Гүлистан әзиз: “иккинчи вәтиним-японийәни хитай тәһтидидин агаһландуруш вә қоғдаш мениң бурчум”

Мухбиримиз гүлчеһрә
2022.06.27
Share on WhatsApp
Share on WhatsApp
Гүлистан әзиз: “иккинчи вәтиним-японийәни хитай тәһтидидин агаһландуруш вә қоғдаш мениң бурчум” Японийә “кунимори партийә” синиң вәкили сүпитидә японийә дөләтлик кеңәш палата сайлимиға қатнишиш үчүн тиришиватқан уйғур қизи гүлистан әзиз. 2022-Йили күни, японийә.
Photo: RFA

Японийәдики уйғур қизи гүлистан әзиз японийә “кунимори партийәси” ниң канагава өлкисидики вәкил намзатлириниң бири сүпитидә японийә дөләтлик кеңәш палата сайлимиға қатнишиш үчүн, җиддий аваз топлап тәйярлиқ қилмақтикән. У өзиниң тәшвиқат нотуқлирида “мән бир уйғур, хитай мениң ана вәтиним шәрқий түркистанни бесивалған. Мениң иккинчи вәтиним болған японийәни худди биринчи вәтинимгә охшашла хитай тәһдитидин агаһландуруш һәм қоғдаш бурчум бар. Мән буниң үчүн әң зор тиришчанлиқ көрситишкә тәйярмән!” дегән сөзләрни тәкитләп кәлмәктә.

Шәһәрму-шәһәр кезип нутуқ сөзлигән гүлистан әзиз, чарчиғиниға қаримай телефон зияритимизни қобул қилди.

Игилишимизчә, гүлистан әзиз уйғур дияридики қәдимий юртларниң бири болған кучада туғулуп, үрүмчидә өсүп йетилгән. 2005-Йили японийәгә кәлгән, 2008-йилидин башлап, японийә уйғур җәмийитиниң актип әзасиға айланған.

Японийәдә игилик башқуруш кәспи бойичә оқуш пүттүргән гүлистан әзиз, һазир японийәдики мәлум бир өй-мүлүк ширкитидә хизмәт қилмақтикән. У 2018-йили японийәниң пуқралиқ салаһийитигә игә болған икән.

Гүлистанниң билдүрүшичә, униң японийәдики сиясий паалийәтлири сәвәблик униң үрүмчидики аилә тавабиатлири хитай даирилири тәрипидин тутқун қилинип, лагерға елип кетилгән. У шуниңдин кейин уйғур ирқий қирғинчилиқини японийә таратқулири вә хәлқаралиқ ахбаратларға аңлитишта техиму күчлүк аваз чиқирип кәлмәктә.

Гүлистан әзиз вәкиллик қиливатқан “кунимори партийәси” йеңидин қурулған японийәдики кичикрәк бир оңчил партийә болуп, у мәзкур партийиниң канагава өлкисидин сайланған вәкиллириниң бир сүпитидә японийә дөләтлик кеңәш палатаси сайлимиға қатнишиш үчүн җай-җайларда нутуқ сөзләп, җиддий тәйярлиқ қилмақтикән.

Гүлистан ханим өзиниң “кунимори партийәси” ниң канагава өлкилик вәкили сүпитидә бу қетимлиқ японийә кеңәш палата сайлимиға қатнишишиға түрткә болған амиллар һәққидиму пикир баян қилди. У өзиниң әслидики ана вәтини хитай тәрипидин бесивелинған, шундақла хитайниң ирқий қирғинчилиқиға дуч келиватқан уйғур хәлқиниң бир пәрзәнти болуш сүпити билән бу қетимлиқ японийә кеңәш палата сайлимиға қатнишишқа бәл бағлиғанлиқини, болупму өзиниң бир уйғур болуш сүпити билән японийәниң сиясий сәһнисидә рол елиш арқилиқ, һәм японийә үчүн һәм уйғур хәлқи үчүн техиму үнүмлүк хизмәт қилиш арзусини әмәлгә ашурмақчи болғанлиқини билдүрди.

Гүлистан әзиз өзи вәкиллик қиливатқан партийә һәққидиму қисқичә мәлумат берип өтти. “кунимори партийәси” ниң асаслиқ тәшвиқатлири японийәдики “сакура теливезийәси” қанилида елип берилидиған болуп, бу телевизийә қанили 2009-йили үрүмчидә “5-июл қирғинчилиқи” йүз бәргәндә, хитайниң тәтүр тәшвиқатиға қарши японийәдә өз алдиға битәрәп хәвәр бәргән таратқу икән. Гүлистан ханимниң билдүрүшичә, “сакура телевизийиси” шу вақитта ялғуз хитай һөкүмитиниң уйғур яшлириниң тинчлиқ билән өткүзгән намайишини қанлиқ бастурғанлиқидәк реаллиқни ениқ йорутупла қалмай, бәлки йәнә “26-июн шявгуән қанлиқ қирғинчилиқи” ға даир пакитлиқ ведийо көрүнүшлириниму көрсәткән икән.

Гүлистан ханим ахирида һазирқи басқучта бу қетимлиқ сайламниң нәтиҗисиниң қандақ болуши һәққидә сөз ечишниң техи балдурлуқ қилидиғанлиқини әскәртип өтти. У бу қетимлиқ парламент сайлими үчүн сөзлигән нутуқлирида өзи вәкиллик қиливатқан “кунимори партийәси” ниң японийәниң дөләт хәвпсизликини қоғдаш, японийәниң дөләт күчини күчәйтиш, японийәни сиясий, иқтисадий вә башқа җәһәтләрдә хитайниң тәсиридин мустәсна қилиш үчүн тиришчанлиқ көрситидиғанлиқини оттуриға қойған. У йәнә японийә хәлқини хитай тәһдитидин агаһландуруп, “хитайни японийә үчүн әң чоң тәһдит” дәп билишни вә бу җәһәттә әң күчлүк мудапийә тәдбири елишни тәвсийә қилип кәлмәктә икән.

Мәлум болушичә, бу қетимлиқ сайлам нәтиҗиси келәр айда чиқидикән. Гүлистан әзиз, сайлам нәтиҗисиниң мәйли қандақ болушидин қәтийнәзәр, өзи вәкиллик қиливатқан “кунимори партийәси” ниң буниңдин кейинму японийә вә япон хәлқини һәр вақит хитай тәһдитидин агаһландуруш паалийәтлирини тохтатмайдиғанлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт