Гүлбаһар мәһмутҗан хатипһаҗи: “хитай әлчиханисиниң баянати пүтүнләй ялған”

Ихтиярий мухбиримиз әкрәм
2021.02.25
Share on WhatsApp
Share on WhatsApp
Гүлбаһар мәһмутҗан хатипһаҗи: “хитай әлчиханисиниң баянати пүтүнләй ялған” Лагер шаһиди гүлбаһар мәһмутҗан хатипһаҗи.
Social Media

Франсийә авази радийосиниң 24-февралдики хәвиригә қариғанда, хитайниң франсийәдә турушлуқ әлчиханиси уйғур лагер шаһиди гүлбаһарниң “хитай гулагида һаят қалғучи” намлиқ әсиригә қарши 23-феврал баянат елан қилған. Баянатта гүлбаһарни “сепи өзидин бөлгүнчи вә терорчи” дәп әйиблигән.

Хәвәрдин мәлум болишичә, гүлбаһар хатипһаҗиниң йеқинда нәширдин чиққан “хитай гулагида һаят қалғучи” намлиқ әсири франсийәдә зор тәсир қозғиған. Нурғунлиған даңлиқ мәтбуатлар бу китаб һәққидә хәвәрләр тарқатқан вә униңда оттуриға қоюлған мәзмунларни тонуштурған. Гүлбаһарниң лагердики һаят кәчмишлириниң нөвәттә уйғурлар учраватқан җаза лагерлиридики паҗиәләрни җанлиқ йорутуп бәргәнликини илгири сүрүшкән. Китабниң франсийәдики күчлүк тәсири хитай әлчилирини биарам қилған.

“франсийә авази” радийоси елан қилған “хитайниң франсийәдики әлчиханиси шинҗаңлиқ уйғур аялниң йеңи китабиға қарши баянат елан қилип ‛бир тутам қуруқ гәп‚ дәп әйиблиди” намлиқ бу хәвәрдә тилға елинишичә, хитай әлчиханиси баянатида гүлбаһарни 2009-йили үрүмчидә йүз бәргән “5-июл вәқәси” гә қутратқулуқ қилған дәп әйиблигән. Баянатта йәнә гүлбаһарниң 2012-, 2014-, 2016-йиллири аилиси билән бирликтә вәтәнни зиярәт қилған мәзгиллиридә “бөлгүнчиликкә, террорлуққа қутратқулуқ қилиш” җинайәтлирини садир қилғанлиқи баян қилинған.

Бирақ франсийәдә панаһлинип туруватқан гүлбаһар бүгүн бу һәқтә зияритимизни қобул қилғанда, хитайниң бу баянатиниң пүтүнләй ялған-явидақлар билән толғанлиқини тилға алди.

Хитай әлчиханиси баянатида гүлбаһарни һәр қетим вәтәнгә барғанда “вәзипә билән барған” дәп әйибләпла қалмастин, йәнә гүлбаһар аилисини “чәт әлдики бөлгүнчи тәшкилат болған д у қ ға әза болған” дәп қарилиған. Гүлбаһар бу һәқтә тохталғанда, өзлириниң әзәлдин д у қ билән алақиси болмиғанлиқини һәмдә чәт әлдиму һечқандақ сиясий һәрикәтләргә қатнашмиғанлиқини тәкитлиди.

Гүлбаһарниң билдүришичә, 2016-йили 11-айниң ахирлири гүлбаһар илгири хизмәт қилған қарамайдики “санаәт техника ширкити” уни франсийәдин юрти қарамайға тәклип қилип апирип, андин тутуп солиған. Бирақ хитай әлчиханиси баянатида гүлбаһарни “өзи кәлгән” дегән һәмдә уни “лагерда йетип бақмиған” дәп ялғанчилиқта әйиблигән. Гүлбаһар хитай әлчиханисиниң бу баянатидин биарам болмиғанлиқини, әксичә хитайниң бу бичарилиқиға күлгиси кәлгәнликини ипадә қилди.

Ахбарат вастилири йеқинқи мәзгилләрдин буян хитайниң җаза лагерлириға алақидар мәлуматлар вә инкаслар хәлқарада көпәйгәнсири хитай һакимийитиниң һәрқайси дөләтләрдики әлчиханилириниң уни ялғанға чиқиришқа урунуватқанлиқини испатлимақта. Франсийәдики “яврупа уйғур иниститути” ниң мәсули дилнур ханимниң баян қилишичә, хитайниң франсийәдики әлчиханиси бу җәһәттә актип рол ойнаватқан икән. Улар өзлири җаза лагерлирини инкар қилидиған мақалиларни көпләп елан қилипла қалмастин, йәнә бәзи франсуз қәләмкәшләрниму ишқа селип, уйғурлар үстидин йүргүзүлүватқан зулумларни йоққа чиқармақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт