Heptilik xewerler (1-féwraldin 7-féwralghiche)

Muxbirimiz eziz
2020-02-07
Élxet
Pikir
Share
Print
Heptilik xewerler (1-féwraldin 7-féwralghiche)
Heptilik xewerler (1-féwraldin 7-féwralghiche)
REUTERS

Dunyaning herqaysi jayliridiki Uyghurlar "5-Féwral paji'esi" ni xatirilidi

5-Féwral küni amérika, yawropa we bashqa jaylardiki Uyghur jama'iti türlük shekillerdiki xatirilesh pa'aliyiti arqiliq 1997-yilidiki ghulja "5-Féwral paji'esi" ning 23 yilliqini xatirilidi.

Amérika, gérmaniye, awstraliye, en'gliye qatarliq jaylardiki Uyghurlar shu jaylardiki xitay elchixaniliri aldida naraziliq namayishliri teshkillep, özlirining xitay hökümitige bolghan naraziliqini, shuningdek Uyghurlarning iradisini namayan qildi.

Qazaqistan, qirghizistan we türkiye qatarliq jaylardiki Uyghur muhajirliri türlük yighilish pa'aliyetliri ötküzdi hemde "5-Féwral paji'esi" ning shéhitlirining rohigha atap xetme-qur'an qildi.

Uyghurlar diyaridiki tajsiman wirus köp tereplime endishe qozghimaqta

Xitaydin yamrighan "Wuxen wirusi" depmu atiliwatqan tajsiman wirus, nöwette Uyghur diyaridimu téz tarqiliwatqan bolup, muhajirettiki Uyghurlar bu apetning lagérdiki Uyghurlargha tarqilip kétishidin endishe qilmaqta.

Muxbirimizning ehwal éniqlishi jeryanida xitay da'iriliri Uyghur diyarida tajsiman wirusning tarqilishigha munasiwetlik ehwallarning "Dölet mexpiyetliki" dep qarilidighanliqini bildürdi.

Melum bolushiche Uyghurlar diyarida hazir "Yuqumlinishtin saqlinish" namida herqaysi mehelliler we ahaliler sim tosuqlar arqiliq bir-biridin ayriwétilgen. Shundaqla ularning sirtqa chiqishi cheklen'gen. Emma ularning aldin'ala ozuq-tülük jemliwélishigha purset bérilmigen.

Atushta 99 neper wuxenlikning karantin qilin'ghanliqi ashkarilandi

Xitay da'irilirining késellikni yoshurush mezgilide wuxen shehiridin besh milyonche ahalining herqaysi jaylargha qachqanliqi, shulardin on nechche mingining Uyghurlar diyarigha kelgenliki heqqide uchur tarqalghanidi. Muxbirimizning ehwal éniqlishi jeryanida bu ehwal qismen delillendi.

Wuxendin qéchip kelgen xitaylardin 99 nepiri nöwette atushtiki yashing méhmanxanisida karantin qiliniwatqan bolup, qalghan méhmanxanilardimu bu xil ehwalning mewjutluqi melum bolmaqta.

Uyghur diyaridiki tajsiman wirustin yuqumlan'ghanlarning sani tézdin éshiwatqan ehwalda wuxendin qéchip kelgenlerning bashqa sheherlerde qanchilik sanda ikenliki hazir köp qisim Uyghurlarni bi'aram qilmaqtiken.

Siemens Ning paychilar yighinida uning Uyghur rayonidiki depsendichilikke shérik bolup qalmasliqi telep qilindi

Gérmaniyediki dangliq shirketlerdin zéminis (Siemens) shirkitining yilda bir qétim ötküzülidighan yilliq pay chéki hessidarlar yighini 5‏-féwral küni gérmaniyening myunxén shehiride ötküzüldi.

Sekkiz mingche kishi qatnashqan bu yighinda Uyghur pa'aliyetchilerdin esqerjan kishilik hoquq teshkilatlirigha wakaliten söz qilip, zéminis shirkitining Uyghur rayonidiki kishilik hoquq depsendichilikke shérik bolup qalmasliqini telep qildi.

Zéminis shirkitining bash ijra'iye emeldar joy kaysér bu heqte söz qilip: "Biz xitaygha sétip bergen téxnika ular mexsus Uyghurlar üchün ishlep chiqqan epke chüshmeydu" dédi.

"Yehudiylar qirghinchiliqi" xatiriside Uyghurlar mesilisi qayta eslendi

Milyonlighan yehudiy qirghin qilin'ghan "Zor qirghinchiliq" ning 75 yilliq xatirisi üchün ötküzülgen muhakime yighinida Uyghurlar mesilisi yene bir qétim alahide tekitlinip, dunyani bu xil paji'ege qaytidin shahit bolmasliqqa chaqirdi.

Yighin ishtirakchiliri birdek nöwettiki diniy étiqadqa ige xelqning basturulush obyékti bolushidek mesilini chöridigen halda Uyghurlarning xitaydiki "Insaniyetke qarshi jinayet" ning qurbani boluwatqanliqini bildürdi.

Washin'gton shehiridiki "Yehudiylar qirghinchiliqi" muzéyida échilghan bu yighin'gha bir qisim Uyghur teshkilatlirining wekilliri hemde amérika hökümitining bir qisim yuqiri derijilik emeldarliri, shundaqla yehudiy wekiller qatnashti.

Amérika prézidéntining dölet weziyitidin melumat bérish utuqigha tunji qétim Uyghur wekili qatnashti

4-Féwral amérika prézidénti trampning dölet weziyiti boyiche melumat bérish nutuq murasimi amérika dölet mejliside ötküzüldi. Amérika hökümitining eng yuqiri derijilik siyasiy pa'aliyetliridin biri bolghan bu murasimgha amérikaning barliq yuqiri derijilik emeldarliri qatnashti.

Amérika prézidéntining bu yilliq nutuq murasimigha Uyghur pa'aliyetchi roshen abbas teklip qilindi. U amérika kéngesh palatasining ezasi marko rubyoning méhmini süpitide pa'aliyetke qatnashti.

Melum bolushiche, bu Uyghur wekillirining tunji qétim mushu xildiki murasimgha qatnishishi hésablinidiken. Analizchilar bu heqte pikir qilip, bu hal öz nöwitide Uyghur mesilisining téximu keng miqyasta étirap qiliniwatqanliqining bir ipadisi, dédi.

Toluq bet