Lagér shahitliri “Oslo erkinlik munbiri” de Uyghur mejburiy emgiki mehsulatlirini chekleshni telep qildi

“Oslo erkinlik munbiri” 2009-yili bash shtabi nyu-york shehiridiki “Kishilik hoquq fondi” teripidin tunji qétim yolgha qoyulghan. Shundin buyan bu munber dunyaning herqaysi jayliridiki muhim kishilik hoquq mesililiri we hakim mutleq hökümetlerning eng yéqinqi ehwali üstide munaziriler bolidighan, shundaqla herqaysi dölet we rayondin kelgen tonulghan shexslerni, kishilik hoquq pa'aliyetchiliri we siyaset, soda sahesidiki erbablarni jem qilidighan muhim xelq'araliq sorunlarning birige aylan'ghan.

2023-Yili-28 séntebir küni niyu-yorkta ötküzülgen oslo erkinlik munbiri yighinigha, bu yil ichide 2-qétim teklip bilen qatnashqan lagér shahitliri qelbinur sidiq xanim we gülbahar xatiwaji xanimlar, Uyghurlar uchrawatqan irqiy qirghinchiliq weziyitini yene bir qétim anglitip qizghin alqishqa érishken.

Yighindin kéyin qelbinur sidiq xanim we gülbahar xatiwaji xanimlar ziyaritimizni qobul qildi.

Qelbinur sidiq xanim pa'aliyet heqqide toxtaldi.

U ay yultuzluq sherqiy türkistan bayriqi ésilghan sehnide turup, Uyghurlar uchrawatqan irqiy qirghinchiliq weziyitini anglatqinida, yighin'gha qatnashqan 1000 gha yéqin kishining ularning nutqini diqqet ichide anglighanliqini bildürdi.

Lagér shahitliri qelbinur sidiq xanim we gülbahar xatiwaji xanimlar 2023-yili 6-ayning 13-küni norwégiyening paytexti osloda ötküzülgen “Oslo erkinlik munbiri” de Uyghurlar mesilisini anglitip yighin ehlini lerzige salghanidi.

Gülbahar xatiwaji xanim özlirining bu yil ichide 2-qétim “Oslo erkinlik munbiri” de söz pursitige ériship, Uyghurlar uchrawatqan irqiy qirghinchiliq weziyitini bu munberde yene bir qétim anglitish pursitige érishkenlikidin intayin hayajanlan'ghanliqini bildürdi.

Qelbinur xanimning bildürüshiche, ular yighinda özliri biwasite shahit bolghan, Uyghurlar bügünki künde yoluquwatqan irqiy qirghinchiliq paji'elirini, lagérlarda sadir boluwatqan insaniyetke qarshi jinayetlerni anglatqandin bashqa Uyghur mejburiy emgiki bedilige ishlen'gen mehsulatlarni chekleshke chaqiriq qilghan.

Qelbinur xanim yighinda Uyghur mejburiy emgiki mehsulatlirini cheklesh mesilisining yighin qatnashchilirining muhim munazire témiliridin biri bolghanliqini bildürdi.

Uning bildürüshiche, ularning sehnidiki nutqi ayaghlashqandin kéyinmu, yighin qatnashchiliri dem élish ariliqida ular bilen ayrim söhbette bolup, ularning Uyghur mejburiy emgiki mehsulatlirini cheklesh chaqiriqini yéqindin qollaydighanliqini ipadiligen.

“Oslo erkinlik munbiri” 2009-yili tunji qétimliq yighinini chaqirghan. U hazir xelq'aradiki nurghun muhim shexslerni bir yerge jem qilidighan nopuzluq sorun'gha aylan'ghan. Hazirghiche bu yighinda Uyghurlardin 2010-yili rabiye qadir xanim, 2019-yili nuri türkel ependi, 2020-yili gülchéhre xoja, 2021-yili türmidiki Uyghur ziyaliysi, folklorshunas rahile dawutning qizi eqide polat, 2022-yili jewher ilhamlar qatniship, Uyghurlarning irqiy qirghinchiliqqa uchrawatqan weziyitini anglatqanidi.

Yuqiriqi awaz ulinishidin tepsilatini anglaysiler.