Lagér shahitliri gollandiyediki eng chong xelq'araliq shirket “Küntash” ta guwahliq berdi

13-Féwral küni, gollandiyening paytexti améstérdamda bash shitabi ispaniyediki eng chong quyash énérgiyesi shirkiti bolghan “Küntash” (Sunroc) shirkiti, lagér shahitliridin, gollandiyede yashaydighan qelbinur sidiq, ömer bék'alilarni gollandiyediki merkizige guwahliqqa teklip qilghan. Bu qétimqi guwahliq bérish pa'aliyitige lagér shahitliridin bashqa yene gollandiyediki “Uyghur kishilik hoquq fondi” din enwer erdem we dunya Uyghur qurultiyi xitay ishliri komitétidin adiljan abdukérimlarmu qatnashqan.

Bu munasiwet bilen radiyomizning ziyaritini qobul qilghan enwer ependi, bu qétimqi pa'aliyetni “Küntash” shirkiti mexsus orunlashturghanliqi heqqide melumat berdi.

Bu pa'aliyetning témisi “Uyghur qul ishchilar we xitayning küntaxta mehsulatliri” dégen témida bolup, pa'aliyetke teklip bilen qatnashqan adiljan abdukérim, xitayning Uyghur mejburiy emgikidin kelgen mehsulatlirining erzan bolushining arqa körünüshi we xitayning bügün dunyagha qandaq tehdit boluwatqanliqini deliller bilen chüshendürüp ötken.

“Uyghur kishilik hoquq fondi” din enwerjan munasiwetlik xewerler we ilmiy doklatlarni menbe qilghan asasta Uyghur qirghinchiliqi we mejburiy emgekning nishanigha aylan'ghan Uyghurlar hemde xitayning bu rayonni mutleq mustemlikisige aylandurush üchün, qirghinchiliq qedimini tézletkenliki heqqide melumat bergen.

Lagér shahiti ömerbék'ali mehbus kiyimini kiyip, put-qolliri kishenlen'gen halda, xitayning türmiside tartqan qiyin-qistaqlirini köz yashliri bilen teswirlep bergende, pa'aliyetke qatnashquchilar nahayiti qayghurghan. Lagér shahiti ömer bék'alimu radiyomizning ziyaritini qobul qilip bu heqtiki tepsilatlarni biz bilen ortaqlashti.

Lagér shahiti qelbinur sidiqning bügünki pa'aliyet heqqide melumat bérishiche, shirket mes'ulliri we qatnashquchilar lagér shahitlirining guwahliqini yüzturane anglighandin kiyin köz yashlirini tutalmighan, küntaxta tijaritide bundin kéyin téximu qattiq diqqet qilidighanliqini bildürüshken.

“Küntash” shirkitining mes'ulliri we yighin qatnashquchiliri xitayda Uyghur irqiy qirghinchiliqi we mejburiy emgekning barliqini anglighan bolsimu, bu qétim lagér shahitlirining guwahliqini yüzturane anglighandin kiyin Uyghurlarning béshigha kelgen bu paji'elerdin qattiq chöchügenlikini, buningdin kéyin özlirining mejburiy emgek mehsulatliridin qandaq saqlinidighanliqi heqqide yéngidin pilan-program tüzidighanliqini we gollandiyediki Uyghur teshkilatliri bilen dawamliq alaqe qilip turidighanliqini éytishqan.

Pa'aliyet axirida bezi qatnashquchilar, qelbinur we ömer bék'alilarning yénigha kélip xatire süretke chüshüp, bundin kéyin xitay mélini sétiwalmaydighanliqini bildürüshken. Bu pa'aliyetke “Küntash” shirkitining gollandiye tarmiqidiki ishchi xizmetchilerdin bashqa yene, shiwétsariyediki shirket wekilliri we yawropa döletliridiki her qaysi tarmaqlirining mes'ulliri, gollandiyening bankichiliq we iqtisadiy komitétlarning wekillirimu qatnashqan. Küntash shirkiti, 1938-yildin bashlap qum, shéghil, asfalt, qurulush matériyalliridin tartip, dunyada qiziq téma boluwatqan yéshil énérgiye menbesi bolghan, küntaxta qorulushlirighiche köp sahede tijaret qilidighan bolup, 5000 mingdin artuq ishchi xizmetchisi bolghan bu shirketning amérika, yawropa, kanada we dunyaning perqliq yerliride tarmaqliri bar iken.