Yaponiyede tunji qétim keng-kölemlik guwahliq bérish pa'aliyiti ötküzüldi

Ixtiyariy muxbirimiz erkin tarim
2020.10.12
nagawo-takashi-uyghur-guwahliq.jpg Yaponiye awam palatasi ezasi nagawu takashi ependi Uyghurlarning hazirqi éghir ehwalini anglitish we guwahliq bérish pa'aliyitide söz qilmaqta. 2020-Yili 10-öktebir, yaponiye.
RFA/Erkin Tarim

10-Öktebir küni yaponiyening osaka shehiride parlamént ezasi maruyama ependi we yaponiye Uyghur jem'iyitining uyushturushi bilen chong kölemlik Uyghurlarning hazirqi éghir ehwalini anglitish we guwahliq bérish pa'aliyiti ötküzülgen.

Bu pa'aliyetke yaponiye awam palatasi ezasi nagawu takashi ependi, 12 neper yerlik parlamént ezasi we qoshna sheherlerning sheher bashliqliri ishtirak qilghan. Dunya Uyghur qurultiyining yaponiyediki wekili we yaponiye Uyghur jem'iyitining pexriy re'isi ilham mexmut ependi yaponiyede ötküzülgen tunji qétimliq guwahliq bérish yighinining intayin ünümlük ötkenlikini bayan qildi.

Bu guwahliq bérish ilham mexmut ependi, yaponiye Uyghur jem'iyitining re'isi doktor abdukérim abduraxman ependi, mu'awin re'isi exmet létip ependi we idare hey'iti ezasi xelmet rozaxun ependiler ishtirak qilghan. Exmet létip ependi mezkur yighinda Uyghurlarning hazirqi éghir weziyiti toghrisida mexsus doklat bergen.

Xelmet ruzaxun ependining bildürüshiche, yighinda osaka we shu etrapta turuwatqan 6 neper Uyghur öz yurtliridiki ata-aniliri we uruq-tughqanliri bolup 100 dek kishi toghrisida guwahliq bergen. Xelmet rozaxun ependi bu heqte bizge melumat berdi.

10-Öktebir küni yaponiyening osaka shehiride ötküzülgen mezkur guwahliq bérish yighinda yaponiye awam palatasi ezasi nagawu takashi ependimu söz qilip, yaponiye parlaméntidiki “Uyghur dostluq guruppisi” ni tézdin heriketke ötküzüdighanliqi toghrisida wede bergen. Xalmet ependi bu heqtimu melumat berdi.

Ilham mexmut ependi bu pa'aliyetning mezmun jehettin bay hem shundaqla yaponiyediki Uyghurlarning lagérlargha qamalgha uruq-tughqanliri toghriliq tunji qétimliq guwahliq bérish pa'aliyiti bolghanliqini, buning yaponiyede bundin kéyinki milliy dewa ishliri üchün zor ehmiyetke ige ikenlikini bildürdi.

Xelmet rozaxun ependi 2017-yilidin tartip yaponiyediki Uyghurlarning köplep Uyghurlargha munasiwetlik siyasiy pa'aliyetlerge qatnishiwatqanliqini, bu pa'aliyetningmu yaponiyede tunji qétim zor kölemde ötküzülgen bir guwahliq bérish yighini bolghanliqini, buning yaponiyediki Uyghurlarning yaponiye Uyghur jem'iyitining etrapigha zich uyushup pa'aliyet élip baralaydighanliqining bir ispati ikenlikini otturigha qoydi.

10-Öktebir küni kech sa'et 7 din 9 ghiche yaponiyening osaka shehiride ötküzülgen yaponiye parlamént ezaliri we köp sanda yaponlar ishtirak qilghan tunji qétimliq guwahliq bérish yighining axirida yaponlar Uyghurlarning qolini tutup turup: “Biz silerni qollaymiz, biz her da'im silerning yéninglarda” dégen. Xelmet rozaxun ependi bu tesirlik körünüshler heqqidimu melumat berdi.

Yaponiye Uyghur jem'iyi'itining rehberliri yaponiyediki Uyghurlarningmu wetendiki ata-ana we uruq-tughqanlirining xitayning jaza lagérlirida yaki türmiliride ikenlikini, bundin kéyin bundaq guwahliq bérish pa'aliyetlirini yaponiyening her qaysi jaylirida qanat yayduridighanliqini tekitleshti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.