghanliqi üchünla xitay hökümitining zulumigha uchrap, jaza lagérlirigha qamaldi. 15 Ay jeryanida lagérda eqilge sighmaydighan derijide iskenjige uchridi. Gülbahar xanim béshidin ötküzgen bu qorqunchluq kechürmishlirini jesurluq bilen dunya jama'etchilikige anglatti. Uning bu xil jesurluqi we qehrimanliqini közde tutup, uninggha bu 'sherep médali' ni layiq körduq."

Biz "Sherep médali" bérilgen, hazir firansiyede yashawatqan gülbahar jélilowa xanim bilenmu téléfon söhbiti élip barduq. U bu médalni jaza lagérlirida yétiwatqan bigunah Uyghur qérindashliri, bolupmu jaza lagérida bir kamirda yatqan Uyghur ayalliri namidin qobul qilghanliqini bayan qildi.

14-Noyabir küni enqerediki sa'adet partiyesi merkizide ötküzülgen médal tarqitish murasimigha qatnashqan ezize xanim chet elde turup xitay zulumi astida qan yashlirini töküwatqan, Uyghur ayallirining awazi boluwatqan gülbahar jélilowa xanimgha bérilgenlikidin özining intayin xursen bolghanliqini otturigha qoydi.

Sa'adet partiyesi burundin tartip Uyghur mesilisige köngül bölüp kéliwatqan partiyelerdin biri. Mezkur partiyening qurghuchisi türkiyening sabiq bash ministiri merhum nejmettin erbaqan 1984-yilidin tartip türkiyede Uyghur mesilisini izchil otturigha qoyup kelgen kishi idi. Mezkur partiye "5-Iyul ürümchi qirghinchiliqi" yüz bergende xitaygha naraziliq bildürüp, 2009-yili 7-ayning 16-küni istanbul chaghlayan meydanida 20 ming kishi qatnashqan zor naraziliq namayishini uyushturghan idi. Uningdin kéyinmu bu partiye izchil halda Uyghur mesilisini otturigha qoyup kelmekte. Bu qétimqi médal tarqitish murasimida enqerediki Uyghur medeniyet merkizining bashliqi abdulhemit pamir ependi Uyghurlarning éghir weziyiti toghrisida melumat bérip ötti.

Qazaqistanda tughulup chong bolghan lagér shahiti gülbahar jélilowa xanim bu yil 10-ayning 11-küni türkiyedin firansiyege yétip bérip, panahliq tiligen idi. Gülbahar xanim qazaqistan puqrasi bolghinigha qarimay xitay da'iriliri teripidin 2017-yili 5-ayning 25-küni tutqun qilinip, 2018-yili 9-ayning axirighiche, yeni 15 ay ürümchide jaza lagérigha qamalghan. U lagérdin chiqqandin kéyin deslep qazaqistanda, kéyin bir mezgil türkiyede turup, jaza lagérliri heqqide türk we dunyawiy taratqularda guwahliq bergen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet