21 Aydin buyan iz-dériki élinmaywatqan doxtur gülshen abbasning tutqunda ikenliki delillendi

Muxbirimiz shöhret hoshur
2020.05.29
gulshen-abbas.jpg Ürümchi nurbagh néfit doxturxanisining pénsiyige chiqqan doxturi gülshen abbas xanim. 2015-Yili washin'gton.
Photo: RFA

Yéqinqi ikki yildin buyan xelq'ara sehnilerde ismi köp tilgha tilgha élin'ghan, emma héchqandaq uchuri élinmay kelgen ghayib Uyghurlardin biri ürümchi nurbagh néfit doxturxanisining pénsiyige chiqqan doxturi, washin'gtondiki pa'aliyetchi roshen abbasning hedisi gülshen abbastur. Aylardin béri özlirining gülshen abbas isimlik bir doxturi bolghanliqini ret qilip kelgen mezkur doxturxana xadimliri bu qétim muxbirimizning so'allirigha jawaben gülshen abbasning tutqunda ikenlikini delillidi.

Gülshen abbasning amérikada yashawatqan ikki qizi ürümchidiki uruq-tughqan, tonush-bilishliri we hetta saqchi organliridin apisi heqqide héchqandaq uchurgha érishelmigendin kéyin washin'gtondiki xitay elchixanisigha toxtimay xet yazghan, téléfon qilghan. Emma anisining nede ikenliki, téléfonining néme üchün élinmaydighanliqi, tutqunda yaki emeslikidin ibaret tolimu addiy bir so'algha jawab tapalmighan.

Gülshen abbasning xizmet ornigha qarita aylardin béri élip barghan téléfon ziyaretlirimizmu izchil jawabsiz qalduruldi. Xadimlar bezide gülshen abbasni tonumaydighanliqini bildürse, bezide bu orunda bundaq bir xizmetchining bolghanliqinimu inkar qilip keldi.

Gülshen abbasning amérikada yashawatqan ikki qizi we üch qérindishi 3 yildin buyanqi omumiy Uyghur weziyitige qarap turup, bolupmu uruq-tughqan we tonush-bilishlirining gülshen xanim heqqide éghiz achalmasliqigha qarap turup uning tutqunda ikenlikini könglide jezmleshtürgen. Ular shuningdin kéyin, gülshen abbasning qeyerde tutup turuluwatqanliqi we atalmish “Jinayiti” ning néme ikenliki heqqide izden'gen. Pa'aliyetchi roshen abbas bu heqte melumatqa érishish üchün pa'aliyetlirige birleshtürüp hedisi gülshen abbasning ehwalini xelq'ara sehnilerge élip chiqqan. Achisining kespiy terbiyelerge éhtiyaji yoqluqi, uning bir tejribilik doxtur ikenlikini sorunlarda köp qétim tekitligen. Bu mesxirilik shikayetlermu xitay da'irilirini zuwan'gha keltürelmigen.

Téléfonimizni qobul qilghan teweliktiki saqchi xadimlirimu ghayiblar mesilisining “Dölet mexpiyetliki” ikenlikini tekitlep, so'alimizgha jawab bermidi.

Xitay lagérlarni taqighanliqini élan qilip dunyaning közini boyighanda gülshen abbasning qizliri we qérindashliri “Bizmu Uyghur”, “Qérindashlirimizdin téxiche xewer yoq” dégen namlardiki heshteg pa'aliyetlirige qétilghan. Xitay da'iriliri bu heriketke jawaben bir türküm pa'aliyetchilerning uruq-tughqanlirini ékranda körsitishke mejbur bolghan we ularning tutqunda emesliki heqqide hékayilerni toqup chiqqan, emma gülshen abbas heqqide yenila héchnéme déyilmigen.

Biz shu künlerde gülshen abbas ishligen doxturxanigha téléfon qilip ehwal sürüshte qilduq. Doxturxana xadimliri bu qétim bu toghrida doxturxanining pésiyonérlar bölümidin melumat élishimizni tewsiye qildi.

Bu uzun'gha sozulghan jawapsizliq we iz-déréksizlik gülshen abbasning washin'gtondiki a'ile tawabi'atlirini téximu endishige salidu. Qizi ziba muratning radiyomizgha bayan qilishiche, gülshen abbas aktip ijtima'iy pa'aliyetlerdin chékin'gen bir pénsiyonér, ikki perzentining oqush we a'ile ishlirigha özini atighan bir a'ile ayali, uning 21 ayghiche soliwélinip tekshürülgüdek bir ish-izi mewjut emes. Bu nuqtini közde tutqan pa'aliyetchi roshen abbas pa'aliyetliri dawamida xitayning hedisini görüge éliwélish yoli bilen özini pa'aliyettin tosmaqchi bolghanliqini ilgiri süridu we hedisining tutulushining özining 2018‏-yili hudsun institutida Uyghur weziyiti heqqide söz qilishining arqisidinla yür bergenlikini buninggha pakit qilip körsitidu we xitay dölitining bu qilmishini banditliqqa oxshitidu hemde ularni térrorluq bilen eyibleydu.

Téléfonimizni bu qétim qobul qilghan doxturxana pénsiyonérlar ishxanisining xadimi gülshen abbasning eng yéqinda ma'ashini qachan alghanliqi heqqidiki so'alimizgha jawaben uning tutqunda ikenlikini ashkarilidi.

Téléfonimizni qobul qilghan kadirlar bölümining xadimi gülshen abbasni qaysi saqchi orgini tutqanliqi heqqidiki so'alimizgha jawaben uning tutqunda ikenliki heqqide doxturxana ichide uqturush tarqitilghanliqini ashkarilidi. U yene xizmiti munasiwiti bilen gülshen abbas délosigha alaqidar bir qisim matériyallarni körgenlikinimu tilgha aldi.

Melum bolushiche, ghayib gülshen abbas xanim özining 2 yashliq ikkinchi newrisini téxi körüp baqmighan we bir yérim yashtin ashqan üchinchi newrisining tughulghanliqidin téxi xewersiz iken. Bu tür görüge éliwélishning pütün Uyghur pa'aliyetchiliri we ularning a'ile tawabi'atlirigha éghir azablarni élip kelgenlikini tilgha alghan roshen abbas buning yene özlirining xitaygha qarshi pa'aliyetliride qolliridiki küchlük bir qoralgha aylan'ghanliqi, xitayning perdazlap kéliwatqan zulum we qirghinchiliqlirini échip tashlishida muhim rol oynighanliqini eskertti. U Uyghur pa'aliyetchilirining bu tür tosalghular netijiside téximu chéniqidighanliqi we bu tür dölet térrorluqi üstidin ghalip kélidighanliqini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.