Uyghur kompozitor güldiyar tengritaghli we uning muzika hayati

Türkiyede tonulghan yash Uyghur kompozitor güldiyar tengritaghli, 2024-yilliq téléwiziye tiyatiri muzikisi türi boyiche eng aliy mukapatqa érishken.

Türkiyede tonulghan yash Uyghur kompozitor güldiyar tengritaghli, 2024-yilliq téléwiziye tiyatiri muzikisi türi boyiche eng aliy mukapatqa érishken. Melum bolushiche, bu mukapat türkiyediki “Filim sana'iti we sen'etchilerni kücheytish fondi jem'iyiti” teripidin tarqitilghan bolup, güldiyarning “Yali chapqini” namliq köp qisimliq téléwiziye tiyatiri üchün ishligen muzikisi bu yilliq “Eng yaxshi téléwiziye tiyatiri muzikisi” bolup bahalan'ghan.

Uning bu mukapatqa érishishi türkiyedila emes, belki muhajirettiki Uyghurlarningmu küchlük alqishigha érishken.

Güldiyar tengritaghli türkiyediki “Star téléwiziyesi qanili” da tarqitiliwatqan dangliq téléwiziye filimi “Yali chapqini” ning muzika kompozitori bolup, bu téléwiziye tiyatiri hékaye weqeliki, mahir artisliri we filim weqelikige maslashqan muzikiliri bilen körürmenlerning küchlük alqishigha érishken iken.

 Güldiyar tengritaghli 13-séntebir küni erkin asiya radiyosi Uyghur bölümining ziyaritini qobul qilip, özining mezkur mukapatqa érishkendin kéyinki tesiratini we muzika sahesidiki emgeklirini anglighuchilirimiz bilen ortaqlashti.

Uning bildürüshiche, u awstriye mozart salzburg uniwérsitétining orkéstir piyanino kespide magistirliq oqushni tamamlighan. 2015-Yildin 2020-yilghiche türkiyediki “Kalan muzikisi” namliq muzika shirkitide ishligen. 2020-Yili “Tengritaghli” ismida özining muzika shirkitini qurghan we türkiyede ishlen'gen téléwiziye filimliri üchün muzika ishleshke bashlighan iken.

Güldiyar xanimning bildürüshiche, bu mezgilde u “Séni bek küttüm”, “Ata”, “Shahane hayatim”, “Yali chapqini”, “Eger bek söyseng”, “Güljamal”, “Wida mektupi” qatarliq filimlarning muzikisini ishligen iken. Uning bu filimlargha ishligen muzikiliri körürmenlerning yaxshi körüshige érishken. Bolupmu “Yali chapqini” gha ishligen muzikisi mukapatqa ériship, zor alqishqa érishken.

Güldiyar tengritaghli yene özining köp qisimliq téléwiziye filimlirigha ishligen muzikilirining alqishqa érishishidiki sewebler heqqide toxtilip ötti. U, téléwiziye tiyatirlirigha muzika ishleshning yuqiri kespiy maharet we héssiyat jehettin filim mezmunigha mas kélishtek yuqiri téxnika telep qilidighanliqini bildürdi.

Melum bolushiche, güldiyar 5 yérim yash chéghida a'ilisidikiler bilen türkiyege kélip yerleshken bolup, u nahayiti kichik chéghidila mexsus oqutquchidin piyanino dersi élishqa bashlighan. U türkiyede piyanino kespi boyiche muntizim muzika telimatini ottura mektep basquchida bashlighan bolup, kéyinche türkiyediki dangliq uniwérsitét-mimar sinan güzel-sen'et uniwérsitétining muzika kespide oqughan iken. U mezkur uniwérsitétta muzika kespini tamamlighandin kéyin, awstriyege bérip mozart salzburg uniwérsitétining orkéstir piyanino kespide oqup, magistirliq unwanigha érishken.

Güldiyarning bu netijisidin pexirlen'genlikini bildürgen apisi gülzadem xanim, güldiyarning bügün érishken netijisi emeliyette uning uzun muddetlik muntizim muzika terbiyesi we japaliq emgiki bedilige kelgenlikini bildürdi.

Gülzadem xanimning bildürüshiche, qizi güldiyar sen'et muhitigha toyun'ghan a'ilide dunyagha kelgen bolup, bir yash chéghidila uning muzika sézimi we talantining intayin yuqiriliqi bayqalghan.

Gülzadem xanimning bildürüshiche, eyni yilliri u yoldishi perhat qurban tengritaghli bilen türkiyege oqushqa ketkenliki üchün, qizi güldiyar bir mezgil qumuldiki momisining öyide tutup, deslepki muzika terbiyesini shu yerde alghan iken. Güldiyarning qumuldiki moma-bowisi Uyghur sazlirini chélishqa mahir bu bir jüp moysipitlar bolup, newrisige Uyghur kilassik naxsha-muzikilirini ögetken iken.

Gülzadem xanim sözini dawam qilip, qizi güldiyar 5 yérim yéshida türkiyege kelgendin kéyin, bashlan'ghuch mektepte oqushqa kirgenlikini, bu jeryanda piyanino öginishni asas qilghan halda muzika saheside etrapliq bilim igileshke bashlighanliqini bildürdi.

Uning bildürüshiche, güldiyar türkiyediki mimar sina uniwérsitétida we awstriyediki mozart salzburg uniwérsitétida 8 yil oqush jeryanida köp qétim konsértlarni bergen.

 Güldiyar tengritaghlining yéqinqi birqanche yilda türkiyede dangqi chiqqan téléwiziye tiyatirliridin “Achchiq alma”, “Ata”, “Shahane hayatim” we “Yali chapqini” qatarliqlar üchün ishligen muzikiliri qizghin alqishqa érishken.