Gülshen abbasning tutqun qilinishigha seweb bolghan xitay emeldarlirining amérikagha wiza élishi cheklendi

Amérika kéngesh palata ezasi, kéngesh palata edliye komitéti re'isi dik durbén (Senator Dick Durbin) Uyghur pa'aliyetchisi roshen abbas xanimning hedisi gülshen abbas xanimning ürümchide xitay hökümiti teripidin naheq tutqun qilinishi we 20 yilliq qamaq jazasigha höküm qilinishida rol oynighan barliq xitay emeldarlirining amérikagha wiza élishini cheklesh heqqide amérika dölet mejlisidin amérika tashqi ishlar ministirliqi we chet'el mulazimetlirige testiqlinidighan rasxotqa munasiwetlik 4797-nomurluq qanun'gha toluqlima madda kirgüzüshni telep qilghan.

Mezkur toluqlima madda bolsa 25-iyul küni kéngesh palatasi teqsimat komitétining birdek maqullishi bilen testiqlinip, 4797-nomurluq qanunning 222-babigha kirgüzülgen.

Biz bu munasiwet bilen Uyghur herikiti teshkilati re'isi roshen abbas xanimni ziyaret qilduq. Roshen xanim bu qararning Uyghurlargha qaritiliwatqan irqiy qirghinchiliqqa taqabil turush heriketliri ichide qaratmiliq küchi bolghan bir heriket bolghanliqini éytti.

Kéngesh palata ezasi dik durbén bu maddining qanun'gha kirgüzülgenlikini X tiki resmiy hésabi arqiliq jakarlighan bolup, u teqsimat komitétining özi teklip qilghan maddini maqullighanliqini qarshi alghan. U mundaq dep yazghan:

“Gülshen abbas peqetla singlisining Uyghurlar üchün qilghan pa'aliyetliri sewebidin naheq tutqun qilin'ghan we rehimsizlerche 20 yilliq késilgen. Kéngesh palatasi teqsimat komitéti méning teklipimni birdek maqullap, gülshen abbasni naheq tutup turushqa qatnashqan xitay emeldarlirining amérika wizisi élishini cheklidi. Gülshen abbas derhal qoyup bérilishi kérek”.

campaignforuyghurs.org

Roshen abbas xanimning déyishiche, mezkur qarar hazirqidek amérika pirézidéntliq saylimi bolush aldidiki weziyette Uyghur mesilisini janliq tutup turush üchün we bundin kéyinmu dawamliq mushundaq qaratmiliqi yuqiri qararlarning élinishida muhim rol oynaydiken.

Doxtur gülshen abbas 2018-yilning axirlirida tutqun qilinip, xitay da'iriliri teripidin “Térrorluq herikiti uyushturushqa qatnishish, uninggha yardem qilish we ijtima'iy tertipni qalaymiqan qilish” bilen eyiblen'gen, shundaqla 20 yilliq qamaq jazasigha höküm qilin'ghanidi.

Amérika kéngesh palata ezasi dik durbin bu yil 5-ayda tashqi ishlar ministiri antoni bilinkén'ge uchur yollap, uningdin gülshen abbas qatarliq tutqunlarni qutquzushini telep qilghanidi.