Heptilik xewerler (18-féwraldin 24-féwralghiche)

Erkin asiya radi'osi Uyghur bölümi heptilik xewerliri

Guma nahiyeside yüz bergen pichaqliq hujumning tepsilati ashkarilandi

Xitay taratquliri 14-féwral küni gumida yüz bergen pichaqliq hujumning sewebi we jeryanini axbarattin yoshurghan bolsimu, emma uzun ötmeyla weqening tepsilati ashkarilandi.

Radiyomizning bu heqtiki éniqlashliri dawamida pichaqliq hujumni ömer abduraxman, memtimin abduraxman we exmet eli qatarliq 3 kishi élip barghanliqi, hujumda baj idarisining bir xadimi bilen nahiyilik intizam tekshürüsh komitéti sékrétarining ayalini öz ichige alghan 6 xitayning öltürülgenliki melum boldi.

Gumidiki bir kompartiye ezasining bildürüshiche, weqedin bir kün ilgiri abduraxman rehmitulla a'ilisi topliship namaz oqughanliqi üchün xizmet guruppisi teripidin soraqqa tartilghan. Ular yene 14-féwral küni saqchigha chaqirtilghanda mezkur weqeni peyda qilghan iken.

Qaraqash nahiyiside 3 neper Uyghur kadir “28‏-Dékabir weqesi” de biperwaliq qilghan, dep qolgha élin'ghan

Igilinishiche, qaraqash nahiyelik partkom ishxanisining mu'awin bashliqi éli ghoja'abdulla, yawa yéza jahanbagh kentining partiye sékrétari memetniyaz yüsüp, jümebazar kentining sékrétari abdumemet sadir qatarliq 3 kishi yéqinda resmiy qolgha élin'ghan.

Xoten wilayetlik teptish mehkimisining bu 3 neper Uyghur kadirgha resmiy délo turghuzghanliqi, ularni ötken yili 28‏-dékabirdiki qaraqash nahiyelik partkomgha aptomobilliq hujum qilish weqeside “Biperwaliq qilghan”, dep eyibligenliki melum.

Qaraqash nahiyesidiki yerlik da'iriler bu xewerning rastliqini delilligen bolsimu, emma uning tepsilati heqqide uchur bérishni ret qildi.

Uyghur élida yük aptomobillirigha orun belgilesh sistémisi orunlashturulmaqtiken

Ötken hepte bayin'gholin oblastliq j x idarisi yük aptomobili we bashqa barliq chong tiptiki matorluq qatnash wasitilirige “Beydu sün'iy hemrahida orun belgilesh bixeterlik nazaret sistémisi” ni orunlashturidighanliqini bildürgen.

Xitay axbarat wasitilirining qeyt qilishiche, mezkur orun belgilesh sistémisini ornitish ishi yéqin kelgüside Uyghur élining bashqa rayonlirighimu kéngeytilidiken.

Bayin'gholin oblastliq j x idarisi tarim qatnash bashqurush etritining kéchilik nöwetchi xadimi, mezkur sistémining 20‏-féwraldin bashlap aptomobillargha orunlashturulushqa bashlighanliqini delillidi.

Da'irilerning Uyghurlar bilen xitaylarning toylishishini ilgiri sürüsh heqqidiki teshwiqati küchlük inkas qozghimaqta

Chén chüen'goning “Qoshmaq tughqan” siyasiti yolgha qoyulghandin buyan, xitay hökümet taratqulirining rayonda milletler ara toylishishni küchep teshwiq qilishqa bashlighanliqi melum.

Yéqinda Uyghur élining jenubidiki melum bir jayda “Aynurgul bilen tyen changshing (qeyserjan) ning nikah toyigha mubarek bolsun!” dégen lozunka ésilghan bir toy murasimi heqqidiki süretlik xewerler ijtima'iy taratqularda körülüshke bashlidi.

Bu hadise muhajirettiki Uyghur jama'itide küchlük inkas peyda qildi. Kanadada yashawatqan Uyghur serxilliridin ruqiye turdush xanim “Mextumsula, siz nede?” namliq awazliq maqalisi arqiliq xitayning rayondiki éritip tügitish siyasitini tenqid qildi.

Ürümchi kona sheher rayonining chéqilidighanliqi muhajirettiki Uyghur serxillirining endishisini qozghimaqta

Melum bolushiche, 18-féwral küni échilghan ürümchi sheherlik xelq qurultiyining 1-yighinida kelgüsidiki üch yil ichide ürümchi kona sheher rayonini özgertip qurush pilani testiqlan'ghan.

130 Milyard som meblegh sélinish mölcherlen'gen bu pilanda ürümchi shehirining Uyghurlar topliship olturaqlashqan kona sheher rayoni chéqip tashlinip, qaytidin yasilidiken.

Bu xewer muhajirettiki Uyghur pa'aliyetchiler bilen mutexessislerning endishisini qozghidi. Amérikida olturushluq xelq'ara iqtisad ilmiy mutexessisi, doktor perhat bilgin bilen amérika Uyghur birleshmisining re'isi ilshat hesen ependiler bu heqte inkas qayturdi.

Istanbulda Uyghur akadémiyesining “7-Nöwetlik Uyghur ana tili ilmiy muhakime yighini” ötküzüldi

Istanbuldiki Uyghur akadémiyesi ötken yekshenbe küni “Dunya ana til küni” munasiwiti bilen “7-Nöwetlik Uyghur ana tili muhakime yighini we Uyghur magistir, doktor oqughuchilar ilmiy muhakime yighini” ötküzdi.

Yighin'gha türkiyede yashawatqan Uyghur ziyaliyliri, studéntlar we yash-ösmürler bolup, 150 tin artuq kishi qatnashqan.

Mezkur yighinda Uyghur perzentliri ana tilda mol mezmunluq edebiyat-sen'et nomurlirini körsetken. Uyghur ziyaliyliridin abduweli ayup “Uyghur a'ile ma'aripida ana tilning roli” dégen témida léksiye sözlep, ana tilning sel qarashqa bolmaydighan qimmetlik bayliq ikenlikini tekitligen.